49
Hali mu̱handu̱ wa bahi̱i̱mi̱. Zabbu̱li̱ gya baana ba Koora.
1 Bantu nywensei̱ mwetegeerye,
mwegwe kinkukoba nywensei̱ bali hansi,
2 wa ki̱ti̱i̱ni̱sa na wa hansi,
mu̱gu̱u̱da rundi museege.
3 Bimbaza bibba bya magezi̱,
kandi biteekerezu byange bibba na makuru.
4 Mapokopo gange nyaagei̱calyanga ku ngeera,
bi̱koi̱kyo byange ni̱mbi̱ti̱ra mu kukuuta ndi̱ngi̱di̱.
5 B̯u̱ti̱i̱ni̱ b̯unkwatira ki mu b̯wi̱re b̯wa b̯ujune,
banyanzigwa b̯ubabba banyeelogoleerye.
6 Bab̯wo beesiga b̯u̱gu̱u̱da b̯wab̯u,
nibehaariizisya b̯unene b̯weitungu lyab̯u.
7 Mu mananu tihaloho muntu akusobora kujuna wondi,
rundi kusasulira muhendu gwa b̯womi b̯wamu hali Ruhanga.
8 Kili kya muhendu gunene, kwi̱ryaho b̯womi b̯wamu,
tooli na kyokusobora kusasula Ruhanga akadweb̯wa,
9 we kwicala nooli mwomi biro byensei̱,
kandi okakena lu̱ku̱u̱.
10 Kubba tuwona ba magezi̱ ni̱bakwa,
mpwi̱se na batakukenga de ni̱bakwa,
kasi nsimbi zaab̯u nizisigala kudi̱b̯wa bandi.
11 Nyanga zoozo zi̱i̱ra kubba maka gaab̯u ga biro na biro,
nab̯ubakabba baali na matehe gaab̯u hab̯wab̯u.
12 Muntu mu ki̱ti̱i̱ni̱sa kyamwe kya b̯untu talisigalaho,
eisana nka bisolo bihwerekeera.
13 Bibi byobyo bikora mpwi̱se,
na beesiga bigambu bya badoma,
14 nka ntaama zi̱li̱ndi̱ri̱i̱ri̱ ku̱kwa,
lu̱ku̱u̱ lu̱kwi̱za ku̱bali̱i̱sya, lubagoromore mu nyanga.
Kasu̱mi̱ b̯ukalidwa, bantu ba Ruhanga balibafuga,
babahwerekereerye balemwe kwicala mu makaa gaab̯u garungi.
15 Bei̱tu̱ Ruhanga alincungura, anjune maani ga lu̱ku̱u̱.
16 Mitima myenyu̱ mitalyalyatiranga itungu lya muntu wondi
rundi ki̱ti̱i̱ni̱sa kya makaa gaamwe kweyongera.
17 Kubba handaki bakwe itungu lyab̯u lyensei̱
bali̱ti̱ge i̱nyu̱ma lilemwe kumuhondira.
18 Twe bantu tu̱si̱i̱mwa b̯utubba tu̱koori̱ birungi,
twensei̱ tusemererwa kubba boomi.
19 Bei̱tu̱ tu̱kwi̱za kugyenda kuzumu,
hali bahaaha beetu̱,
nitub̯ula kwi̱ra kuwonaho,
kyererezi̱.
20 Ki̱ti̱i̱ni̱sa kyetu̱ kya b̯untu ni̱ki̱syeraho,
tuli nka bisolo bi̱kwa.