6
Dijan preya blanga wen trabul kaman
Preya blanga Deibid.
1 YAWEI, nomo graul langa mi,
nomeda yu wail langa mi.
Wen yu nogudbinji detmatj langa mi,
nomo panishim mi blanga titjim mi det raitwei.
2 Yu jidan kain langa mi, YAWEI, dumaji mi wikwan.
Meigim mi gudwan igin, YAWEI,
dumaji main bodi ardimbat mi.
3 Mi brabli nogudbinji en mi ardimbat detmatj.
YAWEI, haulong yu garra libum mi lagijat?
4 Kambek langa mi, YAWEI, en seibum mi.
Seibum mi dumaji yu laigim mi en yu oldei jidan kainbala.
Nomo larram mi dai.
5 Dedbala pipul nomo jinggabat yu langa det pleis weya ola dedbala pipul go.
Dei nomo preisimbat yu.
6 Aibin jinginatbat langa yu detmatj mi nokap.
Dumaji aibin kraikraibat detmatj imbin jis laiga fladwoda,
en main sweig im wetwan na.
7 Aibin kraikraibat oldei.
Ai kaan luk na.
Mi wik na dumaji mi oldei wori blanga main enami olabat.
8 Gowei brom mi, ol yumob hu oldei dumbat nogudbala ting,
dumaji YAWEI bin irrim mi kraikraibat.
9 Imbin irrim mi wen aibin jingat langa im blanga album mi,
en im garra album mi.
10 Im garra bidim main enami olabat,
en dei garra fil nogudbinji.
Dei garra bradin en tenbek,
dumaji streidawei dei garra sheim miselp.