145
Zabbu̱li̱ gya Dau̱di̱ gya Kuhaariiza.
1 Ai̱ Mukama, nditumbula weewe Ruhanga wange,
ndihaariiza ibara lyamu biro na biro.
2 B̯ukyeb̯ukye nkwi̱za ku̱ku̱si̱i̱manga
nimpaariizanga ibara lyamu biro na biro.
3 Ahaariizwe hoi̱, Mukama waamaani,
b̯u̱handu̱ b̯wamwe ti̱b̯wetegerezib̯we.
4 Mu̱hi̱hi̱ gu̱mwei̱ ha gundi baahaariizanga bi̱waakoori̱,
ni̱batebya bikorwa byamu bya maani.
5 Hab̯wa ki̱ti̱i̱ni̱sa kinene kya b̯u̱handu̱ b̯wamu,
na hab̯wa milimo myamu myamahanu, nyabi̱teekerezangaho.
6 Baatebyanga bikorwa byamu bikuhuniriza bya maani,
nagya nyabazanga ha b̯u̱handu̱ b̯wamu.
7 Baasasani̱anga kaku̱u̱mi̱i̱re ka b̯urungi b̯wamu,
ni̱bahi̱i̱manga na maani ha mananu gaamu.
8 Mukama eicala mu̱ganyi̱ri̱ kandi wambabazi̱,
tabihirwa wangu, ngonzi zaamwe zinene tizihinduka.
9 Mukama abba murungi hali bensei̱,
na mbabazi̱ zaamwe zili hensei̱ ha bihangwa byamwe.
10 Ai̱ Mukama, byensei̱ bi̱waahangi̱ri̱ byaku̱si̱i̱manga,
na bantu baamu beesigwa bensei̱ baakuhaariizanga!
11 Baabazanga ha ki̱ti̱i̱ni̱sa kya b̯ukama b̯wamu,
ni̱banyu̱mya ha maani gaamu,
12 mwa ku̱manyi̱sya bantu bensei̱ bikorwa byamu bya maani
na ki̱ti̱i̱ni̱sa kya b̯ukama b̯wamu kya maani.
13 B̯ukama b̯wamu b̯wa biro na biro,
na b̯u̱sobozi̱ b̯wamu b̯wa biro byensei̱.
[Mukama abba wamananu mu bigambu byamwe byensei̱
kandi wambabazi̱ hali bintu byensei̱ bi̱yaahangi̱ri̱.]
14 Mukama asagika bensei̱ bagwa hansi,
abyokya bab̯wo bensei̱ bahi̱nyi̱rwe hansi.
15 Mei̱so ga bi̱hangi̱rwe byensei̱ gali̱ngi̱ri̱i̱ri̱ weewe,
obiha bidyo mu b̯u̱su̱mi̱ b̯wabyo.
16 Ob̯u̱u̱la ngalu zaamu,
noi̱cu̱tya b̯uli kintu kikali na b̯womi.
17 Mukama abba wamananu mu mihanda myamwe myensei̱,
kandi wangonzi hali bintu byensei̱ bi̱yaakoori̱.
18 Mukama abba heehi̱ hali bensei̱ bamukunga,
hali bab̯wo bensei̱ bamukunga mu mananu.
19 Bab̯wo bensei̱ bamutamwo ki̱ti̱i̱ni̱sa, abaha bibakwetaaga,
yeegwa kusaba kwab̯u na bajuna.
20 Mukama alinda bensei̱ bamwolokya ngonzi,
bei̱tu̱ babiibi bensei̱, ali̱bazi̱kya.
21 Mu̱nwa gwange gwahaariizanga Mukama,
binyakuhangwa byensei̱ kabihaariizenge ibara lyamwe li̱ti̱i̱nwa biro na biro.