10
Pool langiɗ pangkiŋ ɗe
1 Ini kaɗ nga so mi yi Pool, ɓa na woye ne ŋ nikka ŋ fikiiɗu ɗah, mi na nike neek, ŋ ussa ɗah, ŋ kaañ. Waaye mi yii kiim ɗu inii ŋ tiikiŋ Kiristaani yi eɗef te a baahha :
2 Ŋ kiim ɗu ne, kinaat to tah hay nga ɗu na kaañ, wa wooriɗ to ne ŋ hey tume ineem, te ɓooɓi na liiɓe ne tumohaaɗiŋ ɓoo mand na wiŋ ɓi Adina hey hote.
3 Wa keeh ne ɓoo ɓii pes ŋ Adina, waaye ɓoo na hiñoheeɗi findi ɓi Adina na hiñohohe.
4 Ganaay ci ɓoo na hiñohohe, ca pulohɗi Adina, ca puloh ŋ hatiliŋ Kooh, ca miniɗ yahroh taɓah naafkoha nu nik, liiɓ ci hunɗi na keeh,
5 na in nu na yakɗuke ne wa hondoh ɓooɓi inah Kooh ɗah, te ɓoo na dege liiɓ ci jen yaah ne ca kerhiɗ Kiristaani.
6 Kaɗ po kerhiɗiŋ ɗu na ɗe mit ɗah, ɓoo ƴutiɗ ne ɓoo deg kerhiɗaaɗi nu nik ŋ waas.
7 Markaat in ci baahiɗ ! Ɓo' nu wa woor ne a ɓaah ŋ Kiristaani ɗah, a inhaat ne ɓoo nam ɓaah ŋ Kiristaani findiice !
8 Wa miniɗ nik ne ŋ yaksiɗkiɗ ƴissuut ŋ kikilifaaki Heɗi tum nga ɓoo, waaye ŋ raakanɗi kaci nga, ɓoo eɗu wa ne ɓoo kaɗiɗ ɗu fiki, waaye ne ɓoo yahroh ɗu haa.
9 Ŋ woyiɗ ineem laam ŋ waaɗɗi ne wa mand haa ne mi na tiitɗukee ɗu ŋ fiis ci mi na kaɓɗohee ɗu.
10 Raakiɗ ɓi na woye ne : « Fiis ci Pool na kaɓɗohe, a na woye woo ndengiɗ nga ca, woo ɓitiɗ, waaye a hayootta ɗah, a na mande na ɓoyi raakɗi hatil te a minɗi woo tus. »
11 Ɓo' nu na woye ineem ɗah, a ambaat ne findi woo ciŋ ɓoo mand ŋ kayit ci, ɓoo hay ɗah, tumohaaɗ ciŋ ɓoo mandan ɗaa.
12 Ɓoo kaañɗi mandtiɗkoh wala hendtiɗkoh na ɓi ɓo' nga, ɓi na woye ne ɓeɗ haf ɓa, ɓeɗ min pangki. Waaye ɓa na hendtiɗkohe ŋ haf ɓa, ɓa kooɗee misaal ŋ haf ɓa, ineem, wa inhaaɗi.
13 Ini kaɗ nga ɓoo nak, ɓoo heyɗi yaksiɗke yaksiɗuk uupiɗ ; ɓoo na yaksiɗkohe pangki Kooh eɗ ɓoo ŋ ɗisik ci a tuuƴ ɓoo dong, po ɗiskiŋ ɗu sah.
14 Ɓoo cootukɗi ɗiski a topiɗ ɓoo, ini ɓoo sasu hayiɗ po nga ɗu ; laam a ɓoo koc hay po nga ɗu na Yegɗohiŋ Muci ŋ ini kaɗ ŋ Kiristaani.
15 Ɓoo heyɗi ndamkohe panguk ɓo' wiiriis, mbaa, ɓoo uupiɗ. Waaye ɓoo raakiɗ yaakaar ne kosiŋ ɗu ɓaatuk ɗah, ɓoo hey ɓaate angiɗ pangki ŋ harmban ɗu, te ɓoo cootkanɗi ɗiski ɓoo topɗu.
16 Ŋ ineem, ɓoo hey mine kaɗ usiɗ woya Yegɗohiŋ Muci ŋ ɗisik ci wa reeɗi, ɓoo aasuu ŋ ɗiski ɓo' wiiriis na pangke po ɓoo kee ndamkoha pangkiŋ ɗe.
17 Fiis ci woyiɗ ne : « Ɓo' nu na yaksiɗke ɗah, a yaksiɗkohaat Heɗi ! »
18 Laam ɓoyi na woye ŋ haf ce ne a yi min, a yi teyɗukaah haa, waaye a yi Heɗi woo ne a yi min !