Kitabbu kya
Ru̱u̱si̱
Kwanjuura
Kiki kitabbu kibaza ha mu̱kali̱ gibakweta Ru̱u̱si̱ wa mu nsi gya Mowaabbu. Haaloho mu̱gi̱ gu̱mwei̱ gwa bʼI̱saleeri̱ gunyakubba gu̱demu̱ki̱ri̱ mu nsi gya Mowaabbu hab̯wa nzala ginyakubba gi̱gwi̱ri̱ mwihanga lyʼI̱saleeri̱. Omwei̱ mu basigazi ba mu gu̱gwo mu̱gi̱ yaatu̱ngi̱ri̱ yogwo muhala, Ru̱u̱si̱, yaamuswera.
Bei̱tu̱ hei̱nyu̱ma bantu ba mu gu̱gwo mu̱gi̱ bensei̱ baakwi̱ri̱ kutoolahoona maa mu̱gi̱ gi̱beetengi̱ Nahu̱me na bamukaabaana. Nahab̯waki̱kyo Nahu̱me yaacwi̱ri̱mwo yeemuka Bbeterehemu̱ mu bantu baamwe cali baali baru̱gi̱ri̱. Bei̱tu̱ mukaamwana waamwe, Ru̱u̱si̱, yaacwi̱ri̱mwo kugyenda na mubyala gyamwe, yeikiriza ku̱ramya Ruhanga wʼI̱saleeri̱.
Hali baadwereeri̱ Bbeterehemu̱ baali batali na kintu kyensei̱. Bei̱tu̱ Ruhanga yaabategekeeri̱ yaataho mudulu mu̱gu̱u̱da kandi murungi gi̱beetengi̱ Bbowaazi, munyakuswera Ru̱u̱si̱ kandi yaawoneera na Nahu̱me. Mu kuswerangana kwa Ru̱u̱si̱ na Bbowaazi, Ruhanga yaabaheeri̱ mwana wa b̯udulu gi̱beeti̱ri̱ Obbeedi̱. Obbeedi̱ yaali haaha Dau̱di̱, Dau̱di̱ munyakubba mukama wʼI̱saleeri̱.
Bicweka bi̱handu̱ mu kiki kitabbu nka ku̱bi̱honderegeeni̱
Nahu̱me niyeemuka na Ru̱u̱si̱ mu Bbeterehemu̱ Ru̱u̱si̱ 1:1-22
Ru̱u̱si̱ naaromba na Bbowaazi Ru̱u̱si̱ 2:1—3:18
Bbowaazi naatwala Ru̱u̱si̱ kubba mu̱kali̱ waamwe Ru̱u̱si̱ 4:1-22
1
Eri̱mereki̱ na Mu̱gi̱ Gwamwe Nibali mu Mowaabbu
1-2 Mu biro bya kadei, hali balemi̱ bʼI̱saleeri̱ baali basali ba misangu, haagwi̱ri̱ho nzala gya maani hoi̱ mu nsi gi̱gyo gyʼI̱saleeri̱. Kandi haaloho mudulu gi̱beetengi̱ Eri̱mereki̱ wa mu luganda lwʼEfu̱raati̱, munyakwicalanga mu rub̯uga lwa Bbeterehemu̱ mu Yu̱da. Yogwo mudulu yaaru̱gi̱ri̱ mu gi̱gyo nsi hamwei̱ na mu̱kali̱ waamwe gi̱beetengi̱ Nahu̱me na batabani̱ babiri babeetengi̱ Mahalooni̱ na Ki̱ryoni̱, baagyenda kwicala mu nsi gya Mowaabbu.
3 B̯ubaali nibacaali mu nsi gya Mowaabbu, Eri̱mereki̱ yaakwa, Nahu̱me yaasigala na batabani̱ baamwe babiri.
4 Hei̱nyu̱ma bab̯wo batabani̱ ba Nahu̱me baatu̱ngi̱ri̱ bakali̱ bakuswera kuruga mu bantu ba Mowaabbu. Omwei̱ hali bab̯wo bakali̱ baamwetengi̱ Oru̱pa na wondi Ru̱u̱si̱. Bei̱tu̱ hei̱nyu̱ma gya myaka nkei̱ku̱mi̱,
5 na batabani̱ ba Nahu̱me nabo baakwa. Ku̱kwa kwab̯u kwamu̱ti̱gi̱ri̱ yankei, atali nei̱ba na batabani̱.
Nahu̱me na Ru̱u̱si̱ Nibeemuka mu Bbeterehemu̱
6 Bei̱tu̱ Nahu̱me b̯uyaali nacaali mu Mowaabbu, yeegwi̱ri̱ho makuru gakukoba Mukama nka ku̱yaaju̱ni̱ri̱ bab̯wo bantu bʼI̱saleeri̱ yaabaha kwerya bidyo binene. Nahab̯waki̱kyo yeetegeka na bamukaabaana baamwe kwemuka kwamwab̯u.
7 Mu kuruga hahwo cali yei̱calengi̱ yaasetu̱ki̱ri̱ na bamukaabaana baamwe babiri, baatandika kulibata kwi̱rayo mu nsi gya Yu̱da.
8 Bei̱tu̱ hei̱nyu̱ma Nahu̱me yaaweera bamukaabaana baamwe yati, “Mwemu̱ke, b̯uli muntu agyende kwamwab̯u hali mmaawe. Nka kumwali na mbabazi̱ hali bei̱ba beenyu̱ na hali gya, nanywe nkubasabira, Mukama abagiire mbabazi̱.
9 Mukama abahe b̯uli omwei̱ kuswerwa. Abahe b̯u̱si̱nge mu maka geenyu̱ gahyaka.”
Kasi kandi yaabagwa mu salaka yaabaraga, bei̱tu̱ bo baatamwo kizabiro, baalira.
10 Baamwi̱ri̱ri̱mwo nibamuweera, “Twe tukugyenda kwicala nawe mu bantu baamu.”
11 Bei̱tu̱ yaabei̱ri̱ri̱mwo naabaweera, “Baana bange, mwemu̱ke kwamwenyu̱. Kikyani kikubaha kugyenda nagya? B̯u̱b̯wo nagya de mu̱ku̱nni̱hi̱ra kubba nimbyalayo baana bandi ba b̯udulu balibba bei̱ba beenyu̱?
12 Baana bange, mwemu̱ke hali babyeru̱ beenyu̱, hab̯wakubba ngu̱lu̱u̱si̱ri̱ tincakasobora kutunga mudulu akunswera. Kadi nab̯wo, mbenge nincali na kyeni̱hi̱zo kya kubyala mu biteekerezu byange, rundi, mbenge nindi na mudulu deeru lili, nkabyala baana ba b̯udulu,
13 mwakeicala mu̱bali̱ndi̱ri̱ri̱ ku̱doosya babbeeri̱ basigazi bahandu̱? Mwakali nimwicala mutasweberwe hab̯wab̯u? Tikikusoboka, bamukaabaana bange. Gya b̯ujune b̯undinab̯wo b̯ukukira b̯wenyu̱ b̯umuli nab̯wo, hab̯wakubba Mukama yooyo ankoori̱ yati.”
14 B̯u̱beegwi̱ri̱ yatyo baatamwo kizabiro kindi. Kasi mwomwo Oru̱pa yaagwa mubyala gyamwe mu salaka yaamuraga, bei̱tu̱ Ru̱u̱si̱ yaamwehomereeri̱.
15 Nahu̱me yaamuweera, “Wona, mukaamuramwo alimukwemuka hali bantu baamwe na hali baruhanga baamwe. Gyenda nayo.”
16 Ru̱u̱si̱ yei̱ri̱ri̱mwo mubyala gyamwe naamuweera yati, “Leka kumpambiriza kwemuka. Cali okugyenda hooho nkwi̱za kugyenda, cali okwicala hooho nkwi̱za kwicala. Bantu baamu baabbanga bantu bange, na Ruhanga waamu yaabbanga Ruhanga wange.
17 Cali oligwa hooho ndigwa, kandi hooho ndiziikwa. Nku̱rahi̱ri̱i̱ri̱, gya nawe lu̱ku̱u̱ lwolwo luli twahu̱kani̱a, bei̱tu̱ kakubba nkurugaho mu mu̱li̱ngo gwensei̱, Mukama yanfubiranga na kifubiro kinyamaani.”
18 Nahu̱me b̯u̱yaakakyetegeri̱i̱ze nka Ru̱u̱si̱ kuyaalingi amali̱ri̱i̱ri̱ ki̱mwei̱ kugyenda nayo, atakab̯u̱u̱ni̱e kumuweera kintu kya kwemuka kwamwab̯u.
19 Nahab̯waki̱kyo kwokwo yatyo bab̯wo bakali̱ babiri baagyendi̱ri̱ hamwei̱ ku̱doosya b̯u̱baadoori̱ Bbeterehemu̱. B̯u̱baadoori̱ Bbeterehemu̱ rub̯uga lwensei̱ lwajagaara hab̯wa bab̯wo bantu babiri. Mwomwo bakali̱ ba mu̱mwo mu rub̯uga beeb̯u̱u̱lya, “Yogwo mu̱kali̱ yaakubba Nahu̱me kwo?”
20 Nahu̱me yaabei̱ri̱ri̱mwo naakoba, “Mu̱leke kunzeta Nahu̱me, mu̱nzete Maara, hab̯wakubba Ruhanga Wab̯u̱sobozi̱ B̯wensei̱ andeeteeri̱ b̯ujune mu b̯womi b̯wange.
21 B̯u̱nyaaru̱gi̱ri̱ haha nyaagyendi̱ri̱ nindi na mu̱gi̱ na bintu bikumala, bei̱tu̱ Mukama anzi̱ri̱i̱rye ntali na kintu. Haloho nsonga gyensei̱ gikubaha kunzeta Nahu̱me? Mukama Wab̯u̱sobozi̱ B̯wensei̱ yooyo andeeteeri̱ kuwonawona, kandi yooyo andeeteeri̱ b̯ub̯u b̯ujune.”
22 Kwokwo yatyo Nahu̱me yei̱ri̱ri̱ kuruga mu nsi gya Mowaabbu na mukaamwana waamwe, Ru̱u̱si̱, Nyakamowaabbu. Hali baadwereeri̱ Bbeterehemu̱, b̯u̱su̱mi̱ b̯u̱b̯wo b̯wali b̯wa bantu kutandika kukesa nganu.