4
Piyeer na Saaŋ ŋ fiki atte'oh ca
1 Wa Piyeer na Saaŋ woyee na ɓooɓa, weɗ seeƴkiɗoh caŋ waasiŋMusaa hunoh na ƴaara adgohee ɓooɓa niiɗee Kahan Kooh, na ɓi Sadusen, ɓa hayya.
2 Ɓa ayrukka Piyeer na Saaŋ ŋ ini ɓeem jangɗee ɓooɓa, woyeeɗa ɓa ne Yeesu hultiɗ te ɓa ndengɗeeɗa ne kaaniɗ ci hey hulte.
3 Ɓa ammba ɓa, ɓa taƴohaahha ɓa sagu hooɓa Kooh hooɓe.
4 Waaye raak laayiɗ ŋ ɓi kerhee jangɗohiŋ Apootar ci kosiɗ. Ɓi kosee jen, ƴaar ci dong reyeen junni-yatuus (5000).
5 Wa Kooh wiis, weɗ kilifaaca na yakak ca na jangɗohoh caŋ waasiŋ Musaa, ɓi nikee ŋ Yerusalem cohoh.
6 Hannas seeƴkiɗoha yakka nikee nga na Kayif na Saaŋ na Aleksaandar na ɓi kahan seeƴkiɗoha yakka jen.
7 Ɓa nakohha komu Piyeer na Saaŋ ŋ leerooɓa, ɓa meekissa ɓa ne : « Ini ɗu haɓiɗ wii, ɗu haɓɗoha winde hatil ? Ɗu tuma ŋ tiikiŋ ya ɓa ? »
8 Ŋ ndeem, Piyeer riiffa na Fuuɗsi Hoolohngaani, a woosa ɓa ne : « Ɗu ɓi kilifaaciŋ cuuɓi, na yakak ci,
9 nik ne ɓoo na meeksasse woti, ini baahiɗi ɓoo tumiɗ ɓo' lafñiɗ, na findi a wirɗohu ɗah,
10 ɗu jen, na Israayel ci findi ɓa hend jen inhaat ne ɓoo taamboh ŋ tiikiŋ Yeesu Kiristaa yiŋ Nasareet ; saguuce weɗ tah ƴaarii tufkiɗ moɗoɗ ŋ fikiiɗu. Yeesu yeem, e ɗu daaƴ ɗe ŋ kurwaa, waaye Kooh hultiɗiɗ ɗe.
11 Fiis ci Hooliɗ ci woo ŋ a yi ne :
“ Atoh fi ɗu ɓi taɓahoh ci mbete
mirndohiɗ nik
atoh fi amb taɓahi. ”
12 Ali ɓo' minɗi muc, ne wa taambohɗi ŋ Yeesu ɗah. Ŋ Adina jen Kooh eɗoh ɗe dong ne tiikiŋ ɗe min mucɗohu. »
13 Wa ɓa hot kaañi Piyeer na Saaŋ kaañ ini ɓa woye, ɓa feyuusa, laam ɓa inah ɓa ɓo' an rek, ɓo' jangaaɗi. Ɓa inhissa ne ɓa meeɗ hun na Yeesu.
14 Waaye hota ɓa hotee ƴaara wirɗu tufkiɗ ŋ sero Apootar ci kanak ci, tahha po ɓa raakɗi woyaah.
15 Ɓa woosa Piyeer na Saaŋ ne ɓa pulaat ŋ atte'ohaana, atte'oh ca tassa nga ne ɓa hotoh ŋ harmban ɓa.
16 Ɓa woosa ne : « Ɓoo tuman ƴaaɓii na ? Ɓa haɓɗiɗ keemaan hooliɗ te ɓi Yerusalem jen inhiɗa, ɓoo minɗaa taas.
17 Waaye wa joyɗi ɓaat pasarkoh ŋ harmban ɓooɓi, kon ɓoo huflukaat ɓa po ɓa woyissuu na ali ɓo' ŋ ini kaɗ ŋ tiikiŋ ƴaareem. »
18 Ɓa ɓeeɗukka Piyeer na Saaŋ, ɓa sangohha ɓa keeh-keeh ne ɓa kinaat woyis wala ɓa jangɗohee ŋ tiikiŋ Yeesu.
19 Waaye Piyeer na Saaŋ loffa ɓa ne : « Wa ye weɗ yurah ŋ has ciŋ Kooh, kerhiɗ ɗu wala kerhiɗ Kooh ? Atte'aat !
20 Ini kaɗ nga ɓoo, ɓoo minɗi ɗek ini ɓoo hot, kerahhaa. »
21 Atte'oh ca ɓaatta hufluk Piyeer na Saaŋ, ɓa faɗissa ɓa, ɓa raakeeɗi waas nga ɓa ne ɓa tum ɓa miskiɗ laam ɓooɓa jen nikee yakɗeeɗa Kooh ŋ ini raakee weem.
22 Ƴaara wirɗassee wirɗa feyohɗa uupɗeen kiis ndaŋkiyaah-nikiis (40).
Kosiɗ ci kiimiɗ Kooh
23 Wa Piyeer na Saaŋ faɗsu, ɓa kaɗta ŋ huntoh caŋ ɓa, ɓa naandsukka ɓa in ca kilifaacaŋ seeƴkiɗoh ca na yakak ca woo ɓa jen.
24 Wa ɓa kerah ineem, ɓa jen ɓa hunnda ɓa kiimeeɗa Kooh an : « Heɗ ɓoo, a fu fer Eel ci na kehƴi na cookmi na in ci nik nga ca jen.
25 A fu eɗ Dawuuda Fuuɗsi Hoolohngaani, Dawuuda, yi caaciŋ ɓoo, surgaaniŋ ɗa. Fu taambohha nga ɗe, fu woosa ne :
“ Wa ye tah cuuɓ ci ɗuuɗe ?
Wa ye tah
ɓooɓi waakohee ne ɓa tum in baahaaɗi
ŋ ɓarang ɓarang ?
26 Buur ciŋ kehƴi
na kooɗkiɗe hiñoh,
ɓi raak hatil hun ne
ɓa hiñoh na Heɗ ɓoo
na buuri a tufkiɗ. ”
27 Laam wa keeh ne Herod Antipas na Ponse Pilaat ambsukohiɗ ŋ kur-taahii, ɓa hunnda na cuuɓ ci cinooci na Israayel ci jen ne ɓa hiñoh Yeesu, surgaaniŋ ɗa hooliɗi, yi fu tufkiɗ.
28 Ɓa na tume in ci fu kooɗkiɗee maañiɗ ŋ hatiliŋ ɗa, ŋ ini neɓ ɗa.
29 Ɗiski wa nik ndii, Heɗ ɓoo, marka findi ɓa na huflukohee ɓoo. Ona ɓoo, ɓi ñaam ciŋ ɗa, ɓoo yegɗoh woo kiŋ ɗa te ɓoo neƴƴohuu nga.
30 Raɗsa hatiliŋ yaahiŋ ɗa ne wir raak na ɓi firnde na keemaan ŋ tiikiŋ Yeesu surgaaniŋ ɗa hooliɗi. »
31 Wa ɓa ƴut kiim Kooh, ɗiska ɓa cohee yoondeeɗa. Ɓa jen, ɓa riiffa na Fuuɗsi Hoolohngaani, ɓa yegɗoheeɗa woo kiŋ Kooh te ɓa neƴƴoheeɗi nga.
Kosiɗ ca ɓaahiɗ in caŋ ɓa
32 Ɓooɓa kosee jen hunnda, nikka yino, ɓeɗ ɓaahee keeñ yino na liiɓohaaɗ. Ali ɓo' woyeeɗi nga ɓa ne raak-raakiŋ ɗe, a yi raaka kiik ce, waaye ɓa ambsohee ambsoh in caŋ ɓa jen yino.
33 Apootar ci seede'eeɗa na hatil keeh-keeh, ne Heɗ ɓoo Yeesu hultiɗ, te Kooh baahoheeɗa ɓa keeh-keeh yaa nu nga ɗah.
34 Ali ɓo' nga ɓa ñakeeɗi. Ɓi raakee yohon na kahan tooneeɗa ca, ɓa ɓayya candooma,
35 ɓa deggaa ŋ yaah ciŋ Apootar ci, wa paysohuusa, yaa nu nga eɗuusa in hend na ini a etoh.
36 Raakeen ƴaar nga ɓa teeku Suseef, a ɓaahee ŋ Lewiici, a nikee ɓo' Siipar. Apootar ci teekee ɗe Barnabaas, wa tokis "ƴaari na ñaahe ɓooɓi".
37 A toonnda yohon ce, a ɓayya kopora, a deggaa ŋ yaah ciŋ Apootar ci.