18
Ku̱gwa kwa Rub̯uga Bbabbu̱looni̱
1 Hei̱nyu̱ma gya kuwona yogwo mu̱kali̱ mwenzi̱, munyakubba kawoneru ka rub̯uga Bbabbu̱looni̱, nyaaweeni̱ malayika wondi naaku̱si̱ri̱mu̱ka hansi kuruga mwiguru. Malayika yogwo, yei̱zi̱i̱ri̱ mu maani ganene hoi̱. Kandi b̯u̱yaasi̱ri̱mu̱ki̱ri̱ hansi, ki̱ti̱i̱ni̱sa kya Ruhanga kiyaali nakyo, kyasyani̱i̱rye nsi gyensei̱.
2 Nyeegwi̱ri̱ niyaaluka neiraka lya hakyendi̱ naakoba,
“Bbabbu̱looni̱, rub̯uga lukooto lwa nkori̱ za bibii, ogwi̱ri̱ cekeceke!
Zi̱ku̱weeni̱!
Ofooki̱ri̱ b̯wicalu b̯wa mizumu,
kandi, b̯wicalu b̯wa mahi̱i̱hya na masega.
3 Hab̯wa ngesu zaalwo zibiibi,
lwasonasooni̱ri̱ bantu bensei̱ kukora bintu bibiibi na ku̱ramya bi̱si̱sani̱ mu mei̱so ga Ruhanga.
Bakama ba gigi nsi, bakoori̱ bya nsoni̱ hab̯wakubba, baahondeeri̱ ngesu za bikorwa byalwo bi̱lwakorengi̱.
Na basu̱u̱b̯u̱zi̱ ba maani ba mu gigi nsi, baagu̱daheeri̱ hab̯wa kwegomba kwalwo kubiibi kulwali nakwo.”
4 Hei̱nyu̱ma gya yogwo malayika kukoba yatyo, nyeegwi̱ri̱ iraka lindi kuruga mwiguru nilikoba yati,
“Mwi̱ru̱ke, nywe bantu bange!
Mwi̱ru̱ke, mwehale bantu ba mu lu̱lwo rub̯uga Bbabbu̱looni̱.
Mwi̱ru̱ke bibii byab̯u, aleke mwehale kifubiro kyab̯u.
5 Hab̯wakubba bibii byab̯u bi̱kanyi̱reeni̱ maani mu mei̱so ga Ruhanga,
Ruhanga akugyenda kubafubira.”
6 Mwomwo Ruhanga yaaragira yogwo munyakubba na b̯u̱sobozi̱ b̯wa kufubira naakoba yati,
“Bakoleho bab̯wo, nka bo ku̱bakoori̱ho bandi.
Kandi, nka ku̱bakoori̱ho bandi neitamiiro lya bibii byab̯u,
balina kutunga kifubiro kikukiraho itamiiro lyab̯u mirundi mibiri.
7 Bantu ba mu lu̱lwo rub̯uga,
beeheeri̱ ki̱ti̱i̱ni̱sa kya ku̱koresyanga bintu bya mihendu minene,
nahab̯waki̱kyo, basemereeri̱ kuhaab̯wa kifubiro kya b̯u̱ru̱mi̱ b̯unene.
Beehaariiza nibakoba yati,
‘Twetwe bakama bakulema gigi nsi.
Tituli nka bamu̱kaabakwere beicala mu b̯ujune, bei̱tu̱ twe tituliwonaho b̯ujune kadi kadooli̱.’
8 Kale nu, hab̯wa myehaariizo myab̯u mi̱myo,
baliwona b̯ujune ni̱b̯u̱bei̱zi̱ra.
Mu kiro ki̱mwei̱ kisa, bantu bensei̱ ba mu lu̱lwo rub̯uga,
bakwi̱za kwezagya batali na bidyo bya kudya,
bandi bakwi̱za ku̱kwa na nseeri̱ zi̱kwi̱za ku̱bei̱zi̱ra.
Kandi, hab̯wakubba Mukama Ruhanga eicala Ruhanga wa maani,
rub̯uga lwab̯u lwensei̱, akwi̱za ku̱lu̱zi̱kya na mworo.”
Kizabiro kya B̯ujune b̯wa Bbabbu̱looni̱
9 “Bakama bensei̱ bakagira b̯u̱sobozi̱ mu gigi nsi, banyakukora bibii bikwisana bya b̯wenzi̱, bya bab̯wo bantu ba mu lu̱lwo rub̯uga bi̱baakorengi̱, b̯ubaliwona rub̯uga nilukuhya na mworo, bali̱ku̱u̱mu̱lamwo kizabiro nibaliriira bantu ba mu rub̯uga.
10 Rub̯uga lu̱lwo Bbabbu̱looni̱ b̯ululibba nilukuhya, bahandu̱ bab̯wo ti̱bakwi̱za ku̱lwesegeerya heehi̱, hab̯wa b̯u̱ti̱i̱ni̱ b̯ubalibba nab̯wo. Kandi, balilira nibakoba yati,
“ ‘Ee, kamahanu Bbabbu̱looni̱!
Bbabbu̱looni̱ koowonaweeni̱, we munyakubba rub̯uga lunyamaani!
Kifubiro kyamu kwokwo yatyo ki̱i̱zi̱ri̱ mu kiro ki̱mwei̱!’
11 “Nahab̯waki̱kyo, basu̱u̱b̯u̱zi̱ banyamaani ba mu nsi zi̱zo, banyakutundanga bintu hali bantu ba mu Bbabbu̱looni̱, bakwi̱za kulira kizabiro kinyamaani hab̯wa rub̯uga lu̱lwo. Bakwi̱za kululiriira, hab̯wa kusaalirwa kuwona bafeereerwe bantu banyakugulanga bintu byab̯u bya muhendu.
12 Bantu ba mu lu̱lwo rub̯uga baagu̱lengi̱ bintu binene nka zaabbu, feeza, mahi̱ga ga muhendu; na ngoye za muhendu zikumeremeta, zi̱teebeerwe mu marangi̱ ganene, gakwahukana. Bintu bindi bi̱baagu̱lengi̱ zaali mbaahu za b̯uli mu̱li̱ngo, na bintu byensei̱ bi̱koleerwe mu masyangi ga nzegu̱, mu byoma bya b̯uli mu̱li̱ngo, na mahi̱ga ga muhendu gaku̱bi̱mba nnyu̱mba.
13 Bintu bindi bi̱baagu̱lengi̱yo byali b̯ubbaani, ndungo za nyeni̱, maaci ga vi̱i̱no, maku̱ta ga kudya, b̯u̱kooro na mpuule za nganu. Kandi, bindi mu bintu bi̱baagu̱lengi̱, byalingi bisolo nka nte, ntaama, mbaraasi hamwei̱ na bigaali bikasikwa mbaraasi. Baagu̱lengi̱ de na bantu, babaaforengi̱ beiru baab̯u.
14 “Bab̯wo basu̱u̱bu̱zi̱ balikoba yati, ‘Ee, bantu ba Bbabbu̱looni̱, bintu byensei̱ birungi, bya mitima myenyu̱ myendyengi̱, kabi̱mali̱ki̱ri̱ho! Bi̱ti̱i̱ni̱sa na bintu bibaha kwezegwa nka bantu ba hakyendi̱, byensei̱ bi̱mali̱ki̱ri̱ho. Kandi, nka ku̱bi̱mali̱ki̱ri̱ho, ti̱mu̱li̱i̱ra kubiwonaho.’
15 Hab̯wa kuwona bab̯wo bantu ba Bbabbu̱looni̱ banyakubaha b̯u̱gu̱u̱da b̯wensei̱ b̯ubaali nab̯wo nibakuwonawona hoi̱, kandi nibakutaaga mu b̯u̱ru̱mi̱, basu̱u̱b̯u̱zi̱ bab̯wo banyaku̱gu̱lyanga Babbabbu̱looni̱ bi̱byo bintu, bakwi̱za kwemeera hadei nibabasaasira. Balyemeera hadei nibali na b̯u̱ti̱i̱ni̱, nibakuteekereza ha b̯ujune na nnaku bi̱i̱zi̱i̱ri̱ bei̱ra baab̯u, nabo nka kubikugyenda ku̱bei̱zi̱ra. Nahab̯waki̱kyo, bakwi̱za kulira kizabiro kinyamaani nibakoba,
16 “ ‘Ee, kamahanu Bbabbu̱looni̱! Bbabbu̱looni̱ koowonaweeni̱, weewe munyukubba rub̯uga lunyamaani!
rub̯uga lu̱nyaku̱ku̱ma hab̯wa ki̱ti̱i̱ni̱sa kinene, nka kya mukama alweri̱ ngoye zikwangasana,
rub̯uga lu̱nyaku̱ku̱ma hab̯wa kulwala zaabbu na byoma bya muhendu mwi̱coti̱ na mu mikono.
17 Bei̱tu̱ mu kiro ki̱mwei̱, b̯u̱gu̱u̱da b̯wensei̱ b̯wa rub̯uga b̯ulwali nab̯wo, b̯u̱mali̱ki̱ri̱ho.’
“Kandi bab̯wo bahandu̱ ba maati̱ gakooto, na bakori̱ ba gagwo maati̱ ganyakulibaatyanga bi̱byo bintu, na bab̯wo bantu banyakub̯ungyanga bintu byab̯u, beemereeri̱ hadei.
18 Beemereeri̱ hadei, nibakuwona rub̯uga lu̱lwo nilukuhya, baalira nibakoba yati, ‘Kuruga kadei na kadei, tihakabbangaho rub̯uga lu̱nyaku̱ku̱ma nka rub̯uga lwa Bbabbu̱looni̱!’
19 Hei̱nyu̱ma, baagwi̱ri̱ hansi mwicuucu, baalira hab̯wa b̯ujune b̯unene b̯ubaalingi nab̯wo. Baali̱i̱ri̱ kizabiro kinyamaani baakoba yati,
“ ‘Bbabbu̱looni̱ rub̯uga lukooto, koowonaweeni̱!
Kubba bab̯wo banyamaati̱ na bab̯wo banyakusuub̯uranga bintu mu rub̯uga,
tibacaaloho!
Bei̱tu̱ mu kiro ki̱mwei̱ kisa, bantu ba mu lu̱lwo rub̯uga, tibacaaloho.
20 Mwomwo, nyeegwa iraka lindi nilikubaza kuruga mwiguru nilikukoba yati,
Nywe, bantu ba mwiguru mu̱semererwe na maani!
Mu̱semererwe nywe bantu ba Ruhanga, baragu̱ri̱ baamwe, kandi bakwenda ba Yesu̱ Ku̱ri̱si̱to!
Ruhanga afu̱bi̱i̱ri̱ bantu ba Bbabbu̱looni̱, hab̯wa bintu byensei̱ bibiibi, bi̱baakoori̱ nywe bantu baamwe.’ ”
21 Hei̱nyu̱ma, malayika yaasengi̱ri̱ i̱hi̱ga likooto, likwijanjana lumengu, yaalikasuka mwi̱taka. Kasi mwomwo, yaakoba yati,
“I̱hi̱ga li̱lyo nka ku̱ndi̱kasu̱ki̱ri̱,
kwokwo yatyo na rub̯uga Bbabbu̱looni̱ lu̱kwi̱za ku̱zi̱ka ndu̱syera cekeceke.
Ti̱lu̱li̱i̱ra kuzookaho kadi kadooli̱, nkei̱hi̱ga li̱lyo li̱nkasu̱ki̱ri̱ mu meezi̱, ku̱li̱tali̱i̱ri̱ra kuzooka.
22 Byembu bya bantu ba Bbabbu̱looni̱ bi̱baahi̱i̱mengi̱, bi̱dongo bi̱baaku̱u̱tengi̱ na bikwatu bindi byensei̱ bi̱baahi̱i̱misyengi̱, zibbe ndere na ngwara,
ti̱bali̱i̱ra kuzikuuta.
Mulimo gwensei̱ gwa b̯uli mu̱li̱ngo ti̱gu̱li̱i̱ra kuzookahoona.
Kadi libbe iraka lya mengu gikuswa,
ti̱bali̱i̱ra ku̱lyegwaho.
23 Tihaloho taara gyensei̱ gya mu rub̯uga gi̱li̱i̱ra kwaka.
Kandi maraka ga bab̯wo bantu bakuswera na bakuswerwa,
ti̱mu̱li̱i̱ra ku̱geegwa mu rub̯uga lu̱lwo lwa Bbabbu̱looni̱.
Basu̱u̱b̯u̱zi̱ ba Bbabbu̱looni̱, boobo banyakubba basu̱u̱b̯u̱zi̱ banyamaani, ba nsi gigi;
banyakwohya bantu ba mahanga gensei̱, na gagwo mahanga gaahaba.
24 Nahab̯waki̱kyo, bantu ba Ruhanga na baragu̱ri̱ baamwe na bab̯wo banyakwi̱twa, bensei̱ bei̱ti̱i̱rwe hab̯wenyu̱.
Kale nu, ibbanga lyab̯u lyensei̱, lili ha mi̱twe myenyu̱ nywe bantu ba Bbabbu̱looni̱.”