7
Zinutudi ri Votiki Tie
(Luke 6:37-38,41-42)
1 Mi lopu vari zutui, pude mi lopu ta zutu koe Tamasa.
2 Ura gua sapu zutu nia goi koari na tie, si kaqu ta zutu pule nia tugo goi koe Tamasa. Meke sa pada sapu tavete la nia goi koari na tie, si asa tugo kaqu ta tavete atu koa goi.
3 Na vegua ke voriti nia goi sa kavuru pa matana sa tasimu, ba lopu balabala ia goi sa kukuru huda pa matamu telemu?
4 Vea meke kote zama si goi koasa tasimu, ‘Atu maqu suti pania sa kavuru pa matamu,’ gua, ba pa matamu soti si koa nana si keke kukuru huda.
5 Agoi na tie sekesekei! Mu okipani kenua sa kukuru huda pa matamu telemu, pude boka dodogorae valeana, meke boka suti pania sa kavuru pa matana sa tasimu.
6 Mi lopu vala i koari na siki sari na tiṉitoṉa hopedi, sina kote taliri pule mae meke garata gamu rini. Lopu vala i koari na boko sari na vovoto davi sina kote neti va konekonei rini.
Tepa, Hata, meke Kikia
(Luke 11:9-13)
7 Tepa meke kote vagia gamu, hata meke kote dogoria gamu, kikia meke kote ta tukele vatu koa gamu sa sasada.
8 Ura sari doduru pu tepa si kote vagi tugo, asa sapu hata si kote dogoria tugo, meke asa sapu kikia si kote ta tukele vala tugo sa sasada.
9 Agoi na tie varipodo, be tepa gana ginani sa mua koburu si vegua kaqu ponia patu goi?
10 Ba be tepa gana igana si asa, si vegua kaqu ponia noki goi?
11 Tie kaleamia si gamu ba hoke poni tiṉitoṉa leadi gamu sari mia koburu. Sa Tamamia pa Maṉauru si leana holani gamu, ke hinokara hola sapu kaqu poni ni tiṉitoṉa leadi Sa saripu tepa koa Sa.
12 Mu tavete kenu la ni koari na tie sari na ginugua leadi, gua saripu hiva ni goi pude tavete atu ni rini koa goi. Asa mo ginuana sa Tinarae te Mosese, meke sari na vina tumatumae tadi na poropita.
Sa Sasada Ṉizupuna
(Luke 13:24)
13 Mi nuquru la koasa sasada ṉizupuna. Sina sa sasada sapu la gua pa tinahuara si marepaha, meke sa siraṉa si labe meke lopu tasuna, ke ari sokudi enea si asa.
14 Ba sa sasada sapu la gua pa tinoa hola si ṉizupu, meke sa siraṉana sa si tasuna, ke ari ka visavisa mo si nuquru vasina.
Sa Huda meke sa Vuana
(Luke 6:43-44)
15 Mi kopu puleni gamu koari na poropita kokohadi. Kote mae si arini koa gamu meke pokopoko ni rini sari na hahanana tana sipi ba pa korapadi rini si gua ri na siki pinomo variva mate.
16 Pa vuana kote doṉo gilani gamu si arini. Kekeṉoṉo na hilibubuku si lopu boka vua qurepi d, meke sa huda rakihi si lopu boka vua piqi.
17 Sa huda leana si leana vuana, ba na huda kaleana si kaleana tugo vuana.
18 Sa huda leana si lopu boka vua va kaleana, meke sa huda kaleana si lopu boka vua valeana.
19 Sari doduru huda pu lopu vua valeana, si ta maho palae si arini meke ta oki la pa nika.
20 Gua asa, ke sari na poropita kokoha hire, si boka gilani mo gamu koari na dia tinavete.
Saripu Ta Kilu Koasa Baṉara
(Luke 13:25-27)
21 Lopu ari doduru pu zama mae koa Rau, ‘Baṉara, Baṉara,’ gua, si kote boka nuquru pa Binaṉara Maṉauru, ba arini mo pu va tabei sari na hiniva tanisa Tamaqu pa Maṉauru.
22 Pana kamo sa totoso vinaripitui te Tamasa, si soku tie si kote zama mae koa Rau, ‘Baṉara, Baṉara, pa korapa pozamu Goi si tozi vura nia gami sa Inavoso Leana te Tamasa. Hipuru pani gami sari na tomate kaleadi, meke soku tinavete variva magasadi si taveti gami!’ gua.
23 Ba kote tozi va leana ni mo Rau si arini, ‘La mi taloa, lopu hite gilana gamu Rau si gamu kasa na tie va sesea mia!’
Sa Sinokirae Hinokara
(Luke 6:47-49)
24 Ego, asa sapu avosodi sari Qua vina tumatumae hire, meke va tabei si arini, si kekeṉoṉo gua tugo na tie tumatumae sapu kuria sa nana vetu pa patu.
25 Ke be hoqa sa ruku, naqe sa popoa, hiru sa givusu, meke raza koasa vetu, ba lopu boka hoqa si asa, sina turu va ṉiṉira pa patu.
26 Ba asa sapu avosi sari na Qua vina tumatumae hire, meke lopu va tabei si arini, si gua tugo na tie duviduvilina sapu kuria sa nana vetu pa bolebole onone.
27 Ego, totoso hoqa sa ruku, naqe sa popoa, hiru sa givusu meke raza koasa vetu sana, si hoqa meke ta huara inete si asa.”
Sa Ṉiniraṉira te Zisu
28 Totoso va hokoti Zisu sari doduru Nana vina tumatumae hire, si magasa hola nia rina kobi tinoni sa Nana hahanana va tumatumae.
29 Ura lopu gugua rina tie pu hoke variva tumatumae nia sa Tinarae te Mosese si Asa, ba koa ia ṉiniraṉira sa Nana vina tumatumae.