5
Hali mu̱handu̱ wa bahi̱i̱mi̱, bya kikwatu kya ndere: Zabbu̱li̱ gya Dau̱di̱.
1 Ai̱ Mukama, weetegeeryanga bigambu byange,
oteekerezenge ha kuwonawona kwange.
2 Weegwanga iraka lya b̯ujune b̯wange,
Mukama kandi Ruhanga wange,
hab̯wakubba ndiriira weewe.
3 B̯uli mwakya, ai̱ Mukama, weegwa iraka lyange,
b̯uli mwakya nndeeta kihongwa, nindindiira onzi̱remwo.
4 Kubba oli Ruhanga atasi̱i̱ma bikorwa bibiibi,
nkori̱ za bibii tiziicala nawe.
5 Banyamyehembu tibalyemeera mu mei̱so gaamu,
onoba nkori̱ za bibii zensei̱.
6 Ohwerekererya bab̯wo babaza b̯u̱gobya,
Mukama anoba bantu batu̱u̱bi̱ri̱ kubbwoma ibbanga na ku̱gobya.
7 Bei̱tu̱ hab̯wa ngonzi zaamu zinene,
nyei̱zanga mu nnyu̱mba gyamu gi̱syanu̱,
nyaaku̱ndanga malu̱ ni̱nku̱ramya
mu ki̱ti̱i̱ni̱sa kinene.
8 Ai̱ Mukama, nyeebemberanga mu mananu gaamu
hab̯wa banyanzigwa bange,
onterekereeryenge mu muhanda gwamu.
9 Hab̯wakubba tibabaza mananu,
bateekerereza mu kukora bibiibi.
Mimiro myab̯u mili nka bituuru bib̯uule,
mi̱nwa myab̯u mibaza b̯u̱gobya.
10 Ai̱ Ruhanga, bahe kifubiro,
leka bagwenge mu mitegu myab̯u bankei.
Babinge mu mei̱so gaamu hab̯wa bibii byab̯u binene,
hab̯wakubba baku̱jeemeeri̱.
11 Bei̱tu̱ bensei̱ bakwesiga leka basemererwe,
leka baku̱hi̱i̱mi̱re mu kusemererwa kunene biro byensei̱.
Obatengeho b̯u̱li̱ndi̱ b̯wamu,
aleke bab̯wo bendya ibara lyamu bakutendenge.
12 Kubba weewe, ai̱ Mukama, oha muntu mwesigwa mu̱gi̱sa,
mbabazi̱ zaamu nizimubbumba nka ngab̯u.