4
Sa Binaṉara te Zihova pa Doduruna sa Kasia Popoa
(Aisea 2:2-4)
1 Koari na rane mumudi
si kote ta evaṉae na ṉati toqere pule koari na toqere, sa toqere tanisa Vetu te Zihova;
kote ta ovulu sage holani sa sari na toa,
meke kote totolo nuquru la koa sa sari na tie.
2 Soku butubutu si kote mae meke zama guahe,
“Mae, mada sage la koasa toqere te Zihova,
la koasa Vetu Tanisa Tamasa te Zekopi.
Kote va tumatumae gita Sa koari Nana hahanana,
pude boka ene si gita pa Nana siraṉa.”
Sa tinarae si kote vura gua pa Zaione,
sa zinama te Zihova si kote vura pa Zerusalema.
3 Kote na tie varipitui si Asa pa vari korapadi rina tinoni
meke va noso vinari tokei koari na butubutu ṉiṉiradi pa seu meke tata.
Kote tavetavete ni rini sari dia vedara pude geli ni pa pepeso pude lelete,
meke sari dia hopere si pude ta evaṉae na magu kotokotoana lelaṉa huda vaeni.
Na butubutu si lopu kote la raza ia si keke butubutu,
babe va namanama pude pule la pa vinaripera.
4 Doduru tie si kote habotu pa kauruna sa nana vaeni
meke pa kauruna sa nana huda piqi,
meke loke tie kote va matagutu i,
ura e Zihova Tadi na Qeto Minate si ele zama.
5 Doduru butubutu si mani ene
pa korapa pozana sa dia tamasa;
ba gita si kote ene pa korapa Pozana e Zihova
sa nada Tamasa ninae rane ka rane.
Kote Pule pa Tinaraovo se Izireli
6 Zama vura guahe se Zihova, “Koasa rane asa,
sari na ike si kote vagi varigara ni Arau;
kote varigarani Arau sarini pu ta raovo
meke arini pu vata lotaṉa i Arau.
7 Sarini pu ike si kote va somana i Arau koari ka visavisa Qua tinoni koa holadi,
arini pu ta hadu taloa si kote na butubutu ṉiṉirana.
Kote baṉara ni e Zihova si arini pa toqere Zaione
podalae koasa rane asa meke ninae rane ka rane.
8 Ba agoi, na vetu hakehakei ululumu tadi na sipi,
na vasina ṉiṉiramu te Zerusalema pa Zaione,
sa mua ṉiniraṉira koana si kote ta vatu pule koa goi;
sa binaṉara si kote mae koasa vasileana pa Zerusalema.”
9 Na vegua ke kabo va ululae si agoi kamahire?
Vegua na loke mua baṉara?
Na ele mate sa mua tie totoli pa binalabala,
ke tasigiti guana barikaleqe podopodona si agoi?
10 Kei gamu na tinoni pa Zerusalema pa Zaione, soliṉi pa tinasigiti,
guana barikaleqe korapa podopodona,
ura kaqu luara ia gamu sa vasileana lavata hie
pude la va turu ipi pa vasina pezarana.
Kote la pa Babiloni si gamu;
vasina si kote ta harupu si gamu.
Vasina kote holu vurani gamu e Zihova
vura koari limadia ri na mia kana.
11 Ba sapu kamahire si soku butubutu
si varigara pude raza igo.
Zama guahe si arini, “Vekoa pude mani tava boni,
madi qetu sari matada koasa sapu ta evaṉa pa Zaione!”
12 Ba lopu tumae nia rini
sa binalabala te Zihova;
lopu va bakala ia rini sapu sa hiniva Tanisa si pude va kilasa i,
Asa pu varigarani guana huiti la koasa vasina paqapaqahana qaqaloto.
13 Zama se Zihova, “Gasa turu, mamu sekeni sari qaqaloto, kei gamu na tinoni pa Zaione,
ura na kote ponini gamu kikiho aeana Arau;
na ola nene hose boronizi si kote ponini gamu Arau
meke kote va moku umumu i gamu sari soku butubutu.”
Kote vala ni gamu koe Zihova sari dia tinago ta hinikodi,
dia tinagotago si kote la koasa Baṉara pa doduruna sa popoa pepeso.