66
Hali mu̱handu̱ wa bahi̱i̱mi̱. Zabbu̱li̱ kili Kyembu.
1 Muhaariize Ruhanga na kusemererwa,
bantu nywensei̱ ba mu nsi.
2 Hi̱i̱me ki̱ti̱i̱ni̱sa kyeibara lyamwe,
mu̱mu̱haari̱i̱ze na ki̱ti̱i̱ni̱sa!
3 Muweere Ruhanga yati, “Bintu byakora kwo bya b̯uzira,
maani gaamu gali ganene, gaha banyanzigwa baamu kwi̱za hali we nibagula b̯wagu̱li̱.
4 Bantu ba mu nsi gyensei̱ baku̱ramye,
kandi baku̱hi̱i̱mi̱ra kuhaariiza ibara lyamu.”
5 Mwi̱ze muwone Ruhanga byakoori̱ mu bantu,
byamaani kandi bi̱ku̱ti̱i̱ni̱sya!
6 Yaahi̱ndu̱u̱ri̱ itaka lyei̱ra nsi gyomu,
bali̱bati̱ri̱ na magulu hakati̱ wa meezi̱,
i̱ze aleke tujaguze muli yo.
7 Alema biro byensei̱ na b̯u̱sobozi̱ b̯wamwe,
mei̱so gaamwe gali̱ngi̱ri̱i̱ri̱ mahanga gensei̱,
bajeemu̱ baleke kumubyokeera.
8 Muhaariize Ruhanga weetu̱ nywe bantu,
leke iraka lya kumuhaariiza kwenyu̱ balyegwe,
9 atu̱li̱ndi̱ri̱ nituli boomi,
yaagaana magulu geetu̱ kukiibbala.
10 Ruhanga waatu̱lengi̱ri̱,
nka feeza kugiraba mu mworo.
11 Twakwatwa mutegu,
kabii katudwereera.
12 Waaleki̱ri̱ bantu batwicaara ha mi̱twe,
twarabi̱ri̱ mu mworo na mu meezi̱,
bei̱tu̱ mu byensei̱ waatu̱hu̱u̱mu̱u̱li̱i̱rye.
13 Nyei̱zanga mu yeekaru gyamu na bihongwa byokye,
ndosereerye kweraga kwange,
14 ku̱nyeeragi̱ri̱ na mu̱nwa gwange,
b̯unyaali nindi mu b̯ujune.
15 Nyaakuhongiranga bihongwa byokye bya bisolo bya masaju,
na mwi̱ca gwa kihongwa kya ntaama,
nyaakuhongiranga kisembu kya mbu̱li̱ na nte.
16 I̱ze mwetegeerye, nywe bati̱i̱na Ruhanga,
mbaweere byankoleeri̱.
17 Nyaamu̱ku̱ngi̱ri̱ na mu̱nwa gwange,
kalimi kange kalimi kumuhaariiza.
18 Kakubba bibii nyaalingi mbi̱bi̱si̱i̱ri̱ mu mutima gwange,
Mukama yaaku̱bbeeri̱ atanzegwi̱ri̱.
19 Bei̱tu̱ Ruhanga yeetegeerye
kandi yeegwi̱ri̱ iraka lyange ninkusaba.
20 Ki̱ti̱i̱ni̱sa kibbe hali Ruhanga,
atanu̱gi̱ri̱ kusaba kwange,
rundi kuntoolaho ngonzi zaamwe zinene.