23
1 Pool marakka ɓooɓaŋ saangna, a woosa ne : « Ɓaah ciŋ ngo, ina ŋ camboh po woti, maa pese ŋ fiki Kooh na hel daliɗ. »
2 Weɗ Anañaas, seeƴkiɗoha yakka nakoh ɓa nikee ŋ sero Pool ne ɓa laɓaat ɗe ŋ nguɓ.
3 Ŋ ineem, Pool woosa ɗe ne : « A Kooh laɓan ɗa, fu mandiɗ nga haa miir yaanwiɗuuɗ ! Fu nik ndii ne fu attee so findi waasi nakoha, waaye weɗi fu ɗaliɗ waasi, ŋ ini fu nakoh ne ŋ laɓsaat ! »
4 Ɓi nikee ŋ sero Pool woosa ɗe ne : « Fu na ɓase seeƴkiɗohi yakki, yiŋ Kooh ! »
5 Pool loffa ne : « Ɓaah ciŋ ngo, ŋ inheeɗi ne a seeƴkiɗohi yakki. Fiis ci woyiɗ ne : “ Kina woo yi adgoh cuuɓiŋ ɗa in moɗaaɗi. ” »
6 Pool inheen ne ɓooɓa ɓaah ŋ saangnaŋ yakak ca, ɓakii nikee Sadusen, ɓakum nikka Farisen, weɗ tah a leehukka ŋ ɗafka ne : « Ɓaah ciŋ ngo, ŋ Farisen, ŋ kuɓu Farisen. A oolki ŋ ooluk ne kaaniɗ ci hey hulte weɗ tah ho atte'se. »
7 Wa a woo inaam Farisen ca na Sadusen ca lahtoheeɗa, ɓa paysukohha.
8 Sadusen ci na woye ne hulit raakɗi, malaaka na jiiniici na in ci mand na ca namɗi raak waaye Farisen ci kos ne in ceem jen raakiɗ.
9 Woo ka kurukka ŋ ɗafka. Ɓi jangɗohoh, ɓaah ŋ Farisen ca, kurukka sannga tic, ɓa woosa ne : « Ɓoo hotɗi ali in moɗaaɗi ŋ ƴaarii ! Nik ne a jiini wala malaaka woo na ɗe ɗah nak ? »
10 Lahtoha misikka lool po kilifaanaŋ soldaar ca neƴƴohha ne Pool sifiñsohu. Weɗ tah a nakka soldaar ca ne ɓa ruhsaat nga ɓa, ɓa kooɗoh Pool nga, ɓa dokin ɗe ŋ kahna.
11 Ŋ weka, Heɗi hayya, tufukka ŋ sero Pool, woosa ɗe ne : « Ndengɗuka, findi fu seede'oh ho ndii ŋ Yerusalem, fu joyiɗ to nam seede'oh ɗaa ŋ Rom. »
Yawuut ca waakohiɗ ne ɓa ap Pool
12 Wa Kooh wiis, ɓi Yawuut waakohha, ɓa ginnja ne feeh ɓa apɗi Pool ɗah, ɓa ñamanɗi, ɓa ananɗi.
13 Ini uup ƴaar ndaŋkiyaah-nikiis (40) ɓeɗ giñee giñeem.
14 Ɓa kaɗta ŋ kilifaacaŋ seeƴkiɗoh caŋ waasiŋMusaa na yakak ca, ɓa woosa ɓa ne : « Ɓoo giñiɗ ne feeh ɓoo apɗi Pool ɗah, ɓoo ñamanɗi, ɓoo ananɗi, te ɓoo tumɗaa ɗah, Kooh alkaat ɓoo.
15 Ɗu nak, hunaat na ɓi saangniŋ yakak ci, ɗu kiim kilifaanaŋ soldaar ca a eɗ ɗu Pool, wa mandaat ne ɗu waaɗ ɓaat marak in ciŋ ɗe. Ini kaɗ nga ɓoo, ɓoo ƴutiɗ ne ɓoo ap ɗe bala a reyan ndii ɗah. »
16 Waaye kuɓki ƴaariŋ taambɗoh Pool ɓitiɓ kerahha jo'a ɓa waaɗee jo' Pool, a kaɗta kahan soldaar ca, a aassa, a woosa ɗe wa.
17 Pool ɓeeɗukka yino ŋ ɓi adgoh soldaar ca, a woosa ɗe ne : « Ɓenda komaakndii ŋ kilifaaniŋ ɗu, raakiɗ ini a waaɗ ɗe woo. »
18 Soldaara ɓayya komaaknda ŋ kilifaana, a woosa ɗe ne : « Pool yi ambu, a yi ɓeeɗuk ko, a kiimmba so ne ŋ ɓay komaakndii nga ɗa ; an raakiɗ ini a waaɗ ɗa woo. »
19 Kilifaanaŋ soldaar ca ammba komaaknda ŋ yaah, a usɗukka na ɗe, a meekissa ɗe ne : « Fu hay yo ye woye ? »
20 A loffa ne : « Yawuut ci kerhiɗohiɗ ne ɓa meekis ɗa Pool kim, fu kom ɓa ɗe ŋ saangnaŋ yakak ca. Wa na hee mande ne ɓa waaɗ markis baahiɗ ini kaɗ nga ɗe.
21 Waaye kina ɓa kos, ini uup ƴaar ndaŋkiyaah-nikiis (40) hey ɗe jo'e. Ɓa giñiɗ ne feeh ɓa apɗi ɗe ɗah, ɓa ñamanɗi, ɓa ananɗi. Ɓa ƴutiɗ, ɓa na seke ne fu teyɗuk. »
22 Kilifaanaŋ soldaar ca dennga komaaknda ne : « Kina woo ali ɓo' ne fu woyiɗ to inii ! » Ƴutta a woosa ɗe ne a cootaat.
Pool cootɗuuɗ Seesare
23 Wa komaaknda coot, kilifaana ɓeeɗukka kanak ŋ ɓa adgohee soldaar ca, a woosa ɓa ne : « Nangɗohaat soldaar teemet-kanak (200), ɗu nam nangɗoh soldaar ndaŋkiyaah-yasna-kanak (70) ŋ ɓi na rape panis ci, na soldaar teemet-kanak (200) ŋ heɗ salmaaci. Kooɗkaat ɗu kaɗ Seesare wahtu yasna-nikiis na weki.
24 Tokɗiɗaat Pool ɓi panis, ɗu ɓay ɗe po ŋ goornoor Feliksa te ali in kinaat ɗe rahas. »
25 A fiissa kayit a woosa inii :
26 « Goornoor Feliksa,
mi yii kañiɗ ɗa kilifaani, mi yi Kolod Lisiyas.
27 Ƴaari mi na komee ɗa yii, a Yawuut ci ambee ɗe. Wi ɓa kaɗ po ɓa heeɗa ɗe ape, ŋ hayya na soldaar ciŋ ngo, ŋ naaffa ɗe wi ŋ inah ne a ɓo' Rom.
28 Ŋ waaɗta inah ini ɓa yambee ɗe, tahha po ŋ ɓayya ɗe saangnaŋ yakak caŋ ɓa.
29 Ŋ hotiɗ ne in ci ɓa yambee ɗe, wa ini kaɗ ŋ waasiŋ ɓa, waaye raakɗi ini a tum ŋ in ci ɓa yambee ɗe po wa joyya ɗe tah apu wala a taƴu.
30 Ŋ woyuuɗ nak ne Yawuut ci ɓa ɗii waakoh ɗe ne ɓa ap ɗe. Weɗ tah ŋ komeeɗa ɗe ŋ saasi-saasi, te ŋ teeɓiɗ ɓi na yambee ɗe ne ɓa joy ngeloh na ɗe ŋ ɗiskiŋ ɗa. »
31 Soldaar ca tummba ina ɓa naku, ɓa ɓayya Pool ŋ weka, ɓa kaɗta na ɗe po Antipatiris.
32 Wa Kooh wiis, soldaar ca tiindee dokukka kahnaŋ ɓa, ɓa faɗta rapoh panis ca, ɓeem taalndiɗta na Pool.
33 Wa ɓa ree Seesare, rapoh panis ca eɗta Goornoora ina fiisu, ɓa eɗta ɗe Pool.
34 Goornoora jannga ina fiisu, a meekissa Pool ɗiski a puloh. Wa a inah ne a puloh Silisi,
35 a woosa ɗe ne : « Ɓi na yambee ɗa hay ɗah, ŋ hey ɗa ɓaate meekis. » A nakohha ne Pool ɗaaksaat a niiɗassee ŋ taɓaha na woyse kahan buur Herod.