54
Hali mu̱handu̱ wa bahi̱i̱mi̱. Ni̱bakoresya kikwatu kya mahu̱u̱zi̱. Masikili gya Dau̱di̱. Zi̱faati̱ b̯u̱baagyendi̱ri̱ kandi baweera Sau̱lo yati, “Dau̱di̱ yeebi̱si̱ri̱ muli twe.”
1 Ai̱ Ruhanga, njuna hab̯wa ibara lyamu,
kandi ontooleho musangu hab̯wa maani gaamu.
2 Ai̱ Ruhanga, weegwa kusaba kwange,
tegera mapokopo bigambu bya kanwa kange.
3 Hab̯wakubba bamyehaariizo bambyokereeri̱,
batemu bakwendya ku̱nzi̱ta,
kubba ti̱bati̱i̱na Ruhanga.
4 Wona, Ruhanga yooyo Mu̱ju̱ni̱ wange,
Mukama ali mpagi̱ gya b̯womi b̯wange.
5 Banyanzigwa bange ali̱bei̱ri̱i̱rya b̯ubiibi b̯wab̯u,
hab̯wa b̯wesigwa b̯wamwo bahwerekeereerya.
6 Ai̱ Mukama nyaakuhongiranga kihongwa nsemereerwe,
nyaasi̱i̱manga ibara lyamu kubba lili lirungi.
7 Hab̯wakubba wancu̱ngu̱u̱ri̱ kuruga mu b̯ujune b̯wensei̱,
mei̱so gange gaweeni̱ banyanzigwa bange basi̱ngi̱i̱rwe.