Kitabbu kya
Ngeera
Kwanjuura
Mu kitabbu kiki kya Ngeera, bigambu bikukira b̯unene byahandi̱i̱ki̱i̱rwe Mukama Sulumaani mu myaka mi̱myo mya 1000 (B.C.) Yesu̱ atakabyali̱i̱rwe. Omwei̱ hali bantu banyakuhandiika zi̱mwei̱ ha zi̱zo ngeera abba Mukama Heezeki̱ya.
Kitabbu kiki kibba na bigambu bikulamba na bikuhab̯ura bantu ha bintu byonyi̱ni̱ bikorwa b̯uli kiro mu nsi. Mu kutwalira hamwei̱ ngeera zegesya bigambu bya Ruhanga bya magezi̱ hamwenya na bitabbu bindi bya mu Bbai̱bbu̱li̱ nka baragu̱ri̱ ba Ruhanga na byafaayo bya Bei̱saleeri̱ ku̱byegesya. Bei̱tu̱ megeseerye ga Ngeera gahukanahoona na bi̱byo bitabbu, hab̯wakubba bigambu byazo bibaza mu kugeragera na bi̱koi̱kyo.
Kigyendeerwa kya mu̱handi̱i̱ki̱ wa zizi ngeera kyali kya kutamwo baminyeeto, bahala na badulu, mutima gwa ku̱ti̱i̱na Ruhanga (Ngeera 1:4 na 4:20). Ku̱si̱gi̱ki̱ra ha bigambu bya mu̱handi̱i̱ki̱, ndugiiro gya kwetegereza gili mu ku̱ti̱i̱na Mukama (Ngeera 1:7). Mu ngeru gi̱gyo kiki kitabbu kiragirira bantu ha bintu bibi: nkoragana gya muntu na Ruhanga, muntu na batahi̱ baamwe, mu̱li̱ngo gwa kuhandyamwona baana, byakuswera na byakuswerwa na bintu bindi.
Bicweka bi̱handu̱ mu kiki kitabbu nka ku̱bi̱honderegeeni̱
Mugasu gwa ngeera Ngeera 1:1-7
Nkoragana gya muntu na Ruhanga Ngeera 1:8—9:18
Bigambu bya Sulumaani Ngeera 10:1—29:27
Mu̱li̱ngo gwa kuhandyamwona baana Ngeera 30:1—31:9
Byakuswera na kuswerwa Ngeera 31:10-31
Kigyendeerwa kya Ngeera
1
1 Zizi zoozo Ngeera za Sulumaani, mu̱tabani̱ wa Dau̱di̱, mukama wʼI̱saleeri̱,
2 ziha bantu kubba na magezi̱ na ngesu,
naakwetegereza bigambu bya magezi̱,
3 zeegesya kwetegereza ngesu na bikorwa birungi,
bikorwa bi̱ku̱si̱i̱mwa na b̯winganiza.
4 Ziha ntwarwa kubba na magezi̱,
basigazi na bahala kwetegereza.
5 Ali na magezi̱ na kwetegereza,
yeetegeerye zizi ngeera, ateeryeho kwega na kulambwa,
6 yeetegereze makuru gaazo,
bigambu na bi̱koi̱kyo bya magezi̱.
7 Ndugiiro gya kwetegereza gili mu ku̱ti̱i̱na Mukama,
bei̱tu̱ badoma bagaya magezi̱ na kuhab̯urwa.
Kulamba hali Nkori̱ za Bibii
8 Mwana wange, weetegeeryanga kulamba kwa bbaawu,
kandi otaligumirisana bigambu bya mmaawu.
9 Byabbanga nka kondo gya mbabazi̱ ha mu̱twe gwamu,
kandi lu̱kwanzi̱ mwi̱coti̱ lyamu.
10 Mwana wange, nkori̱ za bibii zaakakwohyanga,
otabetegeeryanga.
11 B̯ubakakuweeranga, “I̱za tugyende hamwei̱, tulaaliire gi̱tweta,
tu̱gwere muceke atali na nsonga,
12 tubagoromore nibacaali boomi mu nnyanga,
bensei̱, nka bantu bagwi̱ri̱ mu ki̱i̱na,
13 tu̱kwi̱za kutunga bintu bya muhendu,
twi̱zu̱lye manyu̱mba geetu̱ na bintu bi̱tu̱nyagi̱ri̱,
14 i̱za, otwekonyeho,
tu̱kwi̱za twensei̱ kubagana bi̱byo bi̱tu̱nyagi̱ri̱.”
15 Mwana wange, otaligyenda nabo,
otalita kigulu kyamu mu mihanda myab̯u,
16 kubba magulu gaab̯u ganguha kukora bibii,
gei̱ru̱ka kubbwoma ibbanga.
17 Tikigasa kutega mutegu,
nnyoni̱ gyokutega nikikuwona.
18 Bei̱tu̱ bantu nka bab̯wo bagwa mu mitegu myab̯u bankei,
ni̱bei̱twa nkwe zaab̯u bankei.
19 Kwokwo yatyo banyagi̱ ba sente babba,
sente zi̱banyagi̱ri̱, zibamalaho b̯womi.
Wamagezi̱ Akwamiira mu Ngu̱u̱do
20 Wamagezi̱ akukungira mu ngu̱u̱do,
akwami̱i̱rya hasyanu̱ mu kabbaari.
21 Akwetera bantu mu katali,
akuweera beecooki̱ri̱ heirembu lya rub̯uga:
22 “Nywe ntwarwa, mu̱lyendya b̯udoma kudwa di̱i̱?
Nywe bagayi̱ na badoma muliicala nimusuula kwetegereza kudwa di̱i̱?
23 I̱ze mwetegeerye kulamba kwange,
aleke mbaweere bya ha mutima gwange,
nkwi̱za ku̱bolokeerya bi̱nyeegesya.
24 Nab̯u̱nyabeeti̱ri̱ mwaswi̱ri̱ ku̱nyeetegeerya,
mu̱takanzegwe nab̯u̱nyabeesengereerye,
25 mugaya b̯u̱gayi̱ bigambu byange,
ti̱mwegwa binkubalamba.
26 Kabii b̯u̱kali̱bei̱zi̱ra, ndibasekereerya,
ndi̱bahonereerya,
27 nnaku b̯u̱zi̱li̱bei̱zi̱ra nka bbuukuulu,
kabii b̯ukalibasenga nka kihehu,
b̯u̱ti̱i̱ni̱ na b̯ujune b̯ub̯ulibakwata.
28 Mwomwo bali̱nyesengereerya, bei̱tu̱ ti̱ndi̱bei̱ramwo,
nab̯u̱bali̱ntoolya, tibalinzagya,
29 hab̯wakubba baaswi̱ri̱ kwetegereza,
baacwamwo b̯u̱tati̱i̱na Mukama.
30 Hab̯wakubba batakeikirize kulamba kwange
baagaya na bigambu byange,
31 kwokwo baliwonawona hab̯wa ngesu zaab̯u,
nibadwa ha kutamwa bikorwa byab̯u.
32 Kubba b̯u̱teegwa b̯u̱kwi̱za kwi̱ta basi̱ru̱si̱ru̱,
na b̯utafaayo nib̯umalaho badoma,
33 bei̱tu̱ b̯uli anyeetegeerya yeicalanga mu b̯u̱si̱nge,
atali na kyaku̱ti̱i̱na na b̯ujune.”