12
Onoh ciŋ Fuuɗsi Hoolohngaani
1 Ɓaah ciŋ ngo, ŋ ini kaɗ ŋ onoh ciŋ Fuuɗsi Hoolohngaani, ŋ waaɗɗi ne ɗu nik inhaaɗi nga.
2 Ɗu inhiɗ ne, wa ɗu nikee ɓo' kosaaɗi, ɗu nooksee findi fuuliɗ ne ɗu ñaamuk kooh ci nikaaɗiici, ci minɗi woo.
3 Weɗ tah, ŋ waaɗiɗ ne ɗu inah inii : Fuuɗsiŋ Kooh woyɗukohanɗi ali ɓo' ne : « Yeesu alku'aat ! » te ali ɓo' minɗi woo ne : « Yeesu a yi Heɗi ! » te Fuuɗsi Hoolohngaani woyɗukohɗi ɗe wa.
4 In ci Fuuɗsi Hoolohngaani na onohe ɗalohiɗ, waaye a Fuuɗsi yino-kongi na onohee ca.
5 Panguk ci ɗalohiɗ, waaye ɓooɓi na pangkiɗe Heɗ yino.
6 Tumohaaɗ ci ɗalohiɗ, waaye a Koohi yino-kongi na pangke in ceem jen ŋ ɗooƴ yaa nu nik.
7 Yaa nu nga ɗah, Fuuɗsi Hoolohngaani oniɗ ɗe onohi njirñan ɓooɓi jen.
8 Yum Fuuɗsi oniɗ ɗe liiɓohaaɗ moɗiɗ ne a woo woo moɗiɗ, yinoori Fuuɗsi onnda ɗe inhaah ne a woya ɓooɓi.
9 Fuuɗsi yino-kongeem onnda yum ooluk Kooh, onnda yinoori ne a wirɗee kosaayiɗ ci.
10 A onnda ɓo' wiiriis ne a min tum in feyohiɗ, ɓo' wiiriis ne a woyee taamboh ŋ ɓoyeem. Ɓo' wiiriis onuusa min inhisoh ini puloh ŋ Fuuɗsiŋ Kooh na wi pulohɗi nga ɗe. Ɓo' wiiriis onuusa min jomb ŋ ɓi peɗeem ci ɓa inahɗi, ɓo' wiiriis onuusa ne a min tokis peɗeem ceem.
11 Waaye in ceem jen, ca pangkiŋ Fuuɗsi Hoolohngaani yino-kongeem ngaŋ yaa nu nik ; yaa nu nga a payis ɗe onoh ɗalohiɗ na wiŋ morom ce findi Fuuɗsi waaɗoha.
Faan yino haɓɗohu cir laayiɗ
12 Marka, faan wa yino waaye ca cir laayiɗ nik nga ; te cir ciŋ faani, laayi ca laay jen, ca faan yino ; wa mand ɗaa ŋ Kiristaani.
13 Ɓoo jen, Yawuut na nikaaɗi Yawuut, ñaam na nikaaɗi ñaam, ɓoo jen ɓoktu ŋ Fuuɗsi yinoori ne ɓoo nik faan yino. Ɓoo jen, ɓoo nam anɗu ŋ culiŋ Fuuɗsi yinooreem.
14 Faan cir yino haa, wa cir laayiɗ.
15 Kot woo ne : « Ŋ yaah haa, kon ŋ ɓaahɗi ŋ faan » ɗah, ineem miniɗ tah po wa ɓaahuu ŋ faani e ?
16 Nof woyeen ne : « Ŋ has haa, kon ŋ ɓaahɗi ŋ faan », ineem miniɗ tah po wa ɓaahuu ŋ faani e ?
17 Faan jen nikee has ɗah, kerah heeɗi raake. Faan jen nikee nof ɗah, ɓo' heeɗi mine yeg eeñ.
18 Waaye a Kooh deg cir nu nik ŋ faan findi a waaɗoha.
19 Nikee ne faani nikee cir yino dong ɗah, wa heen nike faan e ?
20 Cir ci laayiɗ, waaye ca faan yino kong.
21 Kon has minɗi woo yaah ne : « Ŋ etohɗi ɗa, » te haf minɗi woo kot ci ne : « Ŋ etohɗi ɗu. »
22 Te ŋ ɓaat nga sah, cir ci ɓoo amb ne caɗ uup raakaaɗi hatil ngaŋ faan, faan etohiɗ ca.
23 Ci ɓoo amb ne ca heefu heefu ŋ faan, ceɗ ɓoo uup eɗ cir ; ci supuk woyu, ceɗ ɓoo na uupe taambkoh.
24 Ci supukɗi woyu etohɗi ineem. Kooh haɓɗoh faan an : cir ci uup heefu, ceɗ uup eɗu cir.
25 A tumiɗ ineem ne saɓsukoh raakuu ŋ harmban ca, waaye ca jen, waa nu nga ambohee morom wa.
26 Yino nga ca miskassee ɗah, ci tas jen ɓaah miskiɗi naa. Yino nga ca yakɗu ɗah, ci tas jen ɓaah sum ki naa.
27 E ɗu faaniŋ Kiristaani, yaa nu nga ɗu ɗah, a cir ngaŋ faani.
28 Kooh tufkiɗohoh ɓi Janguuni ɗaa : A adgiɗ Apootar ci, a degga nga ɓi a na woye taamboh nga ɓa, a degga jangɗohoh ci nga. Ɓi na tume in feyohiɗ deguusa nga, a degga nga ɓi a on ne ɓa min wirɗoh, a degga nga ɓi na ɓaatɗohe ɓooɓi, a degga nga ɓi na adgohe, a degga nga ɓi na jombe ŋ peɗeem ci ɓa inahɗi.
29 Ɓooɓi jen Apootar haa. Kooh na woye taamboh ŋ ɓooɓi jen haa. Ɓooɓi jen jangɗohoh haa. E ɓooɓi jen na tume in feyohiɗ haa.
30 E ɓooɓi jen onu ne ɓa min wirɗoh haa. E ɓooɓi jen onu ne ɓa min jomb ŋ peɗeem ci ɓa inahɗi haa. Te e ɓooɓi jen onu ne ɓa min tokis peɗeem ceem haa.
31 Kon sawraat ngaŋ raak onoh ci uup baah. Waaye ɗiski wa nik ŋ hey ɗu teeɓe waasi ngisoh fuuf in ceem jen.