2
Sa Tie Kaleana
1 Kasa tasimami; koasa guguana sa minae tanisa nada Baṉara Zisu Karisito, meke sa nada vinarigara koa Sa, si tepa gamu gami,
2 pude lopu ta ṉoṉovala sari na mia binalabala, babe ta duaṉa si gamu, be avosia gamu sapu sa rane tanisa Baṉara si ele mae, gua. Lopu va hinokaria be zama si arini sapu sa dia inavoso si maena koasa Maqomaqo Hope, babe pa zinama, na leta tamigami, gua.
3 Mi lopu va malumia si keke tie pude sekesekeini gamu. Ura lopu kaqu mae sa rane asa, osolae kamo mae sari na rane pana kilua rina tie sa Tamasa pa vina betona sa totoso ta mutina, meke kote vura sa tie kaleana. Asa tu si kote la pa tinahuara koa holana.
4 Kote kanai sa sari doduru gua pu tavahesi meke va tamasi rina tie, meke kote va lavata pule nia si asa. Kote nuquru meke habotu si asa pa Zelepade te Tamasa, meke kote poza pule nia Tamasa si asa.
5 Lopu balabala ia tu gamu sia? Totoso koa koa gamu si rau, si ele tozini gamu tu rau sari doduru pu gua hire.
6 Meke gilania mia gamu sapu gua korapa hukatana sa, pude mani lopu ta evaṉa kamahire. Ba pa totoso garona, si kote vura mae sa tie kaleana sana.
7 Ura sa kinaleana si korapa tavetavete tome kamahire, ba koa nana si keke sapu korapa hukatia sa kinaleana pude ta dogoro va bakala koari na tie, osolae tava rizu palae si asa pu hukatana sa.
8 Pa totoso asa si kote ta dogoro sa tie kaleana, meke kote va mate pania e Zisu sa Baṉara si asa pa Nana zinama, meke kote huara pania Sa si asa pana pule mae si Asa pa Nana ṉinedala.
9 Kote mae pa ṉiniraṉira te Setani sa tie kaleana, koari soku vina gilagila na tinavete variva magasadi sapu kote evaṉi sa.
10 Meke koari doduru votivotiki tinavete kaleadi, si kote sekesekei ni sa sari na tie pu kote kamo pa tinahuara. Ura korodia pude tataru nia rini pa korapa bulodia sa hinokara, pude boka ta harupu si arini.
11 Gua asa, ke kote va maluara lani Tamasa si arini koasa ṉiniraṉirana sa sinekesekei, pude madi va hinokaria rini sa kinohakoha,
12 ke kaqu tava kilasa beto pa Heli sari doduru pu qetu nia sa kinaleana, meke lopu tagoa sa hinokara.
Ta Vizata Pude Ta Harupu sari na Tie pa Tesalonaika
13 Kasa tasimami ta tatarue mia, leana hola si pude zama leanani gamu gami koe Tamasa doduru totoso. Ura pa pinodalaena si ele vizata gamu tu Tamasa, pude mi ta harupu pa korapa ṉiniraṉira tanisa Maqomaqo Hope, meke pa korapa mia rinaṉeraṉe koasa hinokara, pude va madi gamu.
14 Tioko gamu Tamasa si gamu pa korapa Inavoso Leana, sapu tarae nia gami koa gamu, pude mi somana tagoa gamu sa tinoa tolavaena tanisa nada Baṉara Zisu Karisito.
15 Ego, kasa tasimami, mi turu va nabu pa rinaṉeraṉe, mamu tuqe va nabui sari na vina tumatumae saripu ele vagi gamu koari na mami tinarae meke koari na leta.
16 Sa nada Baṉara Zisu Karisito telena, meke sa nada Tamasa sa Tamada si ele tataruni gita, meke pa korapa Nana tataru variharupi si ponini gita Sa sa minanoto toa holana, meke sa rinaṉeraṉe nabuna koasa tinoa hola.
17 Mani tava manoto sari na bulomia, meke tava ṉiṉira si gamu pude tavetia meke tozia gua sapu leana.