147
1 Haari̱i̱ze Mukama!
Kubba kirungi kuhaariiza Ruhanga weetu̱,
kubba wambabazi̱, kandi ki̱doori̱ b̯u̱dwi̱ kumuhaariiza.
2 Mukama ali̱mu̱ku̱bi̱mba Yeru̱salemu̱,
acookacoori̱ Bei̱saleeri̱ banyakusaasaana.
3 Ahoni̱a banyamitima mya b̯ujune,
naajanjaba bihote byab̯u.
4 Nzota za mu mwanya, yooyo azibala,
b̯uli gi̱mwei̱ agyeta neibara.
5 Mukama weetu̱ wa maani hoi̱, kandi wa b̯u̱sobozi̱ b̯unene,
na kwetegereza kwamwe tikulengwa.
6 Mukama abyokya bab̯u̱ndaaru̱,
bei̱tu̱ babiibi abei̱calya hansi.
7 Mu̱hi̱i̱mi̱re Mukama ni̱mu̱mu̱si̱i̱ma,
mu̱mu̱hi̱i̱mi̱re Ruhanga weetu̱ kyembu kirungi na ndi̱ngi̱di̱!
8 Yooyo abbu̱mba iguru na bikaka,
ategeka ndagali̱ hab̯wa nsi,
amerya b̯usubi ha nsahu.
9 Aha bisolo bidyo byabyo,
na byana bya nnyoni̱ bikulira.
10 Kwesi̱i̱ma kwamwe kwicala kwahi mu maani ga mbaraasi,
habbe mu maani ga mahe,
11 bei̱tu̱ Mukama yeegondesya bab̯wo bamu̱ti̱i̱na,
bab̯wo bali na ku̱ni̱hi̱ra mu ngonzi zaamwe zinene.
12 Haari̱i̱ze Mukama, ai̱ Yeru̱salemu̱!
Ai̱ Sayu̱u̱ni̱, Ruhanga waamu ahaariizib̯we!
13 Kubba yooyo atati̱i̱rya byoma bya malembo gaamu,
kandi aha bantu baamu mu̱gi̱sa.
14 Ataho b̯u̱si̱nge ha mitaanu myamu,
kandi abei̱cu̱tya na nganu girungi ki̱mwei̱.
15 Atuma kiragiro kyamwe mu nsi,
kigambu kyamwe nikikorwa b̯wangu.
16 Asi̱ndi̱ka ndagali̱ gya mahi̱ga nka muguma byoza bya ntaama,
asaasaani̱a kiho nka mu̱tu̱ku̱u̱la i̱syanu̱.
17 Aguma ndagali̱ gya mahi̱ga nka mpulungu,
naani akusobora ku̱lwani̱sya b̯wi̱nyamu̱ b̯wamwe?
18 Aragira kigambu kyamwe kwagya mahi̱ga ga ndagali̱, nigaaga,
ata mpehu kuhunga, meezi̱ nigataraaka.
19 Yaatula naaweera Yakobbo kigambu kyamwe,
naateeraho I̱saleeri̱ mateeka gayaasomesya.
20 Takagakooranga yatyo mahanga gandi,
ti̱geegi̱ri̱ biragiro byamwe.
Haari̱i̱ze Mukama!