29
Zabbu̱li̱ gya Dau̱di̱.
1 Mu̱haari̱i̱ze Mukama bihangwa bili mwiguru,
mu̱haari̱i̱ze Mukama hab̯wa ki̱ti̱i̱ni̱sa na b̯u̱sobozi̱ b̯wamwe.
2 Mu̱haari̱i̱ze ibara lya Mukama lya ki̱ti̱i̱ni̱sa,
mu̱ramye Mukama mu kiikaru kyamwe ki̱syanu̱.
3 Iraka lya Mukama likwatukira mwitaka,
Ruhanga wa ki̱ti̱i̱ni̱sa abbwatu̱ki̱ri̱,
Mukama, yooyo afuga mataka ganene.
4 Iraka lya Mukama lya maani,
iraka lya Mukama lya ki̱ti̱i̱ni̱sa kinene.
5 Iraka lya Mukama, libinya mi̱poi̱,
Mukama abinya misaali mya Lebbanooni̱.
6 Aragira nsahu za Lebbanooni̱ ni̱zi̱gu̱su̱ka nka kusemererwa kwa nnyana
na lusahu lwa Si̱ryoni̱ ku̱gu̱su̱ka nka nnumi gito.
7 Iraka lya Mukama li̱hu̱lu̱kya mworo.
8 Iraka lya, Mukama li̱zi̱ngi̱i̱zya ihamba,
Mukama azi̱ngi̱i̱zya nsi gya ihamba lya Kadesi̱.
9 Iraka lya Mukama li̱byali̱sya bbwoya,
li̱halangu̱li̱i̱rya bibira,
kandi mu Yeekaaru̱ gyamwe bintu byensei̱ bilira yati, “Ki̱ti̱i̱ni̱sa kibbe hali Mukama!”
10 Mukama eicaara ha kitebe kyamwe hakyendi̱ kulema meezi̱ ga mwizulo,
Mukama ei̱cali̱i̱ri̱ ha kitebe kyamwe kulema biro na biro.
11 Mukama yaahanga bantu baamwe maani,
Mukama yaabahanga mu̱gi̱sa na b̯u̱si̱nge!