9
Vina Kilasadi ri na Popoa Nomadi pa Varilikohaena Izireli
1 Sa zinama te Zihova si va kari ia sa popoa pa Hadaraki
meke kote la kamo pa Damasikasi,
ura sari matadi rina tie meke doduru butubutu pa Izireli si koe Zihova,
2 meke pa Hamati tugo, sapu voloso ia si asa,
meke pa Taea meke Saedoni, be vea bokaboka gua si arini.
3 Taea si kuri ia keke nana vasina ta goba va ṉiṉirana;
ele va kobi veko ia sa sa siliva guana kavuru,
meke qolo si guana kavuru pa sisiraṉa.
4 Ba kote vagi pani e Zihova sari nana tinago
meke huara pania sa nana ṉiniraṉira pa kolo lamana,
meke kote ta sulu palae pa nika si asa.
5 Kote dogoria Asikeloni sapu gua asa meke matagutu;
Qaza si kote pekutu lamae pa tinasigiti,
meke Ekoroni tugo, na lopu kote gorevura sapu aqa nia sa.
E Qaza si kote mate nana baṉara,
meke Asikeloni si kote ivulu.
6 Ari tie karovodi kote koa ia sa popoa Asidodi,
meke kote va noso ia Rau sa vinahesi pule tadi pa Pilisitia.
7 Sa ehara koasa masa kurukuru pa ṉuzudia si kote vagi pania Rau,
meke sari ginani bonidi pa livodia.
Sarini pu koa hola si kote te Tamasa
meke kote ta evaṉae na tie tuturaṉa si arini pa Ziuda,
meke Ekoroni si kote gua ari na tie Zebusaiti.
8 Ba kote lavelave nia Arau sari na Qua tinoni
koari na qeto minate varipera.
Lopu kote tava kilasa pule pa kana si arini,
ura Arau kamahire si kopu totoko ni.
Sa Baṉara sapu Kote Mae
9 Kei gamu na tinoni pa Zaione, mi koa qetuqetu!
Kei gamu pa Zerusalema, mi kukili vala beto!
Doṉo la, sa mia Baṉara si korapa mae koa gamu,
toṉotona meke na hinarupu si tago ia Sa
va pepekae meke koi Nana pa keke tuna doṉ'ki.
10 Kote vagi pani Rau sari totopili varipera pa Iparemi
meke sari hose varipera pa Zerusalema,
meke sa bokala varipera si kote ta moku palae.
Asa kote tozi vura nia sa binule koari na butubutu.
Sa Nana binaṉara si kote podalae pa Kolo Matena kamo la koasa lamana pa Meditareniani,
meke podalae pa Ovuku Iuparetisi kamo la koari na hukihukirina sa popoa pepeso.
Lavelave ni Zihova sari Nana Tinoni
11 Koa gua koa sa ehara koasa Qua Vinariva Egoi koa gamu,
si kote rupahi Arau sari mia tie pu koa ta pusi pa pou loke kolona.
12 Pule la koari mia vasileana ta gobadi, gamu na tie ta pusi mia pu raṉea se Zihova;
kamahire ba hiva tozi vura nia Arau sapu kote poni puleni gamu Rau karua totoso tu hola nia sapu tatasana.
13 Kote pebili ia Rau se Ziuda gua sapu maloso Qua bokala
meke veko la nia se Iparemi guana Qua tupi.
Ke Zaione, kote va gevuri Rau sari tumu koreo,
meke tavete guni nigo na vedara tana varane,
pude raza i sari tumu koreo, agoi Qurisi.
14 Meke kote vura la koa rini se Zihova;
sa Nana tupi si kote malakapi guana kapi.
Kote ivu ia e Zihova, sa Baṉara, sa buki;
meke kote ene mataqara nuquru ia Sa sa raneboṉi mae gua pa kali matao,
15 meke kote lavelave ni e Zihova Tadi na Qeto Minate.
Kote huhuara si arini
meke mataqara, meke kote buli ni patu nomadi rini sari kana.
Kote varipera meke vevehe guana sapu napodi vaeni tu;
kote va zoloro soku ehara tadina kana si arini gua sapu tava siṉi pa baolo
sapu hoke siburu ni rini pa hope.
16 E Zihova dia Tamasa kote harupi koasa rane asa
gua sa sepati koari nana rovana sipi.
Kote pinopinoro si arini pa Nana popoa
guari na patu ṉedala koasa toropae baṉara.
17 Na kote tolavaedi meke leleadi si arini!
Na kiko huiti kote va masiqara i sari na tie vaqura,
meke na vaeni vaqura si koari na vineki vaqura.