98
Tamasa sa Tie Totoli pa Kasia Popoa
1 Mi kera vahesia se Zihova pa keke kinera vaqurana,
ura ele taveti Sa sari na tinavete variva magasadi.
Ele koa mataqara si Asa
koasa Nana ṉiniraṉira meke koa sa lima madina Tanisa.
2 Ele tozi vura nia e Zihova sa Nana minataqara,
ele vata gilana nia Sa koari doduru butubutu sa Nana tinavete variharupi.
3 Ele kopu nia Sa sa Nana vina tatara koari na tie Izireli,
pa Nana tataru nabuna koasa Nana vinariva egoi.
Sari na tinoni pa doduru ia ka ia si kaqu dogoria sa Nana tinaharupu.
4 Mi kera qetuqetu hola koe Zihova, gamu doduru pa popoa pepeso;
mi vahesia si Asa koari na kinera, mi velavela pa qinetuqetu!
5 Kera vahesia se Zihova,
mi vahesia koari na mike.
6 Mi ivui sari na ivivu meke na buki,
mi velavela pa qinetuqetu pa kenuna e Zihova sa nada Baṉara.
7 Mani ovaṉa sa kolo lamana meke kera sari doduru tiṉitoṉa pu koadi vasina,
sa pepeso, meke sari doduru pu koadi vasina.
8 Gamu na ovuku, mi koa qetuqetu gua rina tinoni pu popohara ni limadia,
sari na toqere si madi keke gua kera qetuqetu pa kenuna.
9 Madi kera pa kenuna e Zihova,
ura Asa si mae varipitui nia sa kasia popoa pa tinoṉoto,
meke lopu toka kale si Asa.