12
Sa Tinarae Vina Via tadi na Barikaleqe pa Mudina sipu Koa Ta Holae
1 Zama se Zihova koe Mosese,
2 “Mu tozini sari na tinoni Izireli: ‘Sipu koa ta holae nia keke barikaleqe si keke tuna koreo, si boni si asa osolae kamo sa rane vina zuapa, kekeṉoṉo gua tugo sapu boni si asa koasa nana minoho tana barikaleqe.
3 Koasa rane vina vesu si kaqu ta magu d sa koburu haha,
4 meke kaqu boni sa barikaleqe osolae kamo pa mudina asa koari ka toloṉavulu ṉeta rane hola gua. Koasa rane asa si kaqu via si asa. Koari na rane tanisa nana binoni mani kopu pule nia pude lopu nuquru la koasa Ipi Hopena, babe tiqui sari na tiṉitoṉa hopedi osolae tava hokoto beto sa nana totoso vina via.
5 Sa barikaleqe sapu koa ta holae nia si keke tuna vineki si kaqu boni si asa osolae kamo pa mudina ka manege made rane, kekeṉoṉo gua tugo sapu boni si asa koasa nana totoso tanisa nana minoho tana barikaleqe. Pa mudina sa manege made rane, si kaqu aqa ka onomo ṉavulu onomo rane pule, pude boka via pa hahanana vinavia pa dinoṉo te Zihova.
6 Be na tuna koreo ba be tuna vineki si asa sapu ta holae nia sa barikaleqe, pana hokoto sa nana totoso vina via, si kaqu paleke la nia sa koasa hiama pa sasadana sa Ipi Hopena, si keke lami kokoreo sapu keke vuahenina pude na vina vukivukihi va uququ meke keke baruku babe na kukuva pude na vina vukivukihi tana sinea.
7 Kaqu va vukivukihi lani sa hiama koe Zihova sari nana vina vukivukihi pude taleosae si asa, meke pude via si asa koasa nana totoso va taloa ehara. Asa sa ginugua koasa kinoa ta holae sapu kaqu tavetia sa barikaleqe.
8 Be habahuala meke loke nana tuna sipi sa barikaleqe, si kaqu paleki sa si karua kukuva babe karua baruku. Keke si pude tana vina vukivukihi va uququ, meke keke si pude na vina vukivukihi tana sinea. Meke sa hiama si kaqu tavetia sa hahanana vina madi pude taleosae sari nana sinea, meke pude via si asa pa kenuna e Zihova. Asa sa ginugua pa mudina sa pinodopodo sapu kaqu tavetia sa barikaleqe.’ ”