3
Magezi̱ googo B̯womi
1 Mwana wange, otalyebeera bigambu bi̱nku̱kwegeesya,
bei̱tu̱ mutima gwamu gu̱kwi̱zu̱kyenge bi̱nyaaku̱ragi̱i̱ri̱,
2 hab̯wakubba bilikuha kwomeera myaka minene,
nibikuleetera b̯u̱si̱nge na b̯u̱gu̱u̱da.
3 Ngonzi na b̯wesige bitalikurugaho,
waabilwalanga mwi̱coti̱ lyamu,
waabihandiikanga ha mutima gwamu.
4 Mwomwo oli̱si̱i̱mwa nooheeb̯wa ki̱ti̱i̱ni̱sa
mu mei̱so ga Ruhanga na bantu.
5 Weesiganga Mukama na mutima gwamu gwensei̱,
otalyesiga magezi̱ gaamu wankei,
6 oikirizenge akwehembere hensei̱,
ali̱terekereerya malibatire gaamu.
7 Otetwalanga kubba mu̱gezi̱,
bei̱tu̱ oti̱i̱nenge Mukama, kandi osuulenge kukora bibii.
8 Ki̱kyo kyokyo kilibba mu̱bazi̱ hali b̯womi b̯wamu
nikikumalaho b̯u̱ru̱mi̱.
9 Waatangamwo Mukama ki̱ti̱i̱ni̱sa noomuha heitungo lyamu,
kandi omuhenge makesa ga bilimwa byakubanza.
10 Woolikabikora, oli̱zu̱u̱lya bideeru, nibisaaga na kusaaga,
noi̱zu̱u̱lya byese byamu bya vi̱i̱no ha mu̱nwa.
11 Mwana wange, otagayanga kulamba kwa Mukama,
otalimujwaha yaakakuhab̯uranga.
12 Hab̯wakubba Mukama ahab̯ura gi̱yendya,
nka mu̱byeru̱ kwahab̯ura mwana gi̱yendya.
13 Ali na mu̱gi̱sa yogwo aheeb̯wa magezi̱,
na yogwo ali na kwetegereza.
14 Kubba mugasu gwago gukira feeza
magoba gaago gakira ga zaabbu.
15 Magezi̱ gakira mahi̱ga ga muhendu.
Tihaloho kyokusobora ku̱galengeseni̱a nakyo.
16 Galeeta kwomeera ha rubaju lu̱mwei̱,
ha lundi nigaleeta b̯u̱gu̱u̱da na ki̱ti̱i̱ni̱sa.
17 B̯womi b̯ulimwo kusemererwa b̯uruga hali magezi̱,
mikoore myago myensei̱ mya b̯u̱si̱nge.
18 Gei̱sana musaali gwa b̯womi hali bab̯wo baagekwata,
yogwo yensei̱ agakwatira ki̱mwei̱ abba na mu̱gi̱sa.
19 Mukama, yaahangi̱ri̱ nsi kuraba mu magezi̱,
kuraba mu kwetegereza yaahanga iguru.
20 Kuraba mu kukenga yaateeri̱ho meezi̱ gakwahukana,
na bikaka biguma ndagali̱.
21 Mwana wange, magezi̱ na kwetegereza bitalikurugaho,
obitenge biicale mu mutima gwamu.
22 Bi̱kwi̱za kukuha b̯womi
nibibba kyakulwala mwi̱coti̱.
23 Mwomwo oliicala mu nsi otali̱naku̱ti̱i̱na,
kigulu kyamu tikilikibbala.
24 B̯wolilalanga kuhuumulaho, otali̱ti̱i̱nanga,
b̯ulo b̯wamu b̯wakunoleranga.
25 Otati̱i̱nanga bigwa bi̱taragi̱ri̱
habbe kadi kuhwerekeera kwa babiibi.
26 Kubba Mukama alikulinda,
talikuleka ku̱gwa mu mutegu.
27 Otalituubiranga bantu bali mu b̯wetaagu,
kakubba obba nokusobora kubibaha.
28 Otaliweera mu̱taahi̱ nti,
“Gyenda, wei̱ra mwakya,”
b̯u̱b̯wo kandi nooli nakyo.
29 Otalidyamwo rukwe mu̱taahi̱,
hab̯wakubba eikiririza mu kwicaranwa.
30 Otalizongoba na mwi̱ra waamu hataloho b̯ulyo,
b̯u̱b̯wo hataloho kibiibi ki̱baku̱koori̱.
31 Otalikwatirwa i̱hali̱ bantu banyagi̱
habbe kuhondera mihanda myab̯u.
32 Kubba Mukama anoba nkori̱ za bibii
bei̱tu̱ barungi abatamwo b̯wesige.
33 Akyena maka ga babiibi,
ga barungi, agaha mu̱gi̱sa.
34 Asekereerya bantu beehaariiza,
bei̱tu̱ agiira mbabazi̱ bab̯u̱ndaaru̱.
35 Ki̱ti̱i̱ni̱sa kitumbula bagezi̱
bei̱tu̱ b̯udoma b̯uleeta muswaru.