8
Hoosuuɗ wuu kooh nikaaɗi
1 Ɓoo hayaat kotii ŋ ini kaɗ ŋ hoosuuɗ ci na seeƴkohse wuu kooh nikaaɗi. Wa keeh ne yaa nu nga ɓoo ɗah raakiɗ ki'inah ŋ ineem. Ki'inah nak, wa na tahe tah ɓo' yaksiɗuk, e waaɗoh na ndengɗe kos.
2 Ɓoyi liiɓ ne a inhiɗ in, inhiŋ ɗe reeɗi ŋ inah paaɗ.
3 Waaye yi waaɗ Kooh, Kooh inhiɗ ɗe.
4 Kon ini kaɗ ŋ ñam sepet ci seeƴkohu wuu kooh nikaaɗi, wa keeh ne kooh ceem, ca tus ŋ Adina haa, te ɓoo inhiɗa ; a Kooh yino dong raak.
5 Ali nik ne raakiɗ in ci ɓi ɓo' na ɓeeɗke kooh sah, ŋ Asamaan wala ŋ kehƴi, te kat, raakiɗ laayiɗ ci na ɓeeɗkohse kooh, laayiɗ na name ɓeeɗkohu heɗ,
6 waaye ini kaɗ nga ɓoo, Kooh yino dong a yi raak, te a Baabi, yi fu inah ne in ci jen puloh nga ɗe te ɓoo nik ɗah, ɓoo nik wuu ce. Te a Heɗ yino dong nam raak : a Yeesu Kiristaa yi fu inah ne in ci jen nikiɗ taamboh nga ɗe, ɓoo namiɗ nik taamboh nga ɗe.
7 Waaye e kosiɗ ci jen inah ineem haa. Raakiɗ ɓi nga kooh ci nikaaɗiici nik nik ŋ haf ciŋ ɓa po ɗiski wa nik, ɓa ñamee sepet seeƴkohuuɗ ɗah, ɓa na liiɓe ne ca wuu kooh ceem. Te sagu ini ɓa yooɓɗi inhisoh ini baah na wi baahɗi, septeem na soɓe'ɗee liiɓ ciŋ ɓa.
8 Moona e kañam na hee tahe ɓoo raak harmban moɗiɗ na Kooh haa. Ɓoo ñamɗi kañam cum ɗah, wa haawisɗi ɓoo ali in, te ɓoo ñam nga ca ɗah, wa ɓaatɗi ɓoo ali in.
9 Waaye wortukaat, raaki ɗu raak haf ɗu, wa kinaat tah po ɓi kosiŋ ɓa ndengɗi bakaaɗ.
10 Ɓoyi kosiŋ ɗe ndengɗi hot ɗa, fu yi ɓoyi inah, ɓoofiɗ, ñamee ŋ ɗisik ci na seeƴkohse wuu kooh nikaaɗi ɗah, ineem onanɗi ɗe doole ne a ñam sepet ceem e ?
11 Ŋ ndeem, ki'inhi fu raak hey yahrohe ɓoyi ndengaaɗiineem, te moona ɓaah fu yeem, Kiristaani kaaniɗ wuu ce.
12 Ɗu bakaaɗee mand ɗaa ŋ ɓaah ciŋ ɗu, ɗu yahee liiɓ ciŋ ɓa mitaaɗiici ɗah, ɗu na bakaaɗe ŋ Kiristaani haf ce.
13 Ineem weɗ tah po nik ne e kañam ki mi na ñame weɗ na hee bakaaɗɗukohe ɓaah ho ɗah, ŋ ñamissanɗi sepet muk ne ŋ bakaaɗɗukohuu ɓaah ho.