26
Zobi
1 Olaṉa se Zobi,
2 “Tolavaena hola sa tinokae tamugoi koa rau,
na tie malaṉa meke malohoro gua arau!
3 Leleadi hola sari mua vina balau koa rau pu loketoṉa gilania,
noma hola sa tinumatumae va dogoro nau goi.
4 Esei toka nigo pude balabala i sari zinama hire?
Maqomaqo savana si zama vura koa goi?”
Kera se Zobi
5 “Sari maqomaqodi ri pu mate si matagutu;
sarini pa kauru kolo meke doduru pu koa vasina.
6 Sa minate si lopu boka paere koe Tamasa,
sa tinahuara si loke nobi boka va paere ia koa Sa.
7 Repahia Sa sa maṉauru pa kali togarauru pa vasina sapu loketoṉa koa ia,
meke sa kasia popoa si vekoa Sa pa vasina sapu loketoṉa zuka ia.
8 Va siṉi ni kolo Sa sari na lei,
ba lopu puzaka sari na lei koasa mamatana sa kolo ruku.
9 Va paere ia Sa sa sidara,
na lei nobi nia Sa.
10 Tavetia Sa sa hubi lamana pude vari paqaha nia sa kalalasa meke sa huporo,
meke gasia Sa sa voloso pa vari korapadi ri na rane meke na boṉi.
11 Niu sari tokele dedegere pu tuqena sa maṉauru,
neneqara totoso gegese si Asa.
12 Pa Nana ṉiniraṉira si va kilasia Sa sa kolo lamana,
pa Nana tinumatumae si va matea Sa sa kurukuru Rehabi pa lamana.
13 Pa siniṉo te Tamasa si bule learane sa maṉauru,
meke sa limana Sa suti va matena sa noki gotolo.
14 Ba vasi puritina mo sari Nana tinavete si hire,
guana manamanasa mo si avosi gita.
Ke, esei kote tumae hinokara nia sapu vea ṉiṉira gua sa Tamasa?” beto sa kinera.