4
Ta Saputu Vagi sa Bokese Vinariva Egoi
1 Koa sa totoso asa si varigara sari na tie Pilisitia pude varipera koari na tie Izireli gua, ke topue la sari na tie Izireli pude la varipera koa rini. Va turu i ri na tie Izireli sari dia ipi pa Ebeneza meke sari na tie Pilisitia si pa Apeka.
2 Rapata sari na tie Pilisitia, meke sipu ṉiṉira sa vinaripera si va kilasi rini sari na tie Izireli, meke tata ka made tina tie si va mate i rini pa vinaripera.
3 Sipu pule mae pa dia vasina sari na tie pu toa, si zama sari na koimata tadi na tie Izireli, “Na vegua ke va malumu mae i tu Zihova sari na tie Pilisitia pude va kilasa gita pa rane hie? Aria mada la palekia gana sa Bokese Vinariva Egoi te Zihova pa Saelo, pude mani luli koa gita pude harupu gita koari na nada kana,” gua.
4 Ke garunu lani pa Saelo rini kaiqa rina tie meke vagia rini sa Bokese Vinariva Egoi te Zihova Tadi na Qeto Minate sapu sa Nana habohabotuana Baṉara panaulu pa varikorapadi rina mateana koasa Bokese. Meke sari karu tuna e Ilai, ari Hopini meke Pinehasi si somana lulia tugo sa Bokese Vinariva Egoi.
5 Sipu kamo tugo sa Bokese Vinariva Egoi hie, si vala betoa ri na tie Izireli sa kukili qetu, ke madidiri tu sa pepeso.
6 Avosia ri na tie Pilisitia sa kinukili meke zama, “Avoso latu sa kinukili pa vasina tadi na tie Hiburu! Na sa ginuana sia?” Meke sipu gilania rini ginuana sapu ele kamo sa Bokese Vinariva Egoi te Zihova koasa vasina tadi na tie Hiburu, gua,
7 si matagutu si arini; meke zama, “Keke Tamasa si ele kamo koasa dia vasina gua! Tinasuna si kamo koa gita kamahire! Sina loke tiṉitoṉa si ele ta evaṉa guahe koa gita visoroihe!
8 Esei kaqu boka harupu gita koari na tamasa ṉiṉiradi sara? Arini mo sari na tamasa pu seke va matedi sari na tie Izipi pa popoa qega!
9 Mi koa varane gamu na tie Pilisitia! Varipera guana tie, sina kote ta evaṉae pinausu mo tadi na tie Hiburu si gita, kekeṉoṉo gua sapu ele nada pinausu mo gita si arini. Ke varipera va ṉiṉira guana tie.”
10 Ke varipera va ṉiṉira sari na tie Pilisitia, meke va kilasi rini sari na tie Izireli, ke govete pule la pa dia popoa. Na mate eoṉo si ta evaṉa: ka toloṉavulu puta tina tie varipera pa Izireli si mate.
11 Ta vagi tugo sa Bokese Vinariva Egoi te Tamasa, meke sari karua tuna e Ilai, Hopini meke Pinehasi, ba mate tugo.
Sa Minate te Ilai
12 Keke tie pa butubutu te Benisimane si podalae haqala tu pa vasina pu variperai rini, meke kamo la tu pa Saelo koasa rane tugo asa. Pude vata dogoro nia sa nana tinalotaṉa gua, si rikati sa sari nana poko meke binu nia pepeso sa sa batuna.
13 Se Ilai, sapu talotaṉa hola nia sa sa Bokese Vinariva Egoi, si korapa habotu hakehakei pa nana habohabotuana pa kali siraṉa. Urahae nia sa tie sa inavoso koasa vasileana nomana, ke kabo beto pa minatagutu sari doduru tie.
14 Avosia Ilai sa ṉinoveoro, ke nanasa si asa, “Na sa ginuana sa ṉinoveoro hie?” Tuturei la si keke tie koe Ilai pude tozi nia sa inavoso.
15 Se Ilai si ka sia ṉavulu vesu vuahenina meke tata lopu dodogorae hokara si asa.
16 Zama sa tie, “Arau si govetequ pa vinaripera, meke haqala pule toṉoto mae mo tani ṉinoroi.”
Nanasia Ilai si asa, “Tuqu, nasa si ta evaṉa?”
17 Olaṉa sa tie paleke inavoso, “Govete ni ri na tie Izireli sari na tie Pilisitia, na va kilasa va kaleana gami rini si gami! Keke pule, si sari na tumu koreo sari Hopini meke Pinehasi ba mate tugo, meke sa Bokese Vinariva Egoi ba ta saputu vagi tugo!” gua si asa.
18 Sipu poza ia tugo sa tie sa Bokese Vinariva Egoi, si hoqa pule gua pa mudina se Ilai pa kapa sasada. Na barogoso sisigiti si asa, meke noboko tugo, ke hoqa ṉoto nia meke mate. Koa na koimata pa Izireli si asa ka made ṉavulu puta vuaheni.
Sa Minate tanisa Nabokona e Pineasi
19 Sa roana e Ilai, sa barikaleqe te Pinehasi si aritiana, meke tata hokara sa nana totoso pude podoa sa sa tuna. Sipu avoso nia tugo sa sapu ta saputu vagi sa sa Bokese Vinariva Egoi, meke mate tugo sa roana meke sa loana gua, si podalae ta sigiti va hodaka mo si asa, meke podopodo.
20 Sipu korapa ta sigiti sa, si zama la ia sa barikaleqe sapu toka nia si asa, “Mu varane! Na tumu koreo!” gua. Ba lopu va gunagunana pude avosia na olaṉia sa.
21 Poza nia Ikabodi sa sa koreo, sa ginuana si guahe, “Ele taluarae sa Tamasa ṉiṉirana pa Izireli gua.” Zama si asa koasa guguana sapu ta saputu vagi sa Bokese Vinariva Egoi, meke sa minate tanisa roana meke sa loana.
22 Zama si asa, “Taluarae sa Tamasa ṉiṉirana koa gita na tie Izireli gua, sina ta saputu vagi sa Bokese Vinariva Egoi te Tamasa.”