10
1 Sari na dodoa matedi boka va humaṉa hikare ia sa lumu,
gua sapu sa pinekipeki hitekena boka huara pania sa ginilagilana meke sa vina lavata.
2 Sa bulona sa tie gilae si vizatia sa siraṉa toṉoto,
ba sa bulona sa tie pekipeki si vizatia sa siraṉa sapu seana.
3 Nonoga hola pana ene pa siraṉa sa tie pekipeki,
na kote dogoria mo ri na tie sapu na pekipekina si asa.
4 Be guana bugoro nigo sa baṉara si goi,
si lopu veko pania sa mua tuturuana;
na binule boka va noso i mo sari na sinea nomadi.
5 Koa nana si keke kinaleana sapu dogoria rau pa kauruna sa rimata,
sa sinea gua sapu hoke vura koari na koimata.
6 Sari na tie pekipeki si ta veko pa tuturuana nomadi,
meke sari tie tagotago si koa pa vasina pepekadi.
7 Ele dogori rau sari na pinausu sapu habotu pa hose,
meke sari koburu tavia si ene guana pinausu.
8 Asa pu gelia sa pou si kote hoqa pule nia mo sa;
asa pu lopoto nuquru pa goba si kote ta garata noki.
9 Asa pu la geli patu si kote ta bakora patu;
asa pu soko huda si kote boka bakora maho.
10 Pude tutu sa maho meke pako sa livona,
si na ṉiniraṉira si kote ta hivae,
ba na ginilagilana si va kamo binokaboka.
11 Be guana garata sa noki sipu lopu ele va mamania sa tie kopu,
si loke laena mo sa tie kopu.
12 Sari zinama pa ṉuzuna sa tie gilagilana si avoso lea,
ba sa tie pekipeki si ṉovala pule nia koari nana zinama.
13 Pa pinodalaena si avoso hikare sari nana zinama;
ba pa vina betona si duviduvili va kaleana sari nana binalabala,
14 meke sa tie pekipeki si zama hoboro lamo.
Loke tie si tumae nia nasa si korapa mae pa kenuna,
meke esei boka tozia na sa si kote evaṉa pa mudina sa?
15 Sa tie pekipeki si mabo nia sa sa nana tinavete;
ke lopu gilania sa sa siraṉa pule la pa nana vetu.
16 Tasuna sa butubutu sapu na koburu mo si baṉara nia,
meke sari koburu tavia si inevaṉa pana munumunu.
17 Tamanae sa butubutu sapu sa nana baṉara si pa tuti binaṉara,
meke sari koburu tavia si henahena luli pa totoso,
pude ṉiṉira, lopu pude viviri.
18 Pana hakohako sa tie, sa ropoto vetu si kote hoqa;
pana lopu boka tavetavete sa limana, si kote honi sa vetu.
19 Pa inevaṉa si hegere sari na tie,
meke sa napo vaeni si variva qetu koa rini,
ba na poata mo sa inolaṉa koari doduru.
20 Lopu nanae nia sa baṉara, lopu zama golomo nia tugo,
babe leve nia pa mua lose sa tie tagotago,
sina sa kurukuru pa galegalearane kote paleki sari mua zinama,
meke na kurukuru tapuru kote la tozi sapu zama ni goi.