10
Wortuk kooh ci nikaaɗiici
1 Ɓaah ciŋ ngo, ŋ waaɗ ne ɗu faɗoh nof ini rahsee caac ciŋ ɓoo Israayel ca : Ɓa jen, ɓa nikee ŋ ooɓ eela, ɓa jen ɓa lahiɗ ŋ ɗooƴ cookma iiri'aaɗi.
2 Ɓa jen, ɓa ɓoktuuɗ ŋ waasiŋMusaa, ŋ ooɓ eela na ŋ ɗooƴ cookma.
3 Ɓa jen ɓa ɓaaheen ñam kañam yino, kañam ka Kooh onee ɓa, wa pulohee Asamaan.
4 Te ɓa jen ɓa nameen ɓaah an anaah yino, anaaha pulohee ŋ Kooh ; weɗ masmi Kooh pulɗohee ŋ atoh fa ɓendee ɓa, te atoh feem nikee Kiristaani.
5 Moona ini uup laay nga ɓa neɓeeɗi Kooh, ɓa kaan ŋ kehƴa hulanga, ɓa faɗuusa nga.
6 In ceem misaal nga ɓoo ne ɓoo maɗuu in baahaaɗi findi caac ceem.
7 Kinaat ñaamuk kooh ci nikaaɗiici, findi ɓi ɓo' nga ɓa tumohee wa ; Fiis ci Hooliɗ ci woyiɗ ne : « Ɓi cuuɓi ɓooffa, ɓa ñameeɗa, ɓa aneeɗa ; ƴutta ɓa kurukka, ɓa mbuumbaayeeɗa. »
8 Ɓoo kinaat faankoh faankoh sangohuuɗ, findi ɓi nga ɓa tumohee wa, tahha po raakka junni-ndaŋkiyaah-kanak na junni-kaahay (23.000) ɓi kaan ŋ mbeh yino.
9 Ɓoo kinaat markisuk Kiristaani, findi ɓi nga ɓa tumohee wa, tahha po ɓa kaaneeɗa sagu iiñ ca.
10 Kinaat lahtuk, findi ɓi ɓo' nga ɓa lahtukohe, tahha po malaakaani na yahrohe, ɗummba ɓa.
11 In ceem jen rahsiɗ ɓa ne ca nik misaal te ca fiisuuɗ ne ca yun ɓoo, ɓoo ɓi teemb na reehiŋ jamanooci.
12 Kon yi liiɓ ne a tufkiɗ, a wortukaat keen !
13 Raakɗi fiiri ɗu jaɗɗu wi ɓo' moosɗi jaɗɗohu. Kooh cariɗ oolku, a teyɗukanɗi ne ɗu jaɗɗassee fiiri uup hatil ciŋ ɗu. Ɗu jaɗɗuusa fiir ɗah, a Kooh na teeɓee ɗu buntaani ɗu min puloh nga ne ɗu raak hatili ɗu muñohana.
14 Ineem weɗ tah, ɗu ɓi ɓaah ciŋ ngo ŋ keeñkoh, nupaat ñaamuk kooh ci nikaaɗiici.
15 Mi na woye na ɓo' ñaañiɗ ; ɗu ŋ haf ɗu liiɓaat baahiɗ ŋ ini mi na hee woye, andi wa keeh, wala wa keeh haa.
16 Kaasiŋ barkeeni ɓoo na corkiɗohe Kooh na ɓekɗohee ɓoo na ñif miŋ Kiristaani aamu. Mbuurndi ɓoo na poɓtohe, wa na ɓekɗohee ɓoo na faaniŋ Kiristaani.
17 Wa mbuuru yino dong. Ini ɓoo na laaye jen, ɓoo nam nik faan yino, laam ɓoo jen na paysohe mbuurndi yinoori.
18 Namaat marak ɓi nik Israayel Israayel ngaŋ rimuk, ɓi na ñame ɓak ŋ ɗoopaat ci seeƴkohu, wa na ɓekɗohee ɓa na seeƴkohaani.
19 Ŋ waaɗ woo ye ŋ ndeem ? Wa keeh ne sepet ci seeƴkohu wuu kooh nikaaɗi, ca in haa, te kooh ceem nam nik in haa.
20 Waaye ini ŋ waaɗ woo, weɗ ne, seeƴuk ceem, ca wuu jiiniici na puuɗis ci na in ci mand ɗaa, waaye ca wuu Kooh haa. Te ŋ waaɗɗi ne ɗu ɓekɗukoh na in ceem.
21 Ɗu minɗi anee ŋ kaasiŋ Heɗi, ɗu anee ŋ kaasiŋ jiiniici. Ɗu minɗi ñamee ŋ kankiŋ Heɗi, ɗu ñamee ŋ kankiŋ jiiniici.
22 Wala ɓoo waaɗ ne Heɗi fiir ? Ɓoo uupiɗ ɗe uupiɗ hatil e ?
In naa nu fu tumee ɗah, yakɗa Kooh nga
23 Raakiɗ ɓi na woye ne e ɓoo raak haf ɓoo, ɓoo miniɗ tum in nu ɓoo waaɗ tum ɗah. Ɓo' miniɗa woo, waaye e in ci jen raakiɗ ɓo' etoh haa. Te ali nik ne ɓo' miniɗ tum ini a waaɗ sah, wa nikɗi haa ne in nu nik weɗ na kaɗɗe ɓooɓi fiki.
24 Ali ɓo' kinaat waak ini baah nga ɗe dong, waaye a waakaat ini baah ŋ morom ce !
25 Ɗu miniɗ ñam sepet ci na toonse jen, wa etohɗi meeksoh, hel ciŋ ɗu dalaat nga.
26 Laam Fiis ci woo ne : « Heɗi a yi raak kehƴi na in ci nik nga jen. »
27 Kosaaɗi ɓeeɗuk ɗu kañam te ɗu waaɗ kaɗ ɗah, ñamaat in nu a eɗ ɗu ɗah, wa etohɗi meeksoh, hel ciŋ ɗu dalaat nga.
28 Waaye ɓo' woo ɗu ne : « Inii wa kañam seeƴkohuuɗ wuu kooh ci » ɗah, kinaat ñam, sagu ɓoyi woo ineem, jaar hel dal.
29 Waaye ŋ woo hel daliɗ ɗah, ɗu tahɗi so woo, a ɓoyeem tah ho woye. Wa carɗi ne ŋ teeɓoh ne ñam raak haf fo, nik ne ɓo' na hee wa hotohe in wiiriis ɗah.
30 Kon ŋ ñamee, ŋ corkiɗee Kooh nga ɗah, wa ye tah ŋ joyya woyu in moɗaaɗi ŋ kañam keem ? Kañam ki fu inah ne ŋ corkiɗiɗ Kooh nga.
31 Mbaa ɗu ñame, wala ɗu ane, wala in nu ɗu min haɓiɗ ɗah, tumaata ne ɗu yakiɗ Kooh.
32 Kinaat tum ali ini min hondoh ɓooɓi pes na Kooh, ɓa nik Yawuut, ɓa nikɗi Yawuut, wala ɓi ŋ Janguuniŋ Kooh.
33 Tumaat findiiso, mi na ndengɗuke ne ŋ tum ini neɓ yaa nu nga ŋ in nu nik. Ŋ waakɗi ini baah nga so, waaye ini baah ŋ ɓi laayiɗ ne ɓa mucɗu.