48
Jerusalem det bigwan taun blanga God
Song blanga det femili blanga Kora.
1 YAWEI det trubala God im brabli haibalawan,
en pipul garra preisim im brabliwei langa det bigwan taun blanga wi God langa im seikridwan hil.
2 Saiyan, det brabli bigwan hil blanga God, im jidan brabli haiwan en im brabli purdiwan.
Det taun Jerusalem blanga det brabli haibala king meigim pipul jidan brabli gudbinji ebriweya langa dijan wel.
3 God bin shoum im seifwan garram im deya insaid langa det taun garram bigwan wol raidaran.
4 Ola king bin majurrumap miselp blanga kaman en fait langa Saiyan.
5 Bat wen deibin luk, deibin brabli hatjamp,
en deibin bradin en ranawei.
6 Deibin sheiksheik nomo lilbit en bin filim detmatj pein, jis laik gel wen im abum beibi.
7 God bin breigim olabat jis laik strongwan win en rein breigimap bigwan bout.
8 Basdam wibin irrim wanim God bin dum,
en tudei na wibin luk wanim imbin dum iya langa dijan taun blanga YAWEI det boswan God blanga wi.
Im na garra kipum dijan taun seifwan olagijawan.
9 God, insaid langa yu Serramoni Pleis melabat jinggabat blanga det filing weya yu laigimbat olataim.
10 Ebribodi langa ebri kantri sabi yu, God, en dei oldei preisimbat yu.
Yu oldei gibit feyago langa ebribodi.
11 Larram ola pipul brom Saiyan jidan gudbinjiwei!
Yu jadjim pipul raitwei.
Larram ola pipul langa ebri taun langa Juda jidan gudbinji.
12 Yumob pipul blanga God, yumob wok raidaran langa Jerusalem en kaundimap ola haiwan haus.
13 Yumob luk gudwei langa ola strongwan wol en detlot haiwan haus,
wulijim yumob gin dalim ol yumob bigininimob blanga dijan seifwan taun blanga God.
14 Dijan God im jidan wi God olagijawan.
Im garra lidimbat wi raidap dis wel binij.