81
Kinerana sa Inevaṉa
(Keke kinera te Asapa)
1 Mada kera va ululae la koa sa Tamasa, sa nada ṉiniraṉira.
Mada velavela qetuqetu la koasa Tamasa te Zekopi!
2 Podalae nia sa kinera, kizai sari na belo,
ivui sari na ivivu, na mikei sari na mike.
3 Ivui sari na buki pa totoso tada sa sidara,
meke pa totoso hobe rimata koasa rane inevaṉa.
4 Na vinaturu tadi na tie Izireli si hie,
meke na ginarunu tanisa Tamasa te Zekopi.
5 Ponia Tamasa sa tinarae hie koari na tie Izireli
totoso va kilasia Sa sa popoa Izipi.
Avosia rau si keke mamalaiṉi sapu lopu bakala koa rau sapu zama guahe:
6 “Va gore pani Rau sari na pinaleke pa avaramu,
meke vata rupahi Rau sari na limamu koari na pinaleke patu mamatadi.
7 Totoso koa tasuna si gamu, si hata Au gamu, ke harupu gamu Rau.
Pa Qua vasina tomena pa korapa raneboṉi si olaṉa atu gamu Rau.
Podeke gamu Rau si gamu pa Meriba, vasina loketoṉa kolo.
8 Gamu na Qua tinoni, mi avoso mae ia sa Qua vina balau.
Kei Izireli, okoro hola nigo rau pude va avoso mae Au.
9 Mu lopu vahesia si keke tamasa votikaena pa korapa mia gamu.
10 Arau se Zihova sa mia Tamasa,
sapu turaṉa vura ni gamu pa popoa Izipi.
Tukeli sari na ṉuzumia, meke kaqu poni gamu Rau.
11 Ba sari na Qua tinoni si lopu hiva va avosau rini,
lopu hiva va tabe au rina Qua tie Izireli si Rau.
12 Gua asa ke va maluara lani mo Rau pude luli rini sari na bulodi pu tasunadi,
pude madi luli sari na dia hiniva soti.
13 Okoro hola ni Rau pude va avoso Au rini,
meke okoro hola ni Rau pude va tabe Au rini!
14 Meke kaqu tuturei va kilasi Rau sari na dia kana,
meke kote seke la nia Rau sa Limaqu koarini.
15 Arini pu kukiti Nau, si kaqu hoqa todoṉo pa minatagutu pa kenuqu Rau,
meke sa dia vina kilasa si kaqu koa hola ninae rane ka rane.
16 Ba kaqu poni gamu Rau sa huiti sapu tava memehena valeana,
meke kaqu poni va deṉa ni gamu zipale pinomo Rau si gamu.”