12
In ci hayɗoh Pool haa heeƴ
1 Nik ndii tipkee raakɗi njiriñ, waaye ŋ joyiɗa tum. Ŋ hey woye in ci hayɗoh ho haa heeƴ na ci ɗasɗukiɗ ci Heɗi teeɓ po.
2 Ŋ inhiɗ ɓo' nikiɗ ŋ Kiristaani. Wa tumiɗ kiis ndaŋkiyaah na nikiis (14) kotii, wi Kooh ɓay ƴaareem po ŋ Asamaana kaahayɗoh. Andi a ɓay ɗe na faaniŋ ɗe ? Ŋ inahɗi. Andi na faaniŋ ɗe haa ? Ŋ inahɗi, waaye Kooh inhiɗ.
3-4 Ee, ŋ inhiɗ ne ƴaareem ɓayuuɗ po ŋ Aljana (Ŋ woyis ne, ŋ inahɗi andi wa nikee na faaniŋ ɗe wala. Kooh dong a yi inah), te ndaam, a kerhiɗ woo ci minɗi woyu te ali ɓo' onuuɗi ne a woo ca.
5 Ŋ hey ndamke ŋ ini kaɗ ŋ ƴaareem - waaye, ini kaɗ nga so, ŋ ndamkanɗi ɗal ŋ ñaki ŋ ñak hatil.
6 Te kat, ŋ waakeen hotaat to ɗah, ŋ heeɗi nike naandiɗ, ŋ hee woye ini raak. Waaye mi na wortuke wortuk waak hotaat to, laam ŋ waaɗɗi ne ɓooɓi liiɓ nga so ini uup ini ɓa na hotee so haɓɗe, wala wi ɓa na kerhee so woye.
7 Waaye, ne ŋ yaksiɗkuu ŋ haf fo ŋ in ci feyohiɗ ci ŋ teeɓu, faaniŋ ngo ɓeku rup ; rupeem, weɗ ini Seytaani woos ne wa laɓ po, Kooh sang ne ŋ hotsiɗuk.
8 Waas kaahay ŋ kiimiɗa Heɗi ne a saɓsoh ho na ineem.
9 A loffa so ne : « Baahohi ŋ baahoh ɗa doyiɗ. Hatiliŋ ngo na hotke hooliɗ ne fu ñak hatil ɗah. »
Kon ini uup po neɓ, weɗ ne ŋ waak hotaat to ŋ ñaki ŋ ñak hatil, ineem weɗ na hee tahe hatiliŋ Kiristaani nik nga so.
10 Ineem weɗ tah ho neɓu ngaŋ nik ndengaaɗi, ŋ neɓuusa ŋ ɓas ci, na miskiɗ ci, na tolfiɗ ci, na neƴƴoh ci, sagu Kiristaani ; laam, ŋ ñakka hatil ɗah, weɗ mi na raakohe hatil.
Pool waaɗ ne ɓi Korenta kaɗ fiki ŋ kosiŋ ɓa
11 Ŋ naandtiɗohiɗ, waaye e ɗu ɓek ko nga, ɗu ɓi joyee so meeɓ. Ali nik ne ŋ tus haa, apootar ciŋ ɗu yakak ci uupɗi so ŋ ali in.
12 In ci teeɓoh ne ŋ Apootar, ca tumuuɗ ŋ harmban ɗu. Ca tumuuɗ na min muñ keeh-keeh na firnde na keemaan na in feyohiɗ nu nik.
13 Janguuci cinooci tumɗu ye ɗu tumɗuuɗi wa ? Ɗal degi ŋ degɗi ɗu ali in, mi ŋ haf fo. Ɗaasaat to wa !
14 Ŋ ƴutiɗ ne ŋ hay ɗiskiŋ ɗu waasi kaahayɗoh, te ŋ deganɗi ɗu ali in. Mi na waakee ɗu, waaye koporiŋ ɗu haa. Kuɓuuci na nangɗoheeɗi kopor wuu ɓi rim ɓa, e ɓi rim ɓa na nangɗohɗee ɓa.
15 Ini kaɗ nga so, ŋ teyɗukiɗ na keeñ soosiɗ ne ŋ eɗoh ini ŋ raak jen, te sah ŋ eɗoh haf fo jen wuu ɗu. Waaɗi ŋ waaɗ ɗu, findi wa yakoh, hanaa, waaɗi ɗu waaɗ to uupanɗi nga haawsuk ?
16 Ɗu teyɗukiɗ ne ŋ raanɗi ɗu ali in. Waaye ɓum amb ne ŋ lahiɗ ŋ ɗisik wiiriis ŋ ñaañohha ɗu.
17 Ɓooɓi ŋ woosee nga ɗu, ŋ njirñiɗkohiɗ ɗu taamboh ŋ yino nga ɓa e ?
18 Ŋ kiimeen Tit ne a hay nga ɗu, ŋ ambsohha ɗe na ɓaah ɓoo yi hunee na ɗe. Tit njirñiɗkoh ɗu njirñiɗkoh e ? Ŋ hot a njirñiɗkohɗi ɗu ! Andi mi na ɗe ɓoo ɓaahɗi ɓaahɗi liiɓohaaɗ wala ini ɓoo na tiinde ?
19 Ɗu liiɓ ne ina mi na woye poyi, mi na waaɗe hooliɗ haf ɓoo ŋ fikiiɗu e ? A'aa ! Ɓoo na woye ŋ fiki Kooh na niki ɓoo nik ŋ Kiristaani, te in ci ɓoo na woyee ɗu jen, ɓoo na woyee ɗu ca, ne ɗu kaɗ fiki ŋ kosi ɗu kos, ɗu ɓi ɓaah ciŋ ngo ŋ keeñkoh.
20 Laam ŋ neƴƴohiɗ ne ŋ ree ɗiskiŋ ɗu ɗah, ŋ raakanɗi ɗu findi ŋ waaɗoh, te ɗu namanɗi so hotoh findi ɗu waaɗoh. Ŋ neƴƴohiɗ ne ŋ raak ŋ harmban ɗu lahtoh na siisoh, ayrukoh, nookoh, ɓasoh, ɗooɓoh, hotsiɗuk na ɗuuɗ.
21 Ŋ neƴƴohiɗ ne ŋ ɓaaɓiŋ ngo na haye, Koohiŋ ngo ƴissuutɗis so ŋ fikiiɗu, te ɓo' laayiɗ fuɗɗukoh ho, ɓi ris bakaaɗ findi ɗeɓgaan te ɓa eɗɗi usuɓ finho, na faankoh sangohuuɗ na cakaay.