21
Tava Kilasa sari na Tinoni pa Kenani
1 Meke sipu avoso nia sa baṉara Aradi, na tie Kenani, sapu koa koasa kalina mae pa popoa qega pa Kenani, sapu korapa la gua pa siraṉa Atarima sari na tinoni Izireli gua, si rapata la i rini, meke vata pusi rini sari kaiqa tie Izireli.
2 Ke zama tokotokoro la guahe koe Zihova sari na tinoni Izireli: “Be va malumia Goi koa gami sa vina kilasadi rina tinoni hire, si kaqu huara upata betoi gami sari na dia vasileana lavata,” gua si arini.
3 Meke avosi e Zihova sari na dia tinepa, meke va malumu la nia Sa koa rini sa vina kilasadi rina tinoni Kenani, meke huara upata betoi rini sari na dia vasileana lavata, gua asa ke poza nia Homa rini sa vasina asa.
Sa Noki Boronizi
4 Topue luaria rini sa Toqere Horo meke ene gua pa siraṉa la gua koasa Kolo Ziṉara, pude likohae nia sa popoa Edomu gua. Ba lopu koa va ṉoṉo sari na tinoni koasa dia inene.
5 Meke zama va karikaria rini se Zihova meke se Mosese. Zama guahe si arini, “Na vegua ke turaṉa vurani gami tu gamu pa popoa Izipi, pude va mate gami pa popoa qega vasina sapu loke ginani na kolo, gua? Ele mabo hena ia gami sa mana hie,” gua si arini.
6 Meke garunu ni noki variva mate e Zihova sari na tinoni Izireli meke garati si arini, meke soku rina tinoni Izireli si mate.
7 Meke mae zama guahe koe Mosese sari na tinoni Izireli: “Ele tavete va sea si gami sipu zama va karia gami se Zihova, meke zama va karigo tugo gami si agoi. Ke mamu tepa la koe Zihova kamahire pude va rizu seui sari na noki koa gami.” Meke varavara tokani e Mosese sari na tinoni.
8 Meke zama la koe Mosese se Zihova, “Mu tavetia keke noki boronizi, mamu va sigotia koa keke dedegere turuna, meke sari doduru pu ta garata si kaqu doṉo sage la koasa meke toa.”
9 Ke tavetia Mosese si keke noki boronizi, meke va sigotia sa pa batuna keke dedegere huda, meke be garatia noki si keke tie si kaqu doṉo sage la koasa noki boronizi meke toa si asa.
Sa Inene La pa Moabi
10 Sari na tinoni Izireli si ene la meke koa paki pa Obati.
11 Topue rini pa Obati si la koa pule pa Lae Abarimi, koasa soloso qega, sapu koa pa kali gasa rimata, pa popoa Moabi.
12 Beto asa si la koa paki pa lolomo Zeredi.
13 Topue vasina, si ene pule meke la koa paki pa kali latu koasa ovuku Anoni, pa korapa qega, sapu hola la pa kali popoa Amoraiti. Anoni si koasa volosona, pa varikorapa Moabi meke sari na tie Amoraiti.
14 Gua asa, ke ta Zamae koari na vinaripera koasa buka te Zihova “Sa vasileana nomana pa Vahebi, pa korapa popoa Supa meke sari na lolomo, koasa ovuku Anoni,
15 meke koari na lolomo saripu gore la gua koasa vasileana nomana pa Are, meke kenuna sa volosona Moabi.”
16 Taluarae si arini vasina meke ene la pa Bia. Koa nana si keke berukehe, vasina zama se Zihova koe Mosese, “Mu varigarani sari na tinoni, maqu poni kolo,” gua.
17 Koasa totoso hie, si kera nia ri na tinoni Izireli sa kinera hie:
“Bukaha vura, agoi na berukehe
Kaqu kera qetu nia gami pa kinerakera.
18 Ta geli koari na baṉara sa berukehe,
meke koari na koimata tadi na tinoni.
Gelinia kolu qolo tana baṉara rini,
meke koari na dia kolu hodu.”
Topue koasa soloso qega meke ene la pa vasileana Matana si arini
19 taluarae vasina, si ene la pa Nahalieli meke Bamoti si arini.
20 Topue pa Bamoti si arini meke ene la koasa lolomo pa Moabi, pa batuna sa toqere Pisiqa meke doṉo gore la gua koasa qega.
Tava Kilasa se Sihoni meke Oqo
(Diutironomi 2:26 kamo hinia 3:11)
21 Va garunu la tie paleke inavoso sari na tinoni Izireli koe Sihoni sa baṉara tadi na tie Amoraiti, sapu zama guahe:
22 “Mu va malumu gami pude ene hola gua pa mua popoa lopu kaqu taluarae si gami meke sari na mami rovana bulumakao koasa siraṉa, meke la koari na mia inuma huiti ba be inuma vaeni; lopu kaqu napoi gami sari na kolo koari na mia berukehe; kote pa siraṉa mo si koa gami osolae hola taloa koasa mua kali popoa.”
23 Ba lopu va egoi Sihoni sari na tinoni Izireli, pude ene hola gua koasa nana kali popoa. Varigara ni sa sari nana qeto minate, meke ene la si arini pa Zahazi pa korapa qega meke la varipera koari na tinoni Izireli.
24 Ba sokudi ri na kana si va matei rina tinoni Izireli. Vagia rini sa dia popoa, podalae pa Ovuku Anoni pa kali mae meke kamo la pa Ovuku Zaboki, duta kamoa volosona sa popoa Amoni d. Sa volosona sa popoa Amoni si ta lavelavei va ṉiṉira sisigiti.
25 Gua asa, ke vagi betoi ri na tinoni Izireli sari doduru vasileana lavata pa popoa tadi na tie Amoraiti, Hesiboni meke sari doduru vasileana nomadi pa vari likohaena, meke koa vasina si arini.
26 Hesiboni si na ṉati vasileana lavata te Sihoni pa popoa tadi na tie Amoraiti, sapu varipera koasa baṉara pa popoa Moabi pukerane meke vagi sa sari doduru nana popoa, kamo la gua tu koasa ovuku Anoni.
27 Gua asa ke ta kerae pa kinubekubere;
“Mae pa Hesiboni, koasa vasileana lavata te Sihoni sa baṉara!
Hiva nia gami pude kuri pulea na va vaqura pulea.
28 Keke totoso koasa vasileana lavata pa Hesiboni
si topue ene la guana nika sari na tie varipera te Sihoni;
Huara va inetia sa sa vasileana lavata pa Ara pa popoa Moabi
Va inapahi sa sari doduru toqere pa kali sagena sa Ovuku Anoni.
29 Malaṉa hola si gamu, tinoni pa popoa Moabi!
Gamu na tie pu vahesia se Kemosi si ele tava kilasa!
Vata raovi sa mia tamasa sari na tie,
La ta pusi koe Sihoni sa baṉara tadi na tie Amoraiti sari na barikaleqe.
30 Ba kamahire sari na tutidia si ele tava inapaha beto.
Doduruna podalae pa Hesiboni kamoa Diboni,
Taluarae pa Nasimi kamoa Nopa, tata pa Medeba.”
31 Gua asa ke koa ia ri na tinoni Izireli sa kali popoa tadi na tie Amoraiti,
32 garuni Mosese sari na tie pude hata ia sa siraṉa sapu leana hola, pude rapatia sa vasileana lavata pa Zazera. Vagi turaṉae nia ri na tinoni Izireli si asa, meke sari na vasivasileana nomadi pa vari likohaena, meke hadu va seu i rini sari na tie Amoraiti pu koa vasina.
33 Ene sage la gua koasa siraṉa la gua pa Basani sari na tinoni Izireli, ene mae se Oqo sa baṉara pa Basani, meke sari nana tie varipera, pude varipera koa rini pa Ederei gua.
34 Zama koe Mosese se Zihova “Mu lopu matagutu nia si asa sina ele luara vatua Rau koa gamu sa baṉara, meke sari doduru nana tie, meke sa nana popoa. Mamu tavetia koasa gua sapu tavetia gamu koe Sihoni sa baṉara tadi na tie Amoraiti. Sapu sa baṉara pa popoa Hesiboni.”
35 Ke va matea ri na tinoni Izireli se Oqo, sari na tuna koreo, meke sari doduru nana tie, loke tie si toa. Beto asa, si koa ia rini sa nana popoa.