108
Kyembu. Zabbu̱li̱ gya Dau̱di̱.
1 Ai̱ Ruhanga, mutima gwange guli gu̱si̱gi̱ku̱!
Nku̱hi̱i̱ma byembu birungi bya kukuhaariiza na b̯womi b̯wange b̯wensei̱.
2 Ai̱ ki̱dongo na ndi̱ngi̱di̱ mu̱byoke,
nku̱si̱si̱mu̱ka na mambya!
3 Ai̱ Mukama, nku̱ku̱si̱i̱ma mu bantu,
nku̱ku̱hi̱i̱mi̱ra kukuhaariiza mu mahanga,
4 kubba ngonzi zaamu zinene kukiraho neiguru,
b̯wesigwa b̯wamu b̯udwa mpaka mu bikaka.
5 Ai̱ Ruhanga, ohaariizwe hakyendi̱ weiguru!
Leka ki̱ti̱i̱ni̱sa kyamu kibbe mu nsi gyensei̱.
6 Cungura bawendya,
obajune na mukono gwamu gwab̯udyo, kandi onzi̱remwo.
7 Ruhanga arageeni̱ nali mu kiikaru kyamwe ki̱syanu̱, naakoba yati,
“Mu kusemererwa kunene ndi̱bagaani̱amwo Sekemu̱,
kandi ngabire bantu bange kihanga kya Su̱koosi̱.
8 Gi̱ryadi̱, nsi gyange, Manaase de gyange,
Efu̱rayi̱mu̱, kyoma kilinda mu̱twe gwange,
Yu̱da, mubbeere gwa b̯ukama b̯wange.
9 Mowaabbu gyogyo kalaaya gyange haanabi̱ra,
Edomu̱ hooho nzi̱ca nkei̱to zange,
mu Fi̱ri̱si̱ti̱ hooho nyeb̯uga hab̯wa b̯u̱si̱ngu̱zi̱.”
10 Naani alintwala mu rub̯uga lunyamaani?
Akanyebembera kugyenda mu Edomu̱?
11 Ai̱ Mukama, mali̱ otu̱nu̱gi̱ri̱ kwahi?
Kotakwebembera mahe geetu̱?
12 Beiraba tu̱ju̱ne hali banyanzigwa beetu̱,
kubba kujuna kwa bantu tikugasa!
13 Ruhanga nka kwali ha rubaju lwetu̱ tu̱ku̱si̱ngu̱ra.
Yooyo akuziginiira banyanzigwa beetu̱.