92
Zabbu̱li̱. Kyembu kya Sabbaato.
1 Kakirungi ku̱si̱i̱ma Mukama,
na kuhaariiza ibara lyamu, we Waahakyendi̱ Hoi̱,
2 kakirungi kwatula ngonzi zaamu zinene mwakya karei,
na kurangiira b̯wesigwa b̯wamu i̱jolo,
3 ni̱tu̱hi̱i̱ma na ndi̱ngi̱di̱ nitukuuta bi̱dongo.
4 Ai̱ Mukama, ompa kusemererwa hab̯wa bi̱byo byensei̱ byokoori̱,
bindeetera ku̱hi̱i̱ma na masanyu.
5 Ai̱ Mukama! Bintu byokora ka byamaani,
biteekerezu byamu bi̱nki̱i̱ri̱ kubyetegereza.
6 Muntu mu̱pu̱u̱ti̱ tasobora kwega,
mudoma tasobora kwetegereza.
7 Babiibi nab̯ubalihanda b̯wangu nkeisubi,
na nkori̱ za bibii nizikakanya,
balihwerekeera.
8 Ai̱ Mukama oli Waahakyendi̱ Hoi̱ biro byenseenya.
9 Ai̱ Mukama, wona banyanzigwa baamu,
wona nka kubalihwerekeera,
nkori̱ za bibii zensei̱ ziliswaswanika.
10 Bei̱tu̱ gya ompeeri̱ maani nka ga mpeta,
wambwomi̱ro maku̱ta ga muhendu.
11 Mei̱so gange gaweeni̱ ku̱si̱ngu̱rwa kwa banyanzigwa bange,
mapokopo gange geegwa itoko lya kuhwerekeera kwab̯u.
12 Barungi balinyirira nka nsansa,
kandi balifooka baamaani̱ nka mupoi gwa Lebbanooni̱.
13 Babateeri̱ mu nnyu̱mba gya Mukama,
balihandira mu zi̱gati̱ za Ruhanga weetu̱.
14 Baliteeka byana na mu b̯u̱gu̱lu̱u̱su̱,
nibali na rutege kandi basi̱gi̱ku̱,
15 kwolokya Mukama nka kwali Murungi,
lubbaali lwange yogwo ateicalamwo nsobi̱ kadi gi̱mwei̱.