4
Apootar ciŋ Kiristaani
Weɗ tah, ambaat ɓoo findi dag ciŋ Kiristaani, ambaat ɓoo findi ɓooɓi na taambkohe keeh kiŋ Kooh ɗasɗukiɗi. Te ini na waakse ŋ taambkohoh, weɗ ne a nik ɓo' wooriɗ. Ini kaɗ nga so, ɗu raak hotohaaɗ wiiriis nga so wala waas raak hotohaaɗ wiiriis nga so, ineem tus nga so haa, ŋ raakɗi sah hotohaaɗ ŋ haf fo. Ŋ hotɗi sikka ŋ haf fo, waaye ineem tokisɗi ne ŋ ɓo' yurhiɗ. A Heɗi dong na hee so atte'e.
Ineem weɗ tah, kinaat atte ali ɓo' te jamanooniŋ wa reeɗi. Sekaat po Heɗi hay. A yi na hee ñiinɗe ini ɗasɗuk ŋ ñuusi te a teeɓoh waaɗ-waaɗ ci ɗasɗu ŋ keeñ ciŋ ɓooɓi. Teemb ndeem yaa nu nga, e Kooh ɗaapan ɗe ɗaapi a yeyyoo.
Ɓaah ciŋ ngo, e ɗu tah po ŋ kooɗta misaal ŋ Apolos na so ne ɗu jang nga ɓoo, ɗu inah ini woo kii tokis an : « Topa ŋ Fiis ci. » Ali ɓo' nga ɗu kinaat yeg haf ce po a langee na yii, a faɗee yii.
Fu ɗaloh ye na ɓooɓi ? Ini fu raak, e Kooh on ɗa wa haa e ? Nik ne e Kooh on ɗa wa ɗah, wa ye tah fu yaksiɗke po haa fu onu wa onu haa ? Cey, ɗu ariɗ kap ! Ɗu nikiɗ heɗ raak-raak po ƴutiɗ ! Ɗu ɓii buuruk te ɗu sekɗi ɓoo ! Wa joyee nik keeh ne ɗu buur, po ɓoo nam nik buur na ɗu !
Waaye, ɓoo ɓi Apootar ci, wa mand haa ne Kooh deg ɓoo ŋ finhoori, ŋ ɗiskiŋ ambuuɗ ci joy apu, ɓi fu inah ne, Adina jen miniɗ ɓa hot, malaakaaci na ɓo' ci. 10 E ɓoo dof ciŋ Kiristaani, e ɗu ñaañiɗ ciŋ ɗe ; ɓoo raakɗi hatil, ɗu raakiɗ hatil ; ɓoo heefu heefu, ɗu nawu nawu !
11 Po woti, ɓoo aɗkiɗ, sifaɗukka, ɓoo ɓangtuuɗ ɓekkaah, ɓoo ɓii laɓu, ɓoo ɓii wil ɗisik nu ɗisik ; 12 ɓoo ɓii panguk miskiɗ na yaah ciŋ ɓoo. Ɓoo ɓasuusa ɗah, ɓoo kiimɗoh barke ; ɓooɓi tolfiɗee ɓoo ɗah, ɓoo muñ ; 13 ɓoo woyuusa moɗaaɗi ɗah, ɓoo tahas moɗoɗ ne jam raak. Po woti, ɓoo ambu ne e ɓoo paɗ ciŋ Adina, rosiɗ ciŋ ɓooɓi jen.
Kuɓuuciŋ Pool ngaŋ kosi
14 Ŋ fiisɗi ɗu in ci mi na fiise cii ne ŋ njoofiɗ ɗu, waaye, niki ɗu nik findi kuɓuuciŋ ngo ŋ keeñkoh, weɗ tah ŋ fiissa ca ne ŋ yun ɗu. 15 Ŋ ineem, ali ɗu raak ɓi junni jangɗohoh sah ŋ kipes kiŋ ɗu na Kiristaani, ɗu raak baab yino. A ñam baabiŋ ɗu ŋ kipes kiŋ ɗu na Kiristaani Yeesu, ŋ ini ŋ kom ɗu Yegɗohiŋ Muci. 16 Kon mi yii kiim ɗu ne ɗu altiɗkoh ho.
17 Ineem weɗ tah po ŋ tuuƴiɗ Timoote nga ɗu, kuɓki ŋ keeñkoh, kuɓki ŋ amb findi kuɓkiŋ ngo ŋ ini ŋ inhiɗ ɗe Heɗi, te a cariɗ oolku. A hey ɗu naandse findi mi na taambɗohe waasiŋ Kiristaani, ineem weɗ mi na jangɗohe ŋ ɗisik nu ɗisik ŋ ɗooƴ Janguuci jen.
18 Raakiɗ nga ɗu ɓi liiɓ ne ŋ hayanɗi ɗu marke, ɓa ɗii yaksiɗuk. 19 Waaye wa neɓ Heɗi ɗah, ŋ hey haye maañaaɗi. Ŋ hay ɗah, ŋ heyɗi tope ŋ woo ciŋ ɓa dong, ŋ hey marke hatiliŋ ɓooɓi yaksiɗkiɗ ceem. 20 Laam, Nguuriŋ-Kooh wa woo dong haa, wa hatil. 21 Ɗu waaɗ ye ? Ŋ hay nga ɗu na ngeer wala ŋ hay na waaɗoh, ŋ tum na ɗu moɗoɗ ?