27
1 Koasa rane asa,
kote va kilasa nia Zihova pa Nana vedara,
sa Nana vedara variva mate, nomana meke, ṉiṉirana,
se Leviatani, sa noki gotolo,
Leviatani sapu ene va nokinokie;
kote seke va matea e Zihova sa noki asa pa lamana.
2 Koasa rane asa kote zama se Zihova,
“Maqu kera nia sa inuma vaeni sapu vuvua hola:
3 Arau, e Zihova na kopu totoko nia;
Arau na zoropo lamo nia kolo.
Arau lavelave nia, boṉi na rane
pude loke tie mae ṉovalia.
4 Arau si lopu bugoro.
Be koa dia mo kaiqa hiqohiqo rakihi pa kenuqu,
pude Qu topue la raza i,
si kote la sulu beto pani mo Rau pa nika si arini.
5 Be lopu gua si va mae i koa Rau pude madi koa aqorae;
madi variva bulei koa Rau,
uve, madi variva bulei koa Rau.”
6 Koari na rane mae arini si kote va gore karoso se Zekopi,
Kote liho se Izireli meke havohavoro
meke sari vuana si kote va siṉi ia sa kasia popoa.
7 Vea, ele hite komitia e Zihova se Izireli
gua sapu komiti guni ni Sa sari na kana tanisa?
Vea, ele va matea Sa se Izireli
gua va mate guni ni Sa sari nana kana?
8 Lokari, garunu taloa nia mo Sa se Izireli pa popoa seu pude va kilasia,
na vivirua garunu la nia Sa meke raovo taloa nia,
guana givusu ṉiburuna pu mae gua pa kali gasa rimata.
9 Ba koasa ginugua hie si kote ta leosae se Zekopi koari nana tinavete kaleadi,
meke kote ta vulasa palae sa doduruna sa nana sinea:
pana tava umumu guana motete sari doduru patu koari na hope,
meke sari na beku barikaleqe pozana Asera meke sari na hope vina uququ oto huda humaṉa lea
si tava huara palae beto.
10 Sa vasileana nomana ta gobana si ta huara meke koa ivulu,
na kinoa ta veko palaena, ivuluna guana qega;
vasina si hena duduli sari tuna bulumakao,
vasina si eko magogoso si arini;
hamu pani rini sari na elelo koari na lelaṉa.
11 Sari lelaṉa matedi si ta moku palae,
meke mae pudiki vagi rina barikaleqe pude sutuṉu ni pa nika.
Ura sa puku tie hie si lopu gilagilana;
ke Asa pu tavetedi si lopu talotaṉa ni Sa si arini,
meke Asa pu va podakadi si lopu tataru hokara ni.
12 Koasa rane asa, si kote pudiki vizavizata vagi puleni e Zihova sari Nana tinoni podalae pa Ovuku Iuparetisi meke kamo koasa voloso pa Izipi,
13 meke koasa rane asa, sa buki nomana si kote ta ivu. Sarini pu korapa tasuna pa Asiria meke sarini pu korapa koa pinausu pa Izipi si kote mae meke vahesia se Zihova koasa toqere hopena pa Zerusalema.