74
Masikili gyʼAsafi̱.
1 Ai̱ Ruhanga, hab̯waki otu̱gu̱mi̱reseeni̱ biro byensei̱?
Hab̯waki ki̱ni̱ga kyamu kibyokera ntaama za mwi̱li̱si̱i̱ryo lyamu?
2 I̱zu̱ka bantu baamu ba waagu̱u̱ri̱ kadei,
ki̱wacu̱ngu̱u̱ri̱ kibbe luganda lwa mugab̯u gwamu,
i̱zu̱ka lusahu Sayu̱u̱ni̱ hoicalira.
3 Gyendira ki̱mwei̱ odwe ha makandi ga biro na biro,
na ha Yeekaru gya munyanzigwa yaazi̱ki̱i̱rye kubiibi.
4 Banyanzigwa baamu baalu̱ki̱ri̱ mu Yeekaru,
baabyokya bbendera kwolokya nka ku̱basi̱ngwi̱ri̱.
5 Bei̱sanengi̱ nka bakweti̱ mpasa,
kutema misaali mu kibira.
6 Baatematemi̱ri̱ bintu biheese bya mbaahu byensei̱,
ni̱bakoresya mpasa na bipanga.
7 Yeekaru gyamu baagi̱kolereeryeho mworo,
baaswezi̱ cali baku̱rami̱i̱rya.
8 Baaweeragana yati, “Tubaswaswanire ki̱mwei̱,”
bookeerye marami̱i̱ryo gensei̱ ga Ruhanga mu nsi gi̱gyo.
9 Tituli na b̯wakuwoneraho b̯wamu,
tihacaalihoona mu̱ragu̱ri̱ waamu mu nsi,
kandi tihaloho akusobora kutuweera hakikumaliira.
10 Ai̱ Ruhanga, munyanzigwa, ali̱ku̱sekereerya ku̱doosya di̱i̱?
Biro byensei̱, yeicaalanga naalu̱ma ibara lyamu?
11 Hab̯waki otabba na kyokoori̱ho?
Hu̱lu̱kya mukono gwamu gwab̯udyo obazi̱kye.
12 Bei̱tu̱ nab̯wo, oli Ruhanga Mukama wange, wa kadei,
ojuna bantu mu nsi.
13 Waahu̱kani̱i̱rye itaka likooto na b̯u̱sobozi̱ b̯wamu,
waaku̱u̱ti̱ri̱ mi̱twe mya banyanzigwa ba mwitaka.
14 Waaku̱u̱ti̱ri̱ mi̱twe mya kihiri,
waakiha bihangwa bya mwihamba bikidye.
15 Weewe waaki̱ngu̱u̱ri̱ migira na mazu̱ba,
migira minyakwicalanga nimiheta kadei na kadei, weewe waamyomereerye ki̱mwei̱.
16 Mwinsi nei̱jolo byensei̱ byamu,
weewe waateeri̱ho bimuluka byensei̱ na kalyoba.
17 Waateeri̱ho mitaanu mya nsi,
waateekaho kyanda na kibbaga.
18 Ai̱ Mukama i̱zu̱ka munyanzigwa nka kwakukuseka,
kandi bantu badoma ku̱baku̱ku̱lu̱ma.
19 Otabahayo bantu baamu hali banyanzigwa baab̯u,
otalyebeeranga b̯womi wa banaku baamu.
20 I̱zu̱ka ndagaanu gi̱waakoori̱ natwe,
hab̯wakubba batemu bebi̱si̱ri̱ hensei̱,
mu biikaru bya mu nti̱ti̱ ku nsi gigi.
21 Oteikiriza muswaru gwa bantu baamu bakuwonawona,
bei̱tu̱ leka banaku na bali na byetaagu bahaariizenge ibara lyamu.
22 Ai̱ Ruhanga, byoka olwaniire ki̱ti̱i̱ni̱sa kyamu,
i̱zu̱ka badoma nka ku̱baku̱lu̱ma biro byensei̱.
23 Oteebeera myehu̱lo mya banyanzigwa baamu,
neitoko lyab̯u lya b̯uli kiro.