36
1 Ke se Bezaleli meke se Oholiabi, meke sari doduru tie bokabokadi pa tinavete lima, saripu ele poni ginilagilana na tinumatumae e Zihova meke gilani gua pude taveti sari doduru likakalae, meke na tiṉitoṉa tana kinurina sa Ipi Hopena, si kaqu taveti rini sari doduru gua pu ele garununi e Zihova.”
Soku Vinariponi si Paleke Maeni ri na Tie Izireli
2 Meke tioki Mosese sari Bezaleli e Oholiabi, meke sari doduru tie bokabokadi pule, saripu poni binokaboka e Zihova meke sarini pu hiva varitokae, meke tozini Mosese pude podalae tavetavete.
3 Meke vagi rini koasa sari doduru vinariponi, saripu paleke maeni ri na tie Izireli, pude kuria sa Ipi Hopena. Ba lopu beto paleke lani ri na tie Izireli koe Mosese sari na dia vinariponi doduru munumunu.
4 Ke luara vekoa ri na tie bokabokadi sa dia tinavete, sapu korapa tavetia rini koasa Ipi Hopena,
5 meke la zama koe Mosese, “Sari na tie si korapa paleke va soku sisigiti mae, hola nia sapu ta hivae koasa tinavete, sapu ele garunu nia sa Tamasa pude tavetia.”
6 Ke garunu lani zinama e Mosese sari doduru tinoni, pude loke tie si kaqu vala pule vinariponi koasa Ipi Hopena; ke lopu paleke pule la sari na tie.
7 Sapu gua ele ta vala, si soku hola nia sa padana, pude va hokotia sa doduruna sa tinavete.
Kuria Rini sa Ipi Hopena te Tamasa
(Ekisidasi 26:1-37)
8 Sari na tie bokabokadi hola pa tinavete koari doduru tie si tavetia sa Ipi Hopena te Tamasa d. Ka manege puta kukuru poko lineni arilaedi, sapu ta tigisi lozi bulu, pepolo, meke ziṉara si taveti rini; meke tigisi ni mateana serubimi rini sari na poko.
9 Sari na gineledi ri na hopeke kukuru poko si ka manege rua mita geledi, meke karua mita labedi.
10 Meke piti varihodaeni rini sari ka lima poko pa keke kalina, meke gua tugo sari ka lima pule pa keke kalina.
11 Beto asa si va sotoni kukuru poko bulu bobolokuhae sapu koai na lopa rini hukihukiridi sari na poko pude boka lopoti na labete sisigotoana.
12 Meke piti va sotoi rini sari ka lima ṉavulu puta kukuru poko bulu bobolokuhae sapu koai na lopa koari hopeke karua kalina sa poko.
13 Beto asa si taveti rini si ka lima ṉavulu puta qaqahere pude lozo, meke doṉo guana keke mo sari karua poko.
14 Beto asa si vagi rini sari ka manege eke kukuru poko sapu ta tavete pa kalu qoti, meke tavetia keke ipi poko pude nobia sa Ipi Hopena.
15 Sari padadi ri doduru si ka manege ṉeta mita geledi meke karua mita labedi.
16 Piti varihodaeni rini sari ka lima poko pude tavetia si keke, meke gua tugo sari ka onomo pule.
17 Meke va sotoi pule rini sari ka lima ṉavulu puta kukuru poko bulu bobolokuhae sapu koai na lopa, pa hukihukiridi sari karua poko hire.
18 Beto asa si taveti pule rini sari ka lima ṉavulu puta qaqahere boronizi, pude ta varihodae sari karua kukurudi, meke doṉo guana keke nobinobi mo.
19 Beto asa si tavete pulei rini si karua nobinobi tanisa Ipi Hopena. Keke si na kapu sipi kokoreo, sapu tava ziṉara, meke keke pule si na kapu rumu, pude tana sada.
20 Beto asa, si va turu varibarani rini sari kaiqa huda barabara akesia pude tanisa Ipi Hopena.
21 Hopeke ri na barabara si ka made mita ululuna, meke onomo ṉavulu onomo sentimita labena,
22 meke hopeke karua barabara hire si turu koari na vovoina siliva.
23 Taveti rini si ka hiokona puta hopeke karua huda barabara tana kali mataona.
24 Meke ka made ṉavulu puta vovoina siliva si koa pa kaurudi ri hopeke karua huda barabara. Karua huda barabara si varihodae meke sa hubidi si turu pa karua vovoina siliva.
25 Meke taveti pule rini si ka hiokona puta hopeke karua huda barabara pude tana kali gedenasa Ipi Hopena.
26 Meke ka made ṉavulu puta vovoina siliva, si koa pa kaurudi ri hopeke karua barabara.
27 Meke pa mudina sa ipi pa kali lodu rimata, si taveti rini si ka onomo hopeke karua huda barabara.
28 Tavete pulei rini karua hopeke barabara huda, koari karua iiona pa mumudi.
29 Sari karua barabara huda koari hopeke iiona sa Ipi Hopena, si ta varihodae varigara si arini meke ta tuqe varigarae koa keke riṉi boronizi, panapeka meke kamo panaulu.
30 Gua asa, ke taveti rini si ka vesu sari doduru hopeke karua barabara huda pa mudina sa Ipi Hopena, meke kaqu ka manege onomo sari doduru vovoina siliva, karua vovoina pa kaurudi ri hopeke karua barabara huda.
31 Taveti rini sari na huda akesia, pude tana gaso, pude va ṉiṉirai sari na huda tuturu koari na barabara tana Ipi Hopena. Ka lima gaso si pude tuqe varigarani sari na barabara pa keke kalina,
32 meke ka lima pule si pude tuqe varigarani sari na barabara pa keke kalina. Meke ka lima pule gaso, pude tuqe varigarani sari na barabara pa mudina sa Ipi Hopena.
33 Sa huda gaso pa kokorapadi rina barabara, si kamo la gua koari karua vina betobeto barabara.
34 Vekoni riṉi qolo rini sari na barabara huda, meke va lopoto lani sari na gaso koari na riṉi, meke pokoni kapu qolo sari na barabara, meke sari na huda gaso.
35 Meke tavete nia poko lineni arilaena rini si keke goba poko, meke pitini lozi bulu, pepolo meke ziṉara. Beto meke piti valani rini sari na kineha mateana serubimi si asa.
36 Beto asa si va sigotia rini sa poko goba koari na qaqahereana qolo saripu sotodi koari ka made dedegere huda akesia sapu ta pokoe qolo meke saripu turudi koari ka made vovoina siliva.
37 Ego, koasa nuqunuquruana tanisa Ipi Hopena, si va sigoto nia poko goba ta tavetena pa poko lineni arilaena, sapu ta pitie lozi bulu, pepolo, meke ziṉara; meke piti nia vinasari tugo rini si asa.
38 Meke taveti tugo rini si ka lima dedegere huda akesia sapu ta pokoe qolo, pude tanisa poko goba asa, meke va sotoni qaqahere rini; meke taveti tugo ka lima vovoina boronizi, pude tadi na dedegere arini.