Sa Vinari Zamai Kekenu
4
Zobi 1:1 kamo hinia Zobi 14:22
Elipazi
1 Zama se Elipazi,
2 “Zobi, vegua kote bugoro si agoi, be zama si arau?
Lopu boka koa kae kulu si rau, na kaqu zama.
3 Ele soku tie si va tumatumae i goi
meke soku lima malohorodi si va ṉiṉira i goi.
4 Totoso ta tubarae si keke tie na malohoro meke mabo,
si sari mua zinama hoke va ṉiṉira i pude turu.
5 Ba kamahire sipu kamo koa goi sa tinasuna,
si ta duaṉa nia tu goi meke lopu boka va tia ia.
6 Vahesia goi sa Tamasa, meke loke tinazutuna sa mua tinoa;
ke leana pude kalavarae si agoi meke raṉeraṉe.
7 Mu balabala pule paki.
Vea, esei keke tie toṉoto sapu ele kamoa tinasuna kaleana hola?
Pavei si ele ta ṉovala saripu koa va ṉoṉo?
8 Ele dogori arau sarini pu lelete pa kinaleana,
meke poṉapoṉa pa tinasuna;
si paketi tugo rini sari kinolura na tinasuna.
9 Pa siniṉo te Tamasa si ta huara inete si arini.
Pa hiruna sa Nana tinaṉaziri si tava mate si arini.
10 Sa mamalaiṉidi rina tie kaleadi si guana kurukurumu laione!
Ba Tamasa va noso i meke moku i Sa livodi.
11 Guana laione pu loketoṉa gana ginani,
mate si asa, meke sari tuna si ta hurakatae lamae.
12 Na inavoso si kamo golomo mae,
na manamanasa si avosia sa taliṉaqu.
13 Pa korapa qua pinutagita pana boṉi,
pa totoso hoke puta muliuṉu sari tie,
14 si matagutu meke neneqara si arau,
meke niu beto doduru tiniqu.
15 Sipu givusu hola pa isumataqu si keke maqomaqo,
si turu bukekequ pa minatagutu.
16 Boka dogoria rau si keke toṉa turu nana;
doṉo toto la si rau ba lopu boka gilania rau.
Meke tiqe avosia rau si keke mamalaiṉi:
17 ‘Vea, boka toṉoto sa tie, hola nia sa Tamasa,
babe ṉoṉo hola nia se Zihova pu tavetena si asa?’
18 Be e Tamasa lopu ronui sari nana nabulu pa maṉauru,
meke pitui Sa sari na sinea tadi Nana mateana,
19 si vea, kote boka ronua Sa si keke tie ta tavetena pa pepeso,
sapu ta kuri pa kavuru sapu boka ta munala guana kikiti?
20 Kote boka toa pana munumunu si asa,
ba pana veluvelu si lopu nonoga matena.
21 Doduru sapu tagoi sa si ta vagi palae;
mate si asa, ba lopu tagoa sa sa ginilagilana lohina d.