Buka Hope Tinavete 10

Pita meke Koniliasi

1 Meke koa nana pa Sizaria si keke koari na koimata tana keke qeto minate varipera tadi na tie Roma, sapu ta pozae na “Puku minate varipera pa Itali”. 2 Na tie soto va nabu koa sa Tamasa, meke pamaṉa nia meke vahesia sa meke sari nana tamatina sa Tamasa. Hoke varitokae si asa koari na tie malaṉa, meke na tie varavara tugo si asa. 3 Keke rane, padana ṉeta koloko veluvelu, si dogoro bakalia sa si keke mateana te Tamasa sapu mae zama koasa, “Koniliasi,” gua si asa.

4 Meke pa nana minatagutu si doṉo la se Koniliasi, meke zama, “Baṉara, na sa si hiva nia Goi koa rau?” gua si asa.

Meke olaṉa la sa mateana, “Sari na mua vinaravara, na mua tinavete leadi koari na tie malaṉa, si ele avosi, na dogori sa Tamasa, ke korapa ta balabala koa Sa si goi. 5 Ke mamu garunu la tie pa Zopa, pude la turaṉa mae nia si keke tie vasina, pozana e Saimone Pita. 6 Koa nana si asa pa vetu tana keke tie tavetavete kapu kurukuru, sapu e Saimone pozana. Sa nana vetu si tata pa masa,” gua sa mateana. 7 Meke sipu taluarae sa mateana pu zama koe Koniliasi, si tioko vagi sa si karua nana nabulu, meke keke solodia pu somana la aqa ginarunu koasa. Sa solodia asa si hoke vahesia tugo sa Tamasa. 8 Tozi ni Koniliasi sari doduru tiṉitoṉa gua pu zama ni sa mateana koasa, meke tiqe garunu lani sa si arini pa Zopa.

9 Meke pa koivugona, sipu korapa ene la rini pa siraṉa, sapu tata kamo pa Zopa, si sage la pa batu vetu se Pita pa manege rua koloko, pude la varavara. 10 Ovia se Pita, ke hiva henahena. Ba sipu korapa va namanama ginani sarini, si dogoria sa si keke dinogodogorae. 11 Dogoria sa sapu ta tukele sa maṉauru. Meke keketoṉa sapu guana keke vaqara poko nomana, si isu nana koari ka made iiona, meke gore mae kamo pa pepeso. 12 Voi pa korapana sa vaqara asa sari doduru votivotiki kurukuru ṉame, na noki, meke na kurukuru tapuru. 13 Meke zama la si keke mamalaiṉi, “Pita, turu, mamu va matei si hire, mamu henai,” gua.

14 Ba olaṉa se Pita, “Lokari Baṉara, namu lopu ele hite henai rau sari na ginani bonidi gua hire,” gua si asa.

15 Meke zama sa mamalaiṉi pa vina rua totoso, “Mu lopu poza ni bonidi saripu ele va via i Rau,” gua si Asa. 16 Ka ṉeta totoso si ta evaṉa sapu gua asa, meke tiqe ta hena sage pule pa maṉauru sa vaqara poko asa.

17 Meke sipu korapa nunala nia Pita ginuana sa nana dinogodogorae, si la nanasa hata nia ri kasa pu garuni e Koniliasi sa vetu vasina koa se Pita, ke la turu si arini pa sadana sa bara koasa vetu. 18 Titioko si arini, meke nanasa, “Vegua koa nana tani si keke tie pozana e Saimone Pita?”

19 Sipu korapa podekia Pita pude gilania ginuana sa nana dinogodogorae, si zama la koa sa sa Maqomaqo Hope, “Pita, ka ṉeta tie si korapa hata igo. 20 Tuturei turu, mamu gore la tutuvi. Mu lopu koromu, ba mamu luli koa rini, ura Arau garunu atu ni si arini,” gua si Asa.

21 Ke gore la se Pita koari kasa, meke zama, “Arau mo sapu nanasa hata nau gamu. Vegua, nasa sa ṉatina sa mia minae?” gua si asa.

22 Meke olaṉa sarini, “Gami si ta garunu koe Koniliasi, sa koimata tadi na tie varipera, pude mae koa goi. Keke tie leana si asa, sapu hoke vahesia sa sa Tamasa, meke ta pamaṉaena si asa koari doduru tie Ziu. Keke mateana te Tamasa garunia si asa pude mae hata igo si goi, pude la pa nana vetu, meke pude mani va avosi, gua saripu kaqu la zama ni goi, gua,” gua si arini. 23 Ke tioko va nuquri e Pita si arini, pude koa paki koa sa pa keke boṉi.

Meke pa koivugona si taluarae se Pita, meke luli koa rini. Kaiqa rina tie te Zisu pa Zopa, ba somana luli tugo koe Pita. 24 Pa koivugona, si la kamo si arini pa Sizaria, vasina korapa aqa se Koniliasi, meke sari kasa turaṉana, na nana baere pu ele ruvati sa. 25 Meke sipu tata nuquru la pa vetu se Pita, si la kokotuṉu pa nenena sa meke todoṉo va lavatia Koniliasi si asa. 26 Ba zama la se Pita koasa, “Mu turu, ura na tie mo si rau,” gua si asa.

27 Vivinei se Pita koa sa meke nuquru la pa vetu, meke dogoria Pita sapu soku hola sari tie pu korapa varigara aqa. 28 Ke zama la koa rini se Pita, “Ele gilana valeania mia gamu sapu hopena pa tinarae tamigami na tie Ziu si pude keke tie Ziu si la koa somanae, babe ene la hopiki nia si keke tie pa votiki butubutu. Ba ele va dogoro nau sa Tamasa, sapu lopu kaqu poza nia boni, na kaleana rau si keke tie. 29 Gua asa, ke sipu mae hata au gamu, si lopu hite koroqu si rau pude mae. Ke kamahire si hiva gilania rau, gua meke mae hata au gamu si rau,” gua se Pita.

30 Meke zama se Koniliasi, “Ka ṉeta rane ele hola, pa ṉeta koloko totoso gugua tugo hie, si koa varavara si rau pa qua vetu, meke vura mae turu va hodaka pa kenuqu rau si keke mateana sapu pokopoko keoro ṉedala. 31 Zama si asa, ‘Koniliasi, ele avosi Tamasa sari mua vinaravara, meke ele gilani na balabala i tu Sa sari na mua vinaritokae koari pu malaṉa; 32 ke mamu garunu la tie pa Zopa, pude la hata ia si keke tie vasina, pozana e Saimone Pita. Koa nana si asa pa vetu tana keke tie tavetavete kapu kurukuru, pozana si e Saimone. Tata pa masa sa nana vetu,’ gua si asa. 33 Gua asa, ke tuturei garunu atu tie si rau pude hata igo, meke leana hola sapu boka mae si agoi. Ke hire si gami doduru; ele mae varigara pa kenuna sa Tamasa pude va avosia, sapu gua garunu nigo sa Tamasa pude mae tozia koa gami,” gua se Koniliasi.

Sa Zinama te Pita

34 Meke podalae zama se Pita, “Kamahire tu tiqe gilania rau sapu koe Tamasa si kekeṉoṉo mo si gita doduru tie.* 35 Sari doduru tie pu pamaṉa nia na vahesia sa Tamasa, meke evaṉi rini gua saripu toṉoto, si qetuqetu ni Sa pude poza ni Nana tie si arini. 36 Ele gilania mia gamu sa tinarae sapu garunu la nia sa Tamasa koari na tie Izireli, sapu sa inavosona sa binule koe Zisu Karisito, sa Baṉara tadi doduru tie. 37 Meke ele gilania mia gamu sapu gua ta evaṉa pa popoa tadi na tie Ziu, podalae pa Qaleli pa mudina sapu tarae nia e Zone Papitaiso sa pinapitaiso. 38 Meke ele gilania mia tugo gamu se Zisu pa Nazareti, sapu ele va siṉi nia Maqomaqo Hope, meke ṉiniraṉira sa Tamasa. Meke sapu ene la mae si Asa, meke taveti Sa sari na tinavete leadi, meke salaṉi Sa saripu ta ṉoṉovala koari na tomate kaleadi, sina koa koa Sa sa Tamasa. 39 Gami si na tie pu dogoro soti sari doduru tiṉitoṉa pu evaṉi Sa pa Zerusalema meke koari doduru vasina pule pa popoa tadi na tie Ziu, osolae poka nia na va matea rini si Asa pa korosi. 40 Ba pa vina ṉeta rane si va turu pulea Tamasa si Asa pa minate, meke vata dogoro pulea Tamasa si Asa koa gami. 41 Lopu pa doduru tie si vura Sa, ba koa gami mo pu ele vizata gami sa Tamasa, pude na tie va sosode. Gami si hena na napo turaṉia si Asa, sipu toa pule si Asa pa minate. 42 Meke garunu gami Sa si gami, pude la tarae koari na tie, meke pude tozi vura nia koa rini sapu Asa tugo sapu ele vizatia sa Tamasa, pude na tie varipitui koari na tie toadi meke matedi. 43 Sari doduru poropita si huhukia mo si Asa pa dia zinama, sapu sari doduru pu va hinokaria si Asa, si kaqu taleosae sari na dia sinea pa korapa ṉiniraṉira tanisa pozana Sa,” gua se Pita.

Vagia rina Zenitailo sa Maqomaqo Hope

44 Sipu korapa zama se Pita, si ta kamoe nia ri doduru pu avavoso koasa tinarae sa Maqomaqo Hope. 45 Meke magasa hola sari na tie Ziu pu va hinokaria se Zisu, saripu lulidi mae koe Pita pa Zopa, sina dogoria rini sapu koari na Zenitailo, ba variponi nia tugo Tamasa sa Maqomaqo Hope. 46 Ura avosi rini sari na tie Zenitailo sapu zama pa votiki vinekala, meke vahesia rini sa Tamasa. Ke zama se Pita, 47 “Sari kasa tie hire si vagia rini sa Maqomaqo Hope, gua putaputa tugo mo sapu ta evaṉa koa gita. Ke vegua? Sei kote boka hukati si arini pude ta papitaiso?” gua si asa. 48 Ke gua asa, si tozini Pita si arini pude di ta papitaiso pa korapa pozana e Zisu Karisito. Meke sipu beto saripu gua hire, si tepa ia rini se Pita pude koa paki koa rini kaiqa rane.