6
1 Beto asa si zama la koe Mosese se Zihova, “Ego, kamahire si kaqu dogoria goi sapu kaqu tavete la nia Rau koasa baṉara. Kaqu ososo nia Rau pa Qua ṉiniraṉira si asa, pude va malumi sa sari na Qua tinoni pude taloa. Sina koasa ṉiniraṉira mo asa si kaqu va rizu taloa i sa pa nana popoa,” gua si Asa.
Tiokia Tamasa se Mosese
2 Meke zama gua tugo he sa Tamasa koe Mosese, “Arau se Zihova.
3 Arau, sapu zama koe Ebarahami, koe Aisake, meke koe Zekopi sapu Arau sa Tamasa sapu tagoi sari doduru ṉiniraṉira, ba lopu vata gilana nia Rau koa rini sa pozaqu madina, sapu se Zihova.
4 Meke Arau tugo tavetia sa Qua vinariva egoi koarini, meke sapu va tatara nia koa rini sa popoa Kenani, sa popoa sapu ele koa ia rini guana tie karovodi.
5 Ego, kamahire si ele avosi Rau sari na Qua tinoni Izireli sipu siṉo maṉini pa tinasigiti si arini, saripu ele va pinausi rina tie Izipi, meke ele balabala pulea Rau sa Qua vinariva egoi koarini.
6 Ke la mamu tozia koari na tie Izireli, sapu Arau si zama koa rini, meke Arau Zihova si kaqu harupu gamu, meke vata rupaha gamu koasa tinava pinausu koari na tinoni pa popoa Izipi. Kaqu va sagea Rau sa limaqu sapu ṉiṉira hola, pude va kilasa va kaleana hola i si arini, meke kaqu vata rupaha gamu Rau si gamu.
7 Meke kaqu vata evaṉaeni gamu na Qua tie soti Rau si gamu. Meke kaqu na mia Tamasa, pana vata rupaha gamu Rau koa sa tinava pinausu pa popoa Izipi.
8 Meke kaqu turaṉa lani gamu Rau koasa popoa sapu ele va tatara zoṉazoṉa nia Rau pude vala nia koe Ebarahami, Aisake, meke Zekopi. Meke Arau, sa Tamasa Zihova si kaqu vatua si asa koa gamu, pude na mia tinago soti,” gua si Asa.
9 Ke la tozia Mosese koari na tie Izireli saripu gua asa, ba korodia avosia rini si asa, sina ele tava malohoro sari na maqomaqodi koasa dia tinava pinausu kaleana hola.
10 Beto asa si zama la koe Mosese se Zihova,
11 “La, mamu tozi nia sa baṉara pa Izipi, pude kaqu va malumi sari na tinoni Izireli pude taluarae koasa nana popoa.”
12 Ba zama la koe Zihova se Mosese, “Pude la tozini sari na tinoni Izireli ba kote korodia avosau rini, ke pude vegua sa baṉara Izipi, sina na lopu na tie bokaboka pa zinama si rau,” gua se Mosese.
13 Ba zamai e Zihova sari Mosese e Eroni, pude la tozini sari na tinoni Izireli meke sa baṉara pa popoa Izipi, sapu “Arau garunu gamu si gamu pude turaṉa vurani sari na tinoni Izireli pa popoa Izipi.”
Sari na Puku Tatamana tadi Mosese e Eroni
14 Se Rubeni, sa tuna kenuna e Zekopi, si ka made tuna koreo, sapu ari Hanoki, e Palu, e Hezironi meke e Kami; arini sari na tiatamadia rina butubutu sapu ta pozae koari na pozadia.
15 Se Simione si ka onomo tuna koreo: Ari Zemuela, e Zamini, e Ohadi, e Zakini, e Zohara meke Saulu. E Saulu si va podo nia sa koa keke barikaleqe Kenani. Arini sari na tiatamadia rina butubutu sapu ta pozae luli koari na pozadia.
16 Se Livae si ka ṉeta tuna koreo: Ari Qerisoni, e Kohati, meke Merari. Arini sari na tiatamadia rina butubutu sapu ta pozae luli koari na pozadia. Meke se Livae si keke gogoto toloṉavulu zuapa vuahenina meke mate si asa.
17 Se Qerisoni si karua tuna koreo: Ari Libini meke Simei, meke sokudi tugo sari na tudia rini.
18 Se Kohati si ka made tuna: Ari Amaramu, e Izihara, e Heboroni, meke Uzieli. Meke se Kohati si koa keke gogoto toloṉavulu ṉeta vuahenina.
19 Se Merari si karua tuna koreo: Ari Mahili, meke Musi. Arini sari na butubutu Livae meke sari na tudia rini.
20 Ego, haba ia Amaramu sa tasina barikaleqe sa tamana, sapu se Zokebedi. Meke va podo nia sa koasa se Eroni meke se Mosese. Meke se Amaramu si toa keke gogoto toloṉavulu zuapa vuahenina meke mate.
21 Se Izihara si ka ṉeta tuna koreo: Ari Kora, e Nepeqi meke Zikiri.
22 Se Uzieli ba ka ṉeta tuna koreo: Ari Misaelo, e Elozapani meke e Sitiri.
23 Haba ia Eroni se Eliseba, sa tuna vineki e Aminadabi sapu sa vavenena e Nasoni; meke va podo nia sa koasa se Nadabi, e Abihu, e Eleaza meke e Itamara.
24 Se Kora si ka ṉeta tuna koreo: Ari Asire, Elikana, meke Abiasapi. Arini sari na tiatamadia koari na pinaqaha butubutu te Kora.
25 Ego se Eleaza, sa tuna koreo e Eroni, si haba ia sa si keke tuna vineki e Putiela, meke va podo nia sa koasa se Pinehasi. Arini sari na ṉati palabatu koari na puku tatamana meke sari na butubutu te Livae.
26 Meke koari Eroni e Mosese si zama guahe se Zihova, “Mi turaṉa vurani sari na butubutu Izireli pa popoa Izipi,” gua.
27 Meke arini tugo sari na tie sapu tozi nia sa baṉara pa popoa Izipi, pude vata rupahi sari na tinoni Izireli, gua.
Sa Ginarunu te Zihova Koe Mosese meke Eroni
28 Meke sipu zama se Zihova koe Mosese pa popoa Izipi,
29 si zama guahe si Asa, “Arau se Zihova. Mu la tozi koasa baṉara pa popoa Izipi sari doduru tiṉitoṉa saripu tozi nigo Rau,” gua.
30 Ba olaṉa la koasa se Mosese, “Ele gilanau Mua mo, sapu lopu na tie bokaboka pa zama si rau, ke lopu boka avosau sa baṉara si rau,” gua si asa.