94
1 Ai̱ Mukama, Ruhanga ofubira basobeerye,
woolokya ki̱ni̱ga kyamu, obafubire!
2 Byoka ai̱ we ocwera nsi gyensei̱ misangu,
cwera ba myehembo ku̱ki̱semereeri̱.
3 Ai̱ Mukama babiibi bali̱doosya di̱i̱,
bali̱doosya hanya kwetembya?
4 Babaza bigambu bya kwehaariiza,
nkori̱ za bibii ziicala ni̱zeetembya.
5 Ai̱ Mukama zi̱zi̱kya bantu baamu,
ni̱zi̱wonawonesya bantu bawakomi̱ri̱mwo.
6 Bei̱ta bamukaabakwere na banyamahanga
kandi ni̱bazi̱ri̱zi̱nda nfu̱u̱zi̱,
7 nibeweeragana yati, “Mukama takubiwona,
kandi Ruhanga wa Yakobbo bi̱byo tabifaaho.”
8 Mwetegereze, nywe mpwi̱si̱,
badoma nywe mulikenga di̱i̱?
9 Yogwo munyakuhanga mapokopo ti̱yeegwa?
Yogwo munyakukora mei̱so, tawona?
10 Yogwo afubira mahanga, takusobora kukufubira?
Yogwo yeegi̱ri̱ b̯uli kintu, takusobora kwega kyolimu kukora?
11 Mukama yeega biteekerezu bya bantu,
nka kubitali bya mugasu.
12 Ai̱ Mukama, kaali na mu̱gi̱sa yogwo gyohab̯ura,
okamwegeesya biragiro byamu.
13 Aleke atunge kuhumula mu b̯wi̱re b̯wa b̯ujune,
ku̱doosya babiibi b̯ubalibatemera ki̱i̱na.
14 Kubba Mukama talilekeera bantu baamwe,
talibahemukira.
15 Barungi balitunga b̯winganiza,
kandi ba mitima mi̱terekereru̱ balib̯uhondera.
16 Naani munyakwemeera nagya ku̱lwani̱sya babiibi?
Naani munyakukwatagana na gya ku̱lwani̱sya nkori̱ za bibii?
17 Kabbenge Mukama atanju̱ni̱ri̱,
nyaali heehi̱ kubba mu nsi gya baku̱u̱.
18 Ai̱ Mukama, b̯u̱nyateekereze nkukibbala,
hooho ngonzi zaamu zinene zanju̱ni̱ri̱.
19 Mutima gwange b̯ugubba nigukutuntura bintu binene,
nompu̱mu̱u̱lya mwozo gwange.
20 Balemi̱ babiibi banyakukora byeitima bakabirabya mu kiragiro,
basobora kwekwata nawe?
21 Beekoba hamwei̱ mwa kwi̱ta bamananu,
na ku̱zi̱ri̱zi̱nda bab̯wo batali na musangu.
22 Bei̱tu̱ Mukama yooyo kigo kyange kinyamaani,
kandi Ruhanga wange yooyo lubbaali lwa b̯wi̱ru̱ki̱ro b̯wange.
23 Alibasasula hab̯wa bibii byab̯u,
abahwerekereerye hab̯wa b̯ubiibi b̯wab̯u,
Mukama Ruhanga weetu̱ alibatooleraho ki̱mwei̱.