7
Bantu ba Bamalayika Baateeri̱ho Kilengeru
1 Hei̱nyu̱ma gya bintu bikuhuniriza, binyakubba ku nsi, ku lyoba na ku bintu bindi, Yesu̱ amaari̱ kuhaahuula kilengeru kya mukaaga, nyaatu̱ngi̱ri̱ kuwonekerwa kundi. Mu kuwonekerwa kundi kuku, nyaaweeni̱ bamalayika banei. Bamalayika bab̯wo baali beemereeri̱ ha mbaju inei za nsi, b̯uli omwei̱ naali ku rubaju lu̱mwei̱ lu̱mwei̱. Bamalayika bab̯wo baali bakweti̱ mpehu gyensei̱ gikusobora kuleetaho ki̱i̱zo mu nsi, kuruga mu mbaju inei za nsi gyensei̱, gitahunga mwi̱taka, na mu nsi, kadi ku̱zi̱ngi̱zya misaali.
2 Kandi de, nyaaweeni̱ malayika wondi, munyakuruga b̯uhuluka lyoba. Yogwo yo, yei̱zi̱ri̱ na kikwatu kya kutaho bantu kilengeru kya Ruhanga mwomi; nikili kilengeru kya kulinda bantu, hali ki̱i̱zo kyenseenya. Malayika yogwo, yeeti̱ri̱ neiraka likooto, badi̱ bamalayika banei, ba Ruhanga bayaali aheeri̱ b̯u̱sobozi̱, b̯wa kuleeta ki̱i̱zo ku nsi na mwi̱taka.
3 B̯u̱yaabeeti̱ri̱, yaabaweera, “Mutaleeta ki̱i̱zo kyensei̱ mu nsi rundi mwi̱taka rundi ku misaali, gya na bamalayika bandi tu̱takabbeeri̱ kutaho baheereza ba Ruhanga, kilengeru ku b̯u̱syo.”
4 Kasi mwomwo malayika yogwo, hamwei̱ na bamalayika bei̱ra baamwe, baata kilengeru ha b̯uli muheereza wa Ruhanga yensei̱. B̯wi̱re b̯u̱b̯wo, nyeegwi̱ri̱ muhendu gwa bab̯wo bantu babaateeri̱hoona kilengeru kya Ruhanga. Bensei̱ hamwei̱, baalingi bantu kasiriira kamwei̱, na mitwaru minei, na nku̱mi̱ inei. Bab̯wo bantu baali baru̱gi̱ri̱ mu nganda zensei̱ i̱ku̱mi̱ neibiri za Bei̱saleeri̱.
5 Bantu ba mu luganda lwa Yu̱da, babaateeri̱ho kilengeru, baali mutwaru gu̱mwei̱ na nku̱mi̱ ibiri;
ba mu luganda lwa Lu̱bbeeni̱, baali mutwaru gu̱mwei̱ na nku̱mi̱ ibiri;
ba mu luganda lwa Gaadi, baali mutwaru gu̱mwei̱ na nku̱mi̱ ibiri;
6 ba mu luganda lwʼAseeri̱, baali mutwaru gu̱mwei̱ na nku̱mi̱ ibiri;
ba mu luganda lwa Nafutaali, baali mutwaru gu̱mwei̱ na nku̱mi̱ ibiri;
ba mu luganda lwa Manaase, baali mutwaru gu̱mwei̱ na nku̱mi̱ ibiri;
7 ba mu luganda lwa Si̱myoni̱, baali mutwaru gu̱mwei̱ na nku̱mi̱ ibiri;
ba mu luganda lwa Leevi̱, baali mutwaru gu̱mwei̱ na nku̱mi̱ ibiri;
ba mu luganda lwa Isaakaari̱, baali mutwaru gu̱mwei̱ na nku̱mi̱ ibiri;
8 ba mu luganda lwa Zabbu̱looni̱, baali mutwaru gu̱mwei̱ na nku̱mi̱ ibiri;
ba mu luganda lwa Yozefu̱, baali mutwaru gu̱mwei̱ na nku̱mi̱ ibiri;
ba mu luganda lwa Bbenyami̱i̱ni̱, baali mutwaru gu̱mwei̱ na nku̱mi̱ ibiri.
Beikiriza ba Yesu̱ Nibahaariiza Ruhanga
9 Hei̱nyu̱ma gya kuwona bantu ba bamalayika babaateeri̱ho kilengeru, nyaatu̱ngi̱ri̱ kuwonekerwa kundi. Mu kuwonekerwa ku̱kwo, nyaaweeni̱ kitebe kikooto kya bantu. Kwega bab̯wo bantu nka kubaali banene, haali hataloho muntu yensei̱ munyakubba naakusobora kubabala, akabamala. Baali baru̱gi̱ri̱ mu mahanga gensei̱, nganda zensei̱, kandi nibali ba ndimi zensei̱. Bab̯wo bantu baali beemereeri̱ mu mei̱so ga kitebe kya Ruhanga na mu mei̱so ga Mwana gwa Ntaama. Kandi, baali balweri̱ kanzu zi̱syanu̱, bakweti̱ nsansa nibakujaguza ku̱si̱ngu̱ra.
10 Bab̯wo bantu baalu̱kengi̱ neiraka likooto nibakoba yati,
“Ruhanga weetu̱ yogwo,
ei̱cali̱i̱ri̱ kitebe kya b̯ukama b̯wa mwiguru,
na Yesu̱ Mwana gwa Ntaama, boobo banyakutujuna.”
11 Bamalayika bensei̱ baali beemereeri̱; beelogoleerye kitebe kya Ruhanga. Kandi de, baali beelogoleerye bahandu̱, na bihangwa bya mwiguru binei. Bamalayika bab̯wo, hamwenya na bihangwa bya mwiguru binei na bahandu̱ ba Bei̱saleeri̱, bensei̱ hamwei̱ bamaari̱ gagwa mu mei̱so ga kitebe kya b̯ukama b̯wa mwiguru, batu̱lu̱ki̱ri̱ b̯u̱syo b̯wab̯u hansi, baaramya Ruhanga.
12 Baamu̱ramyengi̱ nibakoba,
“Kakibbe yaatyo, nka bab̯wo bantu ku̱basabi̱ri̱!
Ruhanga weetu̱ ahaariizib̯we kandi ahaab̯we ki̱ti̱i̱ni̱sa;
hab̯wakubba yooyo eicala wa magezi̱, yooyo asemereeri̱ ku̱si̱i̱mwa,
kandi de ki̱ti̱i̱ni̱sa,
b̯u̱sobozi̱, na maani,
byenseenya biicala byamwe, biro na biro!
Amiina!”
13 Omwei̱ hali bab̯wo bahandu̱ yamb̯u̱u̱li̱i̱rye yati, “Bab̯wo balweri̱ kanzu zi̱syanu̱, bali bantu ba mu̱li̱ngo kyani, kandi, baru̱gi̱i̱ri̱ hanya?”
14 Gya nyaamwi̱ri̱ri̱mwo ninkoba yati, “Mu̱handu̱, nagya ti̱nyeegi̱ri̱; bei̱tu̱ we, nka kwokubyega, nkukusaba ombwere.”
Yanzi̱ri̱ri̱mwo naakoba yati, “Bab̯wo bantu boobo baru̱gi̱ri̱ mu kuwonawona kunyamaani, bei̱tu̱ baasi̱ngu̱ra. Kandi baanaabi̱i̱rye kanzu zaab̯u mwibbanga lya Mwana gwa Ntaama, baazi̱syani̱a.
15 “Gi̱gyo, gyogyo nsonga gibaha kwemeeranga mu mei̱so ga kitebe kya b̯ukama b̯wa Ruhanga,
nibamukoora i̱jolo na mwinsi, mu Yeekaru gyamwe.
Ruhanga, yogwo ei̱cali̱i̱ri̱ kitebe kya b̯ukama b̯wa mwiguru, akwi̱za kwicalanga nabo, naabalinda.
16 Nzala ti̱gi̱li̱b̯u̱ni̱a kubadya;
na nyoota, ti̱gi̱li̱b̯u̱ni̱a kubakwata.
Lyoba li̱kwi̱za kwahi kubookyanga.
Kadi kintu kindi kyenseenya kiicala na kingeere, ki̱kwi̱za kwahi kubookyanga.
17 Hab̯wakubba, Mwana gwa Ntaama, yogwo ei̱cali̱i̱ri̱ hakati̱ wa kitebe kya b̯ukama b̯wa mwiguru, alibafaaho nka mu̱li̱i̱sya weigana.
Alibeebembera nka mu̱li̱i̱sya kwatwala ntaama zaamwe ku mazu̱ba ga meezi̱ ga b̯womi, aleke zitakwa nyoota.
Kandi, Ruhanga alibasusura mali̱ga genseenya gali mu mei̱so gaab̯u.”