77
Hali mu̱handu̱ wa bahi̱i̱mi̱: bikukwata ha Jedu̱sani̱. Zabbu̱li̱ gyʼAsafi̱.
1 Nkuutira ki̱mwei̱ mukungu hali Ruhanga,
mukungira ki̱mwei̱, kandi aku̱nzegwa.
2 Mu b̯wi̱re b̯wange b̯wa b̯ujune, ntoolereerya Mukama,
tinjwaha ku̱byokya mikono myange i̱jolo lyensei̱,
kandi ti̱nkabbeeri̱ kuhumula mu mutima gwange.
3 B̯unteekerezaho Ruhanga, nindira,
b̯uncumitiriza mwozo gwange nigusalika.
4 Weewe ankwata nkwihi za mei̱so, ndemwe kwebbaka,
tindi na kyakubaza hab̯wa b̯ujune b̯undi nab̯wo.
5 Nteekereza ha biro byange bya kadei,
ni̱nyi̱zu̱ka myaka myei̱nyu̱ma.
6 I̱jolo lyensei̱ ndimalira mu biteekerezu,
b̯uncumitiriza nyeb̯u̱u̱lya yati,
7 “Mukama alitugumirisana kudwa di̱i̱?
Tali̱i̱ra kubba na mbabazi̱?
8 Ngonzi zaamwe zinene za kadei na kadei, zaamali̱ki̱ri̱?
Kweraga kwamwe kwa biro byensei̱ kuli hanya?
9 Ruhanga yeebereeri̱ kubba na mbabazi̱?
Hab̯wa ki̱ni̱ga, tacaali na kisa?”
10 Mwomwo nyaabazi̱ri̱ ninkoba yati, “Kiki kyokyo kikira kunsaliza,
nti Ruhanga, Waahakyendi̱ Hoi̱, tokyakatujuna.”
11 Ai̱ Mukama, b̯u̱ntekereza ha byokoori̱,
nyi̱zu̱ka byamahanu bi̱waakoori̱ kadei.
12 Nditeekereza ha milimo myamu,
mutima gwange ni̱gu̱toolereerya byensei̱ bi̱waakoori̱.
13 Ai̱ Ruhanga, muhanda gwamu gubba gutongoole.
Mbandwa kyani gikwijanjana Ruhanga weetu̱ wamaani?
14 Oli Ruhanga akora byamahanu,
woolokeerye b̯u̱sobozi̱ b̯wamu mu mahanga.
15 Waacu̱ngu̱u̱ri̱ bantu baamu na mukono gwamu,
baana ba Yakobbo na Yozefu̱.
16 Ai̱ Ruhanga, meezi̱ b̯u̱gaaku̱weeni̱,
meezi̱ b̯u̱gaaku̱weeni̱, gaati̱i̱na,
kwokwo na ndi̱ha gyakankeeni̱.
17 Byalu byabbwoma meezi̱,
iguru lyaleeta nkuba,
mbasi zaamu zaamyangasanengi̱.
18 Kyalu kyati̱ndi̱ri̱ mwiguru nkuba zaaserya hensei̱,
nsi gyakankeeni̱ kandi gyatengeeta.
19 Waasaari̱ nzira mwitaka,
waacwa itaka lilei,
bei̱tu̱ nab̯wo tihaloho munyakuwona lugere lwamu.
20 Weebembeeri̱ bantu baamu nkeigana lya ntaama,
nookoresya Mu̱sa nʼAlooni̱.