7
Zabbu̱li̱ gya Dau̱di̱ gi̱yaahi̱i̱mi̱i̱ri̱ Mukama hab̯wa Ku̱u̱si̱ wa mu luganda lwa Bbenyami̱i̱ni̱.
 
Ai̱ Mukama, Ruhanga wange, weewe gi̱nyeru̱ki̱i̱ranga,
njuna hali banyanzigwa bange bensei̱, oncungure.
Kitali ki̱kyo bei̱za kuntaagura nka ntali,
bancenkencenke, ndemwe muntu yanjuna.
Ai̱ Mukama Ruhanga wange, nyaabba nyaakoori̱ kintu nka kiki,
ngalu zange zaabba zaaheneeri̱,
nyaabba nyaadi̱i̱ri̱mwo rukwe munywani wange,
kadi habbe kunyaga banyanzigwa bange hataloho nsonga,
ikiriza munyanzigwa wange andonze ankwate,
mu̱leke angume hansi
anjurunge mu cuucu.
 
Ai̱ Mukama, mu ki̱ni̱ga kyamu ru̱mba,
byokira b̯ubiibi b̯wa banyanzigwa bange,
si̱si̱mu̱ka onjune, weewe ocwa gwab̯ulyo.
Leka mahanga geecooke mu mei̱so gaamu,
ogafugire hakyendi̱ mwiguru.
 
Mukama yooyo acwere bantu misangu,
ai̱ Mukama ncwera ku̱si̱gi̱ki̱ra ha b̯urungi b̯wange,
na mananu gange.
Leka bibii bya babiibi bibbe na ha bikusambiira,
kandi olindenge bab̯wo bakora bya mananu,
weewe ai̱ Ruhanga wa mananu, olenga biteekerezu bya mitima myetu̱.
 
10 Ruhanga Aki̱i̱rayo Ki̱mwei̱, weewe ngab̯u gyange,
mu̱li̱ndi̱ wa bab̯wo barungi mitima.
11 Ruhanga acwa misangu mya b̯ulyo,
afubira babiibi b̯uli kiro.
12 Kakubba muntu ateezi̱ramwo,
Ruhanga ahyolya nsone gyamwe,
naakora b̯uta na mbasi ze naazitegeka.
13 Ategeka byaku̱lwani̱sya binyamaani,
naataho mbasi zikwaka mworo.
14 Wona, mubiibi b̯uyeemeta kibii,
akabba na nda gya b̯ubiibi,
abyala b̯u̱gobya.
15 Atega bandi b̯u̱hya,
bei̱tu̱ yooyo ab̯ugwamwo.
16 Itima lye li̱i̱ra ha mu̱twe gwamwe,
ki̱ni̱ga kye ki̱ru̱mya yooyo yankei.
 
17 Nyaaku̱si̱i̱manga Mukama, hab̯wa mananu gaamwe,
nyaahi̱i̱manga bikuhaariiza ibara lya Mukama, Waahakyendi̱ Hoi̱.