79
Zabbu̱li̱ gyʼAsafi̱.
1 Ai̱ Ruhanga, banyamahanga banyagi̱ri̱ nsi gyamu,
baaheneeri̱ nnyu̱mba gyamu gi̱syanu̱,
Yeru̱salemu̱ baagi̱ri̱i̱rye makandi.
2 Mitumbi mya baheereza baamu, bami̱heeri̱ masega,
myomyo byakudya byago,
mibiri mya barungi baamu,
bami̱heeri̱ bisolo bya mwirungu.
3 Babbwomi̱ri̱ ibbanga lyab̯u nka bakubbwoma meezi̱,
kwetoroora Yeru̱salemu̱ gyensei̱,
kandi tihaloho na muntu wa kubaziika.
4 Twi̱ri̱ri̱ kintu kya ku̱lu̱mwa hali bataahi̱ batwelogoleerye,
baku̱tu̱jooga nibatugaya.
5 Ai̱ Mukama, oliicala osali̱i̱rwe biro byensei̱?
Ki̱ni̱ga kyamu ki̱lyokya nka mworo kudwa di̱i̱?
6 Kimalire ha mahanga gatakwegi̱ri̱,
na makama gaateeta ibara lyamu!
7 Hab̯wakubba, googo gei̱ti̱ri̱ beizukulu ba Yakobbo,
gaaswaswana na nsi gyamwe.
8 Otatufubira hab̯wa b̯ubiibi b̯wa bahaaha beetu̱,
ganyira, i̱za b̯wangu,
tituli na ku̱ni̱hi̱ra.
9 Ai̱ Ruhanga weetu̱ tu̱li̱nde kurungi,
tu̱ju̱ne otucungure,
otuganyire bibii byetu̱,
aleke ibara lyamu tulihe ki̱ti̱i̱ni̱sa.
10 Mahanga kagatu̱b̯u̱u̱li̱i̱rye maani yati,
“Ruhanga weenyu̱, ali hanya?”
Gafubire twensei̱ nitukuwona,
hab̯wa kubbwoma ibbanga lya baheereza baamu!
11 Weegwa kutaaga kwa banyankomo,
leka maani gaamu gajune bab̯wo
bakugyenda ku̱kwa!
12 Ai̱ Mukama, banyamahanga basasule mirundi musanju,
hab̯wa ku̱ku̱lu̱ma ku̱baku̱lu̱mi̱ri̱.
13 Twe bantu baamu,
ntaama za mwi̱li̱si̱i̱ryo lyamu,
tu̱li̱ku̱si̱i̱ma biro na biro,
tukuhaariize biro byensei̱ bi̱kwi̱za.