132
Kyembu kya kutemba hakyendi̱.
1 Ai̱ Mukama, otalyebeera
byensei̱ bya Dau̱di̱ bi̱yaawonaweeni̱,
2 nka ku̱yeeragi̱ri̱ hali Mukama
yaarahira hali Ruhanga Waamaani wa Yakobbo naakoba yati,
3 “Tindigyenda mu nnyu̱mba gyange
habbe kulaala mu kitabbu kyange,
4 tindyebbaka,
habbe kuta b̯ulo mu mei̱so,
5 ku̱doosya b̯unditungira Mukama kiikaru,
hali Waamaani wa Yakobbo aliicaara.”
6 Twegwi̱ri̱ho ku Sandu̱u̱ko gya ndagaanu mu Efu̱raati̱,
twagyagi̱i̱rye mu misiri mya Yaara.
7 Twakoba yati, “Katugyenda mu kiikaru kyamwe hali eicala,
tu̱ramye hansi wa katebe ka magulu gaamwe!”
8 Ai̱ Mukama, i̱za cali ohuumulira,
uwe na Sandu̱u̱ko gya Ndagaanu,
kaboneru ka maani gaamu.
9 Leka balaami̱ baamu balwalenge mananu,
na beesigwa baamu baami̱i̱ryenge kusemererwa.
10 Hab̯wa muheereza waamu Dau̱di̱,
otalisuula mutongoole waamu.
11 Mukama yaarahi̱ri̱i̱ri̱ Dau̱di̱ kirahiro kya mananu
kyatalihindula, naakoba yati:
“Omwei̱ ha baana baamu boonyi̱ni̱
ndimuta ha kitebe kyamu kya b̯ukama.
12 Batabani̱ baamu b̯ubalilinda ndagaanu gyange
na bigambu byange bindibeegeesya,
na batabani̱ baab̯u de baliicaara
ha kitebe kyamu biro byensei̱.”
13 Hab̯wakubba Mukama yeekomeeri̱mwo Sayu̱u̱ni̱,
yaagyegombira ki̱mwei̱ kugiicalamwo,
14 “Kiki kyokyo kiikaru kinyahuumulirangamwo biro byensei̱,
hab̯wakubba nkyendeerye, hooho nyeicalanga.
15 Ndi̱kanyi̱sya bilimwa byakyo,
banaku baayo ndibaha kwicuta.
16 Balaami̱ baayo nyabalwalyanga kujunwa,
beesigwa baayo bahi̱i̱manga nibakusemererwa na mi̱zi̱ra.
17 B̯ukama b̯wa Dau̱di̱ ndib̯ufoora wamaani,
mutongoole wange abbe nka taara.
18 Banyanzigwa baamwe ndi̱bakwati̱sya nsoni̱,
bei̱tu̱ b̯ukama b̯wamwe b̯weicalanga na mu̱gi̱sa, nib̯ugaliha.”