Tum ciŋ Apootar ci
Rangsohaani
Teerndi na woyse "Tum ciŋ Apootar ci", e Luk fiisa. Luk ɓaaheeɗi ŋ Apootar ciŋ Yeesu. A nikee paƴoh. A yi dong nikɗi Yawuut ŋ ɓooɓi fiis Biibali. A koc fiis teerndi na woyse "Yegɗohiŋ Muci Luk Fiis", ŋ ini kaɗ ŋ kipes kiŋ Yeesu na kakaan kiŋ ɗe na hultiŋ ɗe. Ne a fiis ineem, a meeksee ɓooɓi meeɗ hun na Yeesu, ɓa woosa ɗe findi yeem pesohee po wa ñiinnda nga ɗe. Ƴutta a fiisiɗta ƴaar na woyse Tewofiil.
"Tum ciŋ Apootar ci" wii, weɗ teerndi a kanakɗoh fiis, wa taalndiɗ in ci a naandsuk ŋ teerndiŋ ɗe koc.
Ini kaɗ ŋ ɓaki koc, a tum findi a tumohee ŋ teerndiŋ ɗe koc, maanaam meekis ɓi maasoh in ca raake. Ini kooɗoh ŋ saar 16, aaya 10, a uupee nik na Pool, yi nam teeku Sool, kon ini uup ŋ ɓaki kanakɗoh ŋ teerndi, a maasohiɗ in ci a naandsuk.
Wa a ɗiindoh teerndi, a woosoha Tewofiil, findi a tumoh ŋ wa koc.
Teerndi na naandsuke cambi na ɓaatkiŋ Janguuni, mboolndiŋ ɓi kosee Yeesu. Wa na naandsuke findi Apootar ci Yegɗoh Muci, na in ci feyohiɗ ci na firndeeci Kooh tum taamboh ŋ Apootar ci na kosiɗ ci ɓinooɓi. Ŋ tumohaaɗ ceem, raakiɗ ɓi neɓsee nga, raakka ɓi neɓseeɗi nga, ɓo' laayiɗ tolfiɗuuɗ nga, po ɓum sah, wa mineen ɓa ɓay kakaan. Ŋ ɗooƴ teerndii, yegɗohi kaɗ ŋ Yeesu pasarsohuuɗ ini kooɗoh Yerusalem taambohha ŋ kur laayiɗ po ŋ Rom, te ɗisik nu woo keem kerhasseen ɗah, raakiɗ ɓooɓa kose.
Teerndiŋ Tum ciŋ Apootar ci kaɗtiɗoh an :
- Hultiŋ Yeesu po rapɗuukiŋ ɗe ŋ Asamaan 1:1-11
- Jamanooni Apootar ci sekohe1:12-26
- Fuuɗsi Hoolohngaani hayiɗ 2:1-41
- Kipes kiŋ kosiɗ ci koc 2:42–7:60
- Tolfiɗi miskiɗ, Sool mirndohiɗ kos Yeesu 8:1–12:25
- Ɓaaɓiŋ Pool yakki koc 13–14
- Cohaŋ Yerusalem 15:1-39
- Ɓaaɓiŋ Pool yakki kanakɗoh 15:40–18:22
- Ɓaaɓiŋ Pool yakki kaahayɗoh 18:23–21:26
- Ɓi Rom ambiɗ Pool, ɓayya ɗe po Rom 21:27–28:31
1
Fuuɗsi Hoolohngaani Apootar ci gapse
1 Tewofiil ƴaariŋ ngo, mi yii kañiɗ ɗa. Ŋ teerndiŋ ngo ŋ koc fiis, ŋ woyiɗ in ci Yeesu tumee na ci a jangɗohee ŋ cambohaana,
2 po mbeha a rapɗohu ŋ Eel ci. Bala a rapan ɗah, a eɗta Apootar ci a kooɗe nakoh ciŋ ɗe, taamboh ŋ Fuuɗsi Hoolohngaani, Fuuɗsiŋ Kooh.
3 Ŋ finho kakaan kiŋ ɗe, a teeɓpa ɓa haf ce, a teeɓpa ɓa ŋ firnde laayiɗ ne a yii pes. A tummba po ɓa hoteeɗa ɗe, a woyeeɗa na ɓa ŋ ini kaɗ ŋ Nguuriŋ-Kooh, po wa mitta neeh ndaŋkiyaah-nikiis (40).
4 Wa raakka mbeh nga, a ɓooffa a ñameeɗa na ɓa, a eɗta ɓa dengkohii an : « Kinaat pul Yerusalem, sekaat ini Baabi gapohe, wi ŋ woyee ɗu.
5 Laam Yahya ɓoktohee na masuɓ, waaye ndii na ɓi neeh, ɗu hey ɓoktasse na Fuuɗsi Hoolohngaani. »
6 Ɓooɓa cohee ŋ ɗiska meekissa Yeesu ne : « Heɗ ɓoo, andi jamanoonii weɗ fu na hee tufkiɗohisse Nguuriŋ Israayel ? »
7 A loffa ɓa ne : « Ɗu onuuɗi ne ɗu inah jamanooni wala wahtuuni in ceem hayohan. A Baabi ŋ haf ce a yi gap mbehiŋ ca ŋ ini neɓ ɗe.
8 Waaye Fuuɗsi Hoolohngaani ruhus nga ɗu ɗah, ɗu hey rahse hatil te ɗu hey nike seedeeciŋ ngo ŋ Yerusalem, na ŋ kur caŋ Yudee jen na caŋ Samari jen po ɗiska Adina top. »
9 Wa Yeesu woo po ƴutta, a rapɗasseeɗa Asamaan ŋ has ciŋ ɓa, eel hayya ulla ɗe, ɓa hotisɗi ɗe.
10 Wa ɓa ris marak rapɗuukaŋ Yeesu, jaarra ƴaar kanak ɓekuk kulɓa yaanow nikka ŋ serooɓa,
11 woosa ɓa ne : « Ƴaaɓiŋ Galileeci, wa ye tah ɗu tufuk, ɗu markee ŋ eel ci ? Yeesu yii, yi kooɗohu nga ɗu, cootta ŋ Eel ci, hey hayisse findi ɗu hotoh ɗe kaɗeeɗa ŋ Eel ci. »
Macaas kooɗuuɗ ne a namsiɗ Yudaa
12 Apootar ci kurkohha ɗiska ɓa nikee, ŋ tangoora na woyse Tangooraŋ-Oliiw-ca, ɓa dokukka Yerusalem. Harmban wa na Yerusalem nikee ŋ ɓak kilomeet yino.
13 Wa ɓa ree, ɓa kaɗta ŋ tuuƴa uup ɗafuk ŋ kahna, ɗiska ɓa na dale. Ɓa nikee Piyeer, Saaŋ, Saak na Andare, Filip na Tomaa, Bartalemi na Macce, Saak kuɓkiŋ Alfe, Simong Seloti na Yudaa kuɓkiŋ Saak.
14 Ɓeɗ jen, na ɓi ɓitiɓ na Maryaama yaayiŋ Yeesu, na taambɗoh ciŋ Yeesu ƴaar ci, ɓeɗ meeɗ coh ne ɓa hun ɓa kiimee Kooh ŋ liiɓohaaɗ yino.
15 Ŋ neeh caam, Piyeer nikee na kosiɗ ca cohee ŋ ɗiska, - ɓa nikeen ŋ ɓak teemet na ndaŋkiyaah-kanak (120) - a tufukka, a woosa ɓa ne :
16 « Ɓaah ciŋ ngo, ini Fuuɗsi Hoolohngaani woyee ŋ Fiis ci Hooliɗ ci taamboh ŋ nguɓiŋ Dawuuda te wa joyya nik, wa raakiɗ, weɗ ini kaɗ ŋ Yudaa yi ɓayee ɓooɓi hayee ne ɓa amb Yeesu.
17 A ɓaahee nga ɓoo te a raakeen ɓak ŋ pangki ɓoo eɗu. »
18 Ŋ ini Piyeer woo weem, kopori Yudaa rahsoh ŋ tumohaaɗaŋ ɗe moɗaaɗiina, a romoha yohon, a keennda ŋ yohna, hafiŋ ɗe adugka, rookiŋ ɗe pookka, liir ciŋ ɗe jen aamukka.
19 Ɓi Yerusalem jen kerheen ineem weɗ tah ɓa teekee yohneem "Akeldama" ŋ peɗmiŋ ɓa, wa tokis "yohon ñif".
20 Piyeer degga nga ne : « Wa fiisuuɗ ŋ teerndiŋ Sabuur ne :
“ Kahan ce nikaat hulang,
ali ɓo' kinaat gen nga ! ”
Fiis ci woyissiɗ ne :
“ Ɓo' wiiriis ɓayaat
ɓakiŋ ɗe ŋ pangki. ”
21 Kon book ɓoo joyiɗ kooɗ ƴaar yino, ŋ ɓi meeɗ hun na ɓoo ŋ jamanoona Heɗ ɓoo Yeesu nikoh na ɓoo,
22 ini kooɗoh wa Yahya ɓokit ɗe po findi a kooɗohu nga ɓoo. Ɓoyeem joy hun na ɓoo, ne a seede'ee hultiŋ Yeesu. »
23 Ŋ ineem, ɓa ɓayya ɓo' kanak : Suseef yi na woyse Barsabaas te a nammba tapu Yustus, na ƴaari na woyse Macaas.
24 Ŋ ndeem, ɓa kiimeeɗa Kooh an : « Heɗ ɓoo, fu yi inah keeñ ciŋ ɓooɓi jen, teeɓoha yi fu kooɗ ŋ ɓooɓi kanak cii,
25 ne a ɓay panguk Apootar, wi Yudaa faɗ a kaɗta ɗiska a joy nik. »
26 Weɗ ɓa ɓayoh atoh ne ɓa marak ɓoyi Kooh kooɗ, wa hennda ŋ Macaas. A ɓaatuusa ŋ Apootar ci ndaŋkiyaah na yinooci (11).