57
Deibid bin prei langa God blanga album im
Preya blanga Deibid wen imbin ranawei brom Sol en imbin blandim miselp langa keib.
1 Main God, jidan kain langa mi, en sori langa mi.
Mi kaman langa yu blanga jidan seifwan,
jis laik ola lilwan bard ran langa ola mamiwan bard blanga jidan seif wen trabul im kaman.
Wal mi kaman langa yu blanga jidan seifwan wen det trabul im gulijap.
2 Main God, mi jingat langa yu.
Yu Brabli Haiwan, en yu meigim det plen weya yu garram blanga mi hepin trubala.
3 Yu irrim mi langa hebin, en yu ensim mi en seibum mi.
Yu bidim main enami olabat hu gibitbat mi adtaim.
Yu kaman en album mi lagijat na.
Yu oldei laigim yu pipul, en yu oldei dum wanim yu pramis.
4 Main enami olabat raidaran langa mi.
Dei weidabat, redibala blanga kilim mi.
Mi fil bradin na, laiga lilwan enimul im bradin wen im luk ola dinggo raidaran, en im luk olabat tang en olabat tuth.
5 God, yu shoum yu haibala pawa deya ontop langa skai,
en yu larram pipul luk yu brabli shainiwan lait ebriweya langa dijan wel.
Yu shoum pipul ebriweya yu brabli haibalawan!
6 Main enami olabat lukaranbat blanga mi.
Mi brabli nogudbinji.
Jis laik detlot men grajim bigwan hol wen dei wandi trepam enimul,
wal lagijat na detlot men wandi trai trepam mi,
bat dei garra oni trepam olabat ronselp.
Dei garra jidan langa det trabul olabat selp.
7 Ai garra kipgon trastimbat yu, God.
Trubala, ai garra kipgon trastimbat yu.
Ai garra sing en preisim yu!
8 Mi dalimbat miselp, “Jidan gudbinji!
Gajim yu gita en sing!
Ai garra gidap bifo det san en sing!”
9 Main Bos, ai garra gibit yu theingks lida langa ola pipul.
Ai garra preisim yu lida langa ola pipul brom ebri kantri.
10 Yu filing blanga kipgon laigimbat pipul im jidan ebriweya,
brom longwei ontop raitdan langa graun.
Yu trubalawei gajimap det skai.
11 God, yu shoum yu haibala pawa deya ontop langa skai,
en yu larram pipul luk yu brabli shainiwan lait ebriweya langa dijan wel.
Yu shoum pipul ebriweya yu brabli haibalawan!