Kitabbu Kyakanei
90
(Zabbu̱li̱ 90—106)
Kusaba kwa Mu̱sa, mudulu wa Ruhanga.
1 Ai̱ Mukama, oli b̯wicalu b̯wetu̱
biro na biro.
2 Otakahangi̱ri̱ nsahu,
kandi otakahangi̱ri̱ nsi na bilimwo
kuruga kadei na kadei obba Ruhanga.
3 Oragira bantu ni̱bakwa,
ni̱bei̱ra icuucu.
4 Myaka ru̱ku̱mi̱ mu mei̱so gaamu miisana kiro ki̱mwei̱,
mibba nka kiro kyei̱zo kinyakurabaho,
rundi nka b̯wi̱re b̯wei̱jolo kuwanguha.
5 Obbu̱tya bantu nka mwizulo,
tumalikaho b̯wangu kukira na kilooto.
Tuli nkeisubi limera mwakya karei,
6 mwakya karei lyakya ni̱li̱nyi̱ri̱ra,
joojolo lihotoka nilyoma.
7 Ki̱ni̱ga kyamu ki̱twi̱ta b̯wi̱ti̱,
tu̱saali̱i̱rwe nu hab̯wa b̯usungu b̯wamu.
8 Bibiibi byetu̱ waabiteeri̱ mu mei̱so gaamu,
bibiibi byensei̱ bya nsita waabi̱weeni̱.
9 Biro byetu̱ bikeehaho wangu hab̯wa ki̱ni̱ga kyamu,
myaka myetu̱ mimalikaho wangu nka kiyayamuko.
10 Myaka myetu̱ miicala nsanju,
b̯utubba na maani tu̱doosya kinaanei,
bei̱tu̱ b̯unene b̯wamyo b̯wicala b̯ujune na kuwonawona,
mimalikaho b̯wangu kandi ni̱tu̱syeraho.
11 Naani yeegi̱ri̱ maani ga ki̱ni̱ga kyamu?
Naani yeegi̱ri̱ b̯u̱ti̱i̱ni̱ wa ki̱ni̱ga kyamu kikusobora kuleeta?
12 Twegesye kubala biro bya b̯womi b̯wetu̱,
aleke tubbe na mutima gwa magezi̱.
13 Ai̱ Mukama, i̱ra, olitubihiriirwa ku̱doosya di̱i̱?
Ganyira baheereza baamu!
14 B̯uli mwakya karei twi̱cu̱tyenge ngonzi zaamu zinene,
kwokwo twicalenge nitujaguza kandi nitusemererwa biro byetu̱ byensei̱.
15 Tu̱he kusemererwa kunene, kukwijanjana na biro bi̱watu̱wonawoneseeryemwo,
na myaka minene kwijanajana na mitwamaari mu b̯ujune.
16 Leka milimo myamu myezolokye mu baheereza baamu,
na ki̱ti̱i̱ni̱sa kya maani gaamu kizookere mu beizukulu baab̯u.
17 Ai̱ Mukama Ruhanga, tu̱he mi̱gi̱sa myamu,
otuhe ku̱si̱ngu̱ra mu milimo myetu̱,
ee, otuhe ku̱si̱ngu̱ra milimo myetu̱.