16
Zabbu̱li̱ gya Dau̱di̱.
1 Ai̱ Ruhanga, ondinde,
hab̯wakubba nyeesiga weewe.
2 Nyaaku̱ngi̱ri̱ Mukama ninkoba yati, “Weewe Mukama wange,
hali otali tindi na karungi kensei̱.”
3 Hab̯wa bantu ba Ruhanga ba mu nsi
bali na bi̱ti̱i̱ni̱sa, ndi̱basi̱i̱ma,
4 bei̱tu̱ b̯ujune ku b̯ujune b̯ulibba hali bakuramya ruhanga wondi,
kyonzira kyeibbanga kyab̯u tindi kihonga,
habbe kwatula mabara gaab̯u na kanwa kange, tindigeeta.
5 Ai̱ Mukama, weewe mutongoole wange,
ampa byensei̱ binkwetaaga, weewe oli na byensei̱.
6 Nsaru gyeitehe lyange gi̱ndeetera kusemererwa,
mu mananu mugab̯u gwange gurungi.
7 Nku̱ku̱si̱i̱ma Mukama hab̯wa ku̱zeegesya,
kadi habbe i̱jolo mutima gwange gumpa magezi̱.
8 Nkyegi̱ri̱, Mukama abba na gya biro byenseenya,
hab̯wakubba amba ha mukono gwange gwab̯udyo, ti̱ndi̱ti̱i̱na.
9 Nahab̯waki̱kyo, mutima gwange gu̱semereerwe hoi̱ kandi nyaaku̱hi̱i̱mi̱ranga,
na mubiri gwange gweicalanga mu b̯u̱si̱nge,
10 hab̯wakubba tolindeka kwicala kuzumu,
habbe kuleka mutongoole waamu kubbola.
11 Ompeeri̱ kwega muhanda gwa b̯womi,
kyandeetera kusemererwa mu mei̱so gaamu,
na kwesi̱i̱ma biro byensei̱.